Boithoriso ba 'nete
1Empa u se ke ua hlajoa ke
lihlong ka tse latelang,
'me u se etse sebe ka ho tšaba
batho ba bang:
2Se be lihlong ka Molao
oa Ea holimo-limo le selekane sa hae,
le ka ho fana ka kahlolo e lokileng,
leha e lokolla ea khopo;
3le ka ho jarisana litšenyehelo
le motsoalle kapa le balekane leetong,
le ka ho arolelana lefa le bana beno.
4Se be lihlong ka ho nepa ha sekala
le ka litekanyo tse nepahetseng,
le ka ho ipokellela leruo
haholo kapa hanyenyane;
5le ka phaello e tsoaloang ke khoebo,
le ka tsamaiso e matla ea bana,
le ka ho shapa mohlanka ea khopo
ho fihlela a e-tsoa mali.
6Moo ho nang le mosali ea sa
tšepahaleng, bere-bere e molemo;
'me moo ho leng matsoho a mangata,
notlella lintho.
7Lintho tseo u li beang polokelong
u li bale 'me u li bekhise,
'me tse kenang le tse tsoang
u li ngole fatše.
8Se be lihlong ho khalemela
leoatla kapa sethoto,
kapa motho ea holileng ea lakatsang
bacha.
Ka mokhoa o joalo
u tla be u rutehile ruri,
'me u tla ananeloa ke batho bohle.
Ntata le morali
9Morali o hlobaetsa ntat'ae boroko
sephiring,
'me ho itšoenya ka eena
ho mo hlokisa boroko;
boroetsaneng, esere ea e-ba lefetoa;
lenyalong, esere a hlouoa;
10ha e sa le moroetsana, esere
a senyeha kapa a emarela lapeng;
ha a nyetsoe, esere a bontša
ho se tšepahale;
'me ha ba phela hammoho le monna,
esere ea e-ba nyopa.
11Alosa ka thata morali ea manganga,
esere a u tšehisa lira tsa hao,
ea e-ba sesomo motseng
eo batho bohle ba buang ka eena,
le ho u hlabisa lihlong har'a machaba.
12Se talime botle ba mang kapa mang,
'me u se lule har'a basali,
13hobane liaparong ho tsoa tšoele,
'me ho mosali ho tsoa
bokhopo ba mosali.
14Ho molemo bokhopo ba monna,
ho e-na le mosa oa mosali;
ke mosali ea tlisang tlontlollo
le sekhobo.
Boholo le bohlale ba 'Mopi
15Hajoale ke tla le hopotsa
mesebetsi ea Morena,
'me ke bolele seo ke se boneng;
ka lentsoe la hae Morena o phethile
mesebetsi ea hae.
16Joalokaha letsatsi le khanya,
le chabela lintho tsohle,
mosebetsi oa Morena o tletse
tlotla ea hae.
17Esita le mangeloi
Morena ha aa ka a a fa matla
a ho bala mesebetsi eohle
e hlollang ea hae,
eo Morena Ea matla 'ohle a e entseng
'me a e tiisa,
hore tsohle tse bopiloeng
li eme li tsitsitse tlotleng ea hae.
18O fuputsa botebo ba maliba
le ba pelo ea motho,
'me o hlalohanya makunutu 'ohle
a tsona;
hobane Ea holimo-limo
o na le tsebo eohle,
'me o bona lipontšo tsa linako.
19O phatlalatsa tse fetileng le tse tlang,
'me o totobatsa sebopeho
sa lintho tse patehileng.
20Ha ho mohopolo
o ka mo phonyohang,
'me ha ho le lentsoe leha le le leng
le patiloeng ho eena.
21O hlophisitse tse kholo
tseo a li entseng ka bohlale ba hae,
hobane eena o teng
ho tloha khale ho isa khale.
Ha ho letho le ka eketsoang
kapa la fokotsoa ho eena,
'me ha a hloke moeletsi ofe kapa ofe.
22E rateha hakaakang mesebetsi
eohle ea hae,
esitana le tlhasenyana feela
eo motho a ka e bonang.
23Ntho tsena tsohle lia phela
le ho ba teng ka ho sa eeng kae,
tsohle li latela seo li se bopetsoeng.
24Tsohle li tsamaea ka bobeli,
e 'ngoe e tlatsane le e 'ngoe;
ha a etsa letho le sa fellang.
25Ntho e 'ngoe e tlatseletsa
molemong oa e 'ngoe;
ke mang ea tla tenoa ke ho boha
tlotla ea hae?
