1Le letle hakaakang leholimo
ka sepakapaka se khanyang
sa lona,
tlotla ea maholimo
e boheha hakaakang!
2Letsatsi le chabang, ha le hlaha,
le phatlalatsa mosebetsi
o hlollang oa Ea holimo-limo.
3Motšeare oa lenyeta le bataola naha,
'me ana ke mang ea ka mamellang
mocheso oa lona?
4Motho ea futhelang onto
o sebeletsa mochesong,
empa mocheso oa letsatsi lithabeng
o feta oo hararo.
Le romela lebatama la lona,
'me le betsa mahlaseli a fahlang mahlo.
5O moholo Morena ea le entseng,
'me ke ka taelo ea hae le potlakang
tseleng ea lona.
6Hape o entse khoeli,
ho sebetsa ka nako ea eona,
ho tšoaea linako
le ho ba pontšo e sa feleng.
7Khoeli e supa matsatsi a mekete;
hoba e toloke e ea fifing.
8Khoeli e 'ngoe le e 'ngoe ea selemo
e reeletsoe ka khoeli;
hoba e thoase e etsa litšobotsi
tse hlollang.
E ka lebone la makhotla a leholimo,
le khanyang sepakapakeng.
9Khanya ea linaleli
ke botle ba leholimo,
mokhabo o phatsimang
libakeng tse holimo-limo tsa Morena.
10Ka taelo ea Ea halalelang li eme
joalokaha li laotsoe,
ha li ke li khaotse le ka mohla
tebelong ea tsona.
11Talima mookoli,
'me u boke
Ea o entseng;
o motle ka ho fetisisa
ka ho benya ha oona.
12Leholimong o entse bochitja
bo tlotlehang,
liatla tsa Ea holimo-limo
li o tsalile joaloka seqha.
13Ka taelo ea hae o romela lehloa,
'me o potlakisa mahalima
a kahlolo ea hae.
14Ka hona meliko ea leholimo
ea buloa,
'me maru a tsoa
a fofa joaloka linonyana.
15Matleng a hae o bokella maru,
ao ka 'ona a etsang majoana a sefako.
16Ka ho hlaha ha hae
lithaba lia tsukutleha,
ka thato ea hae moea oa boroa oa foka.
17Molumo oa ho thoathoaretsa ha hae
o khalema lefatše;
o etsa joalo le ka sefefo sa leboea
le setsokotsane.
O hasanya lehloa joalokaha eka
ke linonyana tse fofelang tlase,
'me ho khetheha ha lona
ho joaloka litsie tse lulang.
18Leihlo le hlolloa ke botle
bo bosoeu ba lona,
'me kelello e makatsoa
ke ho khetheha ha lona.
19O tšollela serame se seputsoa
holim'a lefatše joaloka letsoai,
'me ha se hoama se fetoha
meutloa e hlabang.
20Moea o batang oa leboea oa foka,
'me leqhoa le hoama holim'a metsi,
le apesa letšana ka leng la metsi,
'me metsi a le apara
joaloka sesireletso sa sefuba.
21Moea o metsa lithaba
le ho chesa mahoatata,
'me o omeletsa joang bo bocha
joaloka hola e le mollo.
22Moholi kapele-pele o phekola tsohle;
ha phoka e letse e pholisa mocheso.
23Ho ea ka morero oa hae
o kokobelitse maliba a leoatle,
'me a hlahisa lihleke-hleke har'a lona.
24Ba sesisang leoatleng
ba bolela likotsi tsa lona,
'me bohle re hlolloa
ke tseo re li utloang.
25Ho lona ho na le libopuoa
tse hlollang 'me tse makatsang,
mefuta eohle ea lintho tse phelang,
le lihlapi tsa litonana.
26Ka lebaka la Molimo
morumuoa oa hae
o atleha leetong,
ka lentsoe la hae
tsohle li hlophehile.
27Leha re bua haholo re hloloa
ho fihlela pheletsong,
'me ka kakaretso re tlameha ho re:
“Molimo ke tsohle.”
28Matla re tla a nka kae ho mo rorisa?
hobane o moholo ho feta
mesebetsi eohle ea hae.
29Oa tšabeha Morena,
'me o moholo haholo;
matla a hae aa hlolla.
30Ha le rorisa Morena,
mo phahamiseng kahohle-hohle
kamoo le ka etsang kateng,
hobane o ntse a le kaholimo-limo
haholo esita le moo.
Ha le mo phahamisa,
ntšang matla a lona kaofela,
'me le se ke la khathala matla,
hobane ha le ka ke la fihlela
pheletsong.
31Ke mang ea kileng a 'mona,
'me ea ka mo lokolisang?
kapa ke mang ea ka mo phahamisang
kamoo a leng kateng?
32Ntho tse ngata tse kholo
ho feta tsena li patiloe,
hobane re sa bone e se mekae feela
ea mesebetsi ea hae.
33Morena o entse lintho tsohle,
'me ho barapeli o fane bohlale.
