Lefu
1Uena lefu, ho bohloko
hakaakang ho u hopola,
ho ea phelang ka khotso har'a maruo,
ho motho ea se nang metouto,
ea atlehileng ho tsohle,
'me ea sa ntsaneng a e-na le bophelo
ba ho thabela lijo.
2Uena lefu, kahlolo ea hao
e amoheleha hantle hakaakang
ho motho oa mohloki eo bophelo
ba hae bo ntseng bo qepha,
ea tsofetseng haholo,
'me ea toutisoang ke tse ngata,
ho motho ea sa utloaneng le batho
'me ea seng a feletsoe ke mamello.
3U se ke ua tšaba kahlolo ea lefu;
hopola ba bileng teng pele ho uena
le ba tla tla ka mora' hao.
4Ena ke taelo e tsoang
ho Morena bakeng sa libopuoa tsohle;
u ka hanyetsa joang boithatelo
ba Ea holimo-limo?
Leha u ka phela lemo tse leshome
kapa tse lekholo kapa tse sekete,
ha ho ea tla u botsa ka tsona
Qalong ea bafu.
Kotlo ea ba se nang Molimo
5Bana ba baetsalibe ba fetoha
ba manyala,
kaha ba ea khafetsa matlung
a ba se nang Molimo.
6Lefa la bana ba baetsalibe
le tla timela,
'me litloholong tsa bona
e tla ba sekhobo sa kamehla.
7Bana ba tla nyatsa ntata
ea se nang Molimo,
hobane ba tlontlolohile ka baka la hae.
8Ho malimabe lona
ba se nang Molimo,
ba furaletseng Molao
oa Ea holimo-limo.
9Ha le hlaha le hlahetse thohakong,
'me mohla le shoang
thohako ke mojaro oa lona.
10Ntho tsohle tse tsoang mobung
li khutlela mobung;
ka baka lena ba khopo
ba tloha thohakong ho ea timelong.
11Bofifi ba batho bo amana
le 'mele ea bona,
empa lebitso le khopo la baetsalibe
le tla hlakoloa.
12Hlokomela lebitso la hao le letle
hobane u tla salloa ke lona;
le molemo ho feta liqubu tse sekete
tsa khauta.
13Bophelo bo botle bo baletsoe
matsatsi a bona;
empa lebitso le letle le tla ba teng
ka ho sa eeng kae.
Boitlhompho
14Bana ba ka, bolokang thuto
ka khotso.
Bohlale bo patehileng
le letlotlo le patiloeng,
molemo oa tsona bobeli ke ofe?
15Ho molemo motho ea patang
bothoto ba hae,
ho e-na le ea patang bohlale ba hae.
16Joale ke tla le bolella tseo
le tšoanetseng ho ba lihlong ka tsona;
hobane hase hantle ho ba lihlong
tabeng efe kapa efe.
17Hlajoa ke lihlong ka pele ho ntat'ao
kapa 'm'ao ka bohlola,
le ka leshano ka pele ho khosana
kapa 'musi;
18le ka tlolo ea molao
ka pele ho moahloli kapa 'masetarata,
le ka bokhopo ka pele ho phutheho
kapa sechaba,
le ka tšebetso ea bolotsana
ka pele ho molekane kapa motsoalle;
19le ka bosholu sebakeng seo u ahileng
ho sona.
Hlajoa ke lihlong ka ho roba
kano kapa selekane.
Hlajoa ke lihlong ka ho hloka
boitlhompho lijong,
le ka ho tiisa sefahleho
ha u amohela kapa u fana;
20le ka ho se arabe ba u lumelisang,
le ka ho talima mosali oa letekatse.
21Hlajoa ke lihlong ka ho furalla
mohaeno,
le ka ho nkela motho e mong
seabo sa hae kapa mpho ea hae,
le ka ho tjamela mosali
oa motho e mong.
22U se ke ua kena-kenana
le lekhabunyane la hae,
'me u se atamele malao a hae.
Hlajoa ke lihlong ka mantsoe
a hlapaolang metsoalle,
le ka ho koma-koma
ka mora' ho fana ka mpho,
23le ka ho pheta lentsoe
leo u le utloileng,
le ka ho senola makunutu.
Ke moo hee, u tla hlajoa ke lihlong ka
nepo,
'me u tla kotula hlompho ea motho e
mong le e mong.
