ESETERE (SEGERIKE) 5

₃Eaba khosi e re ho eena; “U lakatsa'ng, Esetere? Seo u se kopang u tla se neoa, leha e ka ba halofo ea 'muso oa ka.” ₄Esetere a araba, a re: “Kajeno ke letsatsi le leholo ho 'na. Haeba e le ntho e ka khahlang khosi, khosi le Hamane ba ke ba tle moketeng oa lijo oo ke o lokisitseng hona kajeno.” ₅Eaba khosi e re: “Potlakang le bitse Hamane, re phethe seo Esetere a se boletseng!” Bobeli ba bona ba ea moketeng oo Esetere a neng a ba memetse ho oona. ₆Ha ho ntse ho nooa veine, khosi ea re ho Esetere: “Ke'ng, mofumahali Esetere? Eng kapa eng eo u tla e kopa, e tla ba ea hao.” ₇A araba, a re: “Thapeli le kopo ea ka ke ena: haeba khosi e nkhauhetse, e ke e tle hape hosasane le Hamane moketeng oo ke tla be ke ba lokiselitse oona. Hosasane ke tle etsa ka mokhoa o tšoanang le kajeno.”

₉Hamane o ne a ile a tsoa ha khosi a thabile haholo, a nyakaletse. Empa eitse ha Hamane a bona Moredekai, oa Mojuda, mabaleng a ntlo ea khosi, a halefa haholo. ₁₀Ha a fihla hae, a bitsa metsoalle ea hae, le Sosara mosali oa hae. ₁₁A ba bontša maruo a hae, 'me a ba phetela kamoo khosi e neng e mo phahamisitse ka mekhoa e mengata kateng, le hore e mo entse tona-kholo, 'me e mo khethile ho okamela litaba tsa 'muso. ₁₂Eaba Hamane o re: “Mofumahali Esetere o memetse 'na feela ho tla le khosi moketeng oa hae; le hosasane ke sa memiloe. ₁₃Empa tsena tsohle ha li nthuse ka letho, ha feela ke ntse ke bona Moredekai oa Mojuda a le mabaleng a ntlo ea khosi.”

₁₄Bo-Sosara, mosali oa hae, le metsoalle ea hae ba re ho eena: “Laela hore ho rengoe sefate, se bophahamo ba limethara tse mashome a mabeli a metso e 'meli; 'me hosasane u bue le khosi hore Moredekai a fanyehoe sefateng seo, ebe joale u ea moketeng le khosi, u ithabise!” Taba ena ea khahla Hamane, 'me sefate se joalo sa lokisoa.