ESETERE (SEGERIKE) D

₁Ka letsatsi la boraro, hoba a qete lithapelo tsa hae, Esetere a hlobola liaparo tsa hae tsa pako, 'me a apara tsa bofumahali. ₂Joale ha a se a khabile joalo, a kopa thuso ea Molimo ea bonang tsohle 'me ea pholosang; eaba o tsamaea le makhabunyane a mabeli, ₃a itšetleha ka le leng hanyenyane, ₄ha le leng le mo setse morao, ho phutha mose oa hae o molelele. ₅O ne a bonahala a le botle bo phethahetseng, sefahleho sa hae se tletse thabo le lerato, empa pelo ea hae e sisa ke ho tšoha. ₆Hoba ho buloe menyako eohle, a kena, 'me a ema ka pele ho khosi. Ahashuerushe o ne a lutse teroneng ea hae ea borena, a feletse ka liaparo tsa hae tsa botlotlehi, tse neng li homiloe ka khauta le majoe a bohlokoa. O ne a tšabeha haholo. ₇Ha a phahamisa sefahleho sa hae, se khanyang ke tlotla, a mo talima a tlokomile ke khalefo. Mofumahali a tšerema mangole, a ba a ea le maili-ili, sefahleho sa hae se fetohile, a tšetleha hlooho ea hae holim'a lekhabunyane le neng le le pel'a hae.

₈Joale Molimo a fetola moea oa khosi hore o be mosa. Ka letsoalo ea tlola teroneng ea eona, ea mo nkela matsohong a eona, ho fihlela a hlaphoheloa; eaba e thoba pelo ea hae ka mantsoe a tšelisang, e re: ₉“Ke'ng, Esetere? Ke ngoan'eno, khothahala! ₁₀Ha u na ho shoa; molao oa rona o shebane le bafo feela. Ak'u atamele.” ₁₁Eaba Ahashuerushe o phahamisa lere la khauta la hae la borena, a mo ama ka lona molaleng, ₁₂'me a mo aka, a ba a re: “Bua le 'na.” ₁₃Esetere a araba, a re; “Morena oa ka, ke u bone u ka lengeloi la Molimo, 'me pelo ea ka ea tsukutloa ke tšabo ea botlotlehi ba hao; ₁₄hobane ua babatseha, morena, 'me sefahleho sa hao sea boheha.” ₁₅Empa eare a sa bua, a oa, a akhehile. ₁₆Khosi ea ferekana 'me basebeletsi bohle ba eona ba leka ho thusa Esetere.