ESETERE (SEGERIKE) 6

₁Bosiung bona, Morena a hlobaetsa khosi; eaba e laela mongoli oa eona ho e tlisetsa buka eo ho ngotsoeng liketsahalo tse fetileng ho eona, hore a mo balle eona. ₂Ba fumana ho eona litaba tse ngotsoeng ka Moredekai: kamoo motho eo a kileng a sebela khosi tsa mahaole a mabeli a eona, ao, ha a ntse a phetha mosebetsi oa 'ona oa bolebeli, a neng a batla ho bolaea Ahashuerushe. ₃Eaba khosi e re: “Moredekai o kile a neoa tlotla efe le teboho efe ka ketso eo?” Basebeletsi ba eona ba re: “Ha ua mo fa letho.”

₄Joale, ha khosi e ntse e botsa tse amanang le thuso eo Moredekai a neng a ile a mo etsetsa eona, Hamane a kena ka seotloaneng. Khosi ea botsa, e re: “Ke mang ea ka seotloaneng?” Hamane o ne a tlile ho bua le khosi hore e fanyehe Moredekai sefateng seo a mo lokiselitseng sona. ₅Basebeletsi ba khosi ba re: “Ke Hamane ea emeng ka seotloaneng.” Khosi ea re: “E-reng a kene.” ₆Joale khosi ea re ho Hamane: “Ke tla etsa joang ho motho eo nka thabelang ho mo tlotla?” Hamane a bua ka pelo, a re: “E ka ba mang eo khosi e ka thabelang ho mo tlotla, haese 'na?” ₇Joale a araba khosi, a re: “Motho eo khosi e ka thabelang ho mo tlotla, ₈bahlanka ba khosi ba mo tlisetse seaparo se seng se aparoang ke khosi, le pere e palangoang ke khosi. ₉Tsena li neoe e mong oa metsoalle e tlotlehang ea khosi; 'me eo a apese motho eo khosi e mo ratang, a mo palamise pere, 'me a mo tsamaise mapatlelong a motse a hooa a re: ‘Sena ke sona se tla etsoa ho mang kapa mang eo khosi e thabelang ho mo tlotla!’ ”

₁₀Khosi ea re ho Hamane: “U boletse! E-ea u etse joalo ho Moredekai oa Mojuda, ea sebeletsang mabaleng a ntlo ea khosi. U se ke ua siea letho la tseo u li boletseng.” ₁₁Joale Hamane a nka seaparo seo le pere eo, a apesa Moredekai seaparo, a mo palamisa pere. Eaba o mo tsamaisa mapatlelong a motse, a hooa, a re: “Sena ke sona se tla etsoa ho mang kapa mang eo khosi e thabelang ho mo tlotla!”

₁₂Moredekai a boela mabaleng a ntlo ea khosi, empa Hamane eena a khutlela ha hae, a sulafaletsoe, a ikhurumelitse hlooho. ₁₃Hamane a bolella Sosara, mosali oa hae, le metsoalle ea hae tsohle tse mo hlahetseng. Metsoalle ea hae le mosali oa hae ba re ho eena: “Haeba Moredekai e le oa leloko la Bajuda, u qalile feela ho theoha boemong ba hao ka pele ho eena; u tla 'ne u theoleloe tlase-tlase. Ha u sa tla mo hlola, hobane Molimo ea phelang o na le eena.” ₁₄Eare ba sa ntsane ba buisana, mahaole a khosi a fihla, a potlakisetsa Hamane moketeng o lokisitsoeng ke Esetere.