MORUTI 7

₁Bitso le letle

le feta menkoane ka ho rateha,

tsatsi la lefu

le molemo ho feta la tsoalo.

₂Ho molemo ho etela

lapa le aparetsoe ke bofifi,

ho e-na le ho etela

lapa la moketeko,

hoba lefu ke pheletso

ea motho ka mong;

ba phelang

hona ba ho nahane hantle.

₃Masoabi a molemo ho feta litšeho;

pelo e ka thaba

fahleho se ntse se soabile.

₄Pelo tsa bahlalefi

li lapeng la bofifi,

pelo tsa lithoto

li lapeng la menyanyako.

₅Ho molemo

ho mamela khalemo ea mohlalefi,

ho e-na le ho mamela

pin'a lithoto.

₆Meutloa ha e beseletsa

pitsa ea qhōma;

tšeho la lithoto le lona le joalo.

Hona le hona

ke lefeela la mafeela.

₇Mohlalefi oa mohatelli

oa thotofala,

tjotjo eona e senya pelo ea motho.

₈Pheletso ea taba e molemo

ho feta qaleho ea eona,

momamelli o molemo

ho feta moikakasi.

₉U se itloaetse ho halefa kapele,

thoto li koetlile khalefo

ka lifubeng tsa tsona.

₁₀Se k'a re:

“Ke hobane'ng ha tšiu tsa khale

li bile molemo ho feta tsa kajeno?”

Ho botsa potso ena

ke ho hloka bohlale.

₁₁Bohlale bo molemo joaloka lefa,

bo atlehisa batho

ba ntseng ba phela.

₁₂Bohlale boa sireletsa,

chelete ea sireletsa;

molemo o moholo oa tsebo ke ona:

Ba ruileng,

bohlale bo ba nea bophelo.

₁₃Ak'u talime mesebetsi ea Molimo:

Se khopamisitsoeng ke Molimo,

se ka khopamolloa ke mang?

₁₄Mohl'a tsatsi la thabo

nyakalla le uena,

mohl'a tsatsi la mahlōnōkō

ak'u hopole sena:

Matsatsi ana, bobeli,

a entsoe ke Molimo;

kahoo tsa kamoso

motho a ke ke a li tseba.

Motho oa shoa

leha a nts'a lokile,

motho oa tsofala

leha a nts'a le khopo.

₁₆Se itokafatse

ho feta tekanyo,

kapa ua itlhalefisa

ho feta tekanyo;

ebe u ipolaela'ng

ka ho etsa joalo?

₁₇Se be khopo ho tlōla moeli,

le teng u se ke ua iketsa sethoto;

u tla b'u shoella'ng

pele ho nako ea hao?

₁₈Molemo ke ho itšoarella

ka polelo ea pele,

le ea bobeli u se k'a e nyahlatsa;

ea tšabang Molimo

o phema tsietsi tsena bobeli!

₁₉Bohlale bo matlafatsa motho,

motho oa mohlalefi,

a fete babusi ba motse

ba le leshome.

₂₀Ha ho ea lokileng mona lefatšeng,

ea etsang ho molemo,

ea sa etseng sebe.

₂₁Se mamele lipuo tsohle tsa batho,

esere ua utloa mohlanka oa hao

a u rōhaka.

₂₂Le uena ka pelong u tseba hantle,

ke ka makhetlo

ba bang le uena u ba rōhaka.

“Le 'na ke sa tla be ke hlalefe!”

Empa bohlale ke sitoa ho bo fihlela.

₂₄Seo se hōle, se tebileng hakaalo,

ebe ea ka se sibollang ke mang?

₂₅Ka pelong

ka labalabela ho batla tsebo,

ho fuputsa le ho sibolla bohlale,

ho fumana mabaka

a boleng ba lintho;

ho tseba ha bokhopo e le bothoto,

bothoto bona e le bohlanya.

₂₆Mosali ea tšoasang

ka maqiti a hae,

eo pelo ea hae e tšoanang le sefi,

matsoho a hae a kang mahlaahlela,

ka fumana a tšabeha ho feta le lefu.

Ea khahlisang Molimo

o tla phonyoha atleng tsa hae,

athe moetsalibe eena o tla tšoasoa.

“Ha ke ntse ke nahana taba ka 'ngoe,

ho fumana mabaka

a boleng ba lintho;

₂₈ha ke ntse ke fuputsa,

ke sa fumane letho,

ka fumana monna oa banna

ho ba sekete,

har'a basali teng

ha kea fumana le ea mong!

₂₉Seo ke se fumaneng feela ke sena:

Molimo o bōpile motho a lokile,

batho ba iqapetse

mamènèmènè a mangata.”