1Ea tšoanang le mohlalefi
ke mang?
Ea tsebang ho hlalosa lintho
ke mang?
Bohlale bo elisa fahleho sa motho,
ho tsunkana ha sona ebe hoa fetoha.
Hlomphang khosi
2Ke re ho lōna: Hlomphang taelo ea khosi, hobane le entse kano kapele ho Molimo. 3Le se n'o potlakela ho tloha kapele ho khosi, le se ke la ngangella tabeng e mpe, hobane khosi e etsa seo e se ratang. 4Kaha lentsoe la khosi le e-na le matla, ke mang ea ka reng ho eona: “Joale u etsa'ng?”
5Ea hlomphang taelo ea khosi
a ke ke a tsoa kotsi,
mohlalefi o tseba
hore nako ea kahlōlo e teng.
6Ntho ka 'ngoe
e na le nako ea kahlōlo ea eona,
empa bokhopo ba motho
bo mo imela haholo.
7Motho ha a na tsebo
ea tse tla etsahala;
tsa maisao
a ka li senoleloa ke mang?
8Motho ha a na matla
a ho busa moea oa hae,
kapa a ho laola
tsatsi la lefu la hae;
ha ntoa e kopane
ha ho beoe lihlomo fatše,
bokhopo bo ke ke ba lokolla
ba bo etsang!
9Tsena tsohle ke ile ka li elelloa, ha ke ntse ke nahana lintho tsohle tse etsoang mona lefatšeng. Ka hlokomela kamoo motho e mong a iketsang 'mampoli kateng holim'a ba bang, 'me a ba hlōkōfatsa. 10Ka bona le ba khopo ba epeloa, bona ba neng ba ee ba kene ba be ba tsoe sebakeng se halalelang, 'me baahi ba motse ba ba rorisetse tseo ba li entseng. Hona le hona ke lefeela.
11Ka baka la hobane ba khopo ba lieha ho ahlōloa, batho ba ikemiselitse ho etsa bobe ka sebete. 12Leha moetsalibe a ka etsa bokhopo halekholo, eaba o phela halelele, feela ke tseba hantle hore ba tšabang Molimo, ba mo hlomphang, ke bona ba tla phela hamonate. 13Empa ea khopo a ke ke a phela hamonate, le matsatsi a bophelo ba hae a ke ke a lelefala joaloka seriti, hobane eena ha a tšabe Molimo.
14Ho na le mafeela a etsahalang mona lefatšeng. Batho ba lokileng ba fumana se lokelang ba khopo, athe ba khopo ba fumana se lokelang ba lokileng. Hona le hona ke lefeela. 15Ka baka lena ke thōhōletsa boithabiso, hobane mona lefatšeng ha ho ntho e molemo ho motho, haese hore a je, a noe, 'me a nyakalle. O tla 'ne a nyakalle joalo ha a le mosebetsing oa hae, ka matsatsi 'ohle a ho phela ha hae, ao Molimo a mo neileng 'ona mona lefatšeng.
16Ha ke ntse ke labalabela ho tseba bohlale le ho hlahloba mesebetsi e etsoang mona lefatšeng, ke elelloa hore bosiu le motšeare motho ha a robale, 17'me ka bona le mesebetsi eohle ea Molimo. Ka elelloa hore ha ho motho ea utloisisang se etsahalang mona lefatšeng. Le hoja motho a leka kahohle ho fuputsa mesebetsi ena, o sitoa ho e fihlela. Leha mohlalefi a ithetsa ka ho re eena oa tseba, empa a ke ke a ba a e utloisisa.
