Merabe e ka leboea e fetohela khosi
1Rehoboame a ea Shekeme, moo Baiseraele bohle ba neng ba ile teng, ho ea 'mea hore e be khosi. 2Ha Jeroboame, mora oa Nebate, ea neng a ntse a le Egepeta moo a neng a ile a balehela teng ka baka la ho tšaba khosi Solomone, a utloa tsena, eaba o khutla Egepeta. 3Joale Jeroboame a latoa, 'me eena le Baiseraele bohle ba fihla ho Rehoboame, ba re: 4“Ntat'ao o ne a re imelitse ka mosebetsi. Ka baka lena, ak'u re imolle mosebetsi ona oo ntat'ao a ileng a re imetsa ka oona, 'me re tla u sebeletsa.”
5Rehoboame a re ho bona: “Mpheng sebaka sa matsatsi a mararo le nt'o tla ho 'na hape.” Eaba sechaba sea qhalana.
6Joale khosi Rehoboame a eletsana le banna-baholo bao e neng e le baeletsi ba Solomone, ntat'ae, ha a sa phela, a re ho bona: “Le nkeletsa hore ke arabe sechaba see joang?”
7Ba re ho eena: “Haeba u ka ba mosa ho sechaba sena, 'me ua se khahlisa, ua bua le sona hantle, e tla ba bahlanka ba hao kamehla eohle.”
8Rehoboame a se ke a mamela keletso ea banna-baholo, a eletsana le bahlankana bao a hōtseng le bona, ba neng ba mo sebeletsa.
9A re ho bona: “Le nkeletsa hore sechaba see ke se arabe joang, se itseng: ‘Ak'u re imolle mosebetsi oo ntat'ao a ileng a re imetsa ka oona’?”
10Bahlankana bana bao a hōtseng le bona ba mo araba, ba re: “Sechaba sena se itseng ho uena: ‘Ntat'ao o ne a re imelitse ka mosebetsi; uena ak'u re imolle,’ u tle u se arabe tjena, u re: ‘Monoana oa ka o monyenyane o motenya ho feta letheka la ntate. 11Ntate o ile a le imetsa ka mosebetsi; 'na ke tla le imetsa le ho feta. Ntate o ne a le shapa ka liphafa; 'na ke tla le shapa ka katse.’ ”
12Ka letsatsi la boraro, bo-Jeroboame le sechaba sohle ba fihla ho Rehoboame, joalokaha khosi e ne e itse: “Ka letsatsi la boraro le tle le tle ho 'na hape.” 13Khosi Rehoboame a araba sechaba ka ho se kharumela; a lahla keletso eo banna-baholo ba neng ba mo elelitse ka eona. 14A se araba ho latela keletso ea bahlankana, a re: “Ntate o ne a le imelitse ka mosebetsi; 'na ke tla le imetsa le ho feta. Ntate o ne a le shapa ka liphafa; 'na ke tla le shapa ka katse.” 15Khosi ea se ke ea mamela sechaba, hobane hona ho ne ho entsoe ke Molimo, e le hore polelo ea Morena e tle e phethahale, eo a neng a ile a e bolela ka molomo oa Ahiea ea tsoang Shilo, a e bua ho Jeroboame, mora oa Nebate.
16Ha sechaba sohle sa Iseraele se bona hore khosi ha e se mamele, sa e araba, sa re:
“Re amana ka life le Davida?
Mora oa Jese hase letho ho rōna!
Baiseraele, motho le motho
lapeng la hae!
Davida, sala le morabe oa heno!”
Eaba Baiseraele ba khutlela malapeng a bona. 17Empa Rehoboame a busa bana ba Iseraele ba neng ba ahile metseng ea Juda.
18Joale khosi Rehoboame a rōma Hadorame, eo e neng e le mookameli oa makhoba, hore a ee ho bana ba Iseraele, empa bona ba mo tlepetsa ka majoe, a ba a shoa. Ka baka leo, khosi Rehoboame a palama kariki ea hae ea ntoa ka potlako, a balehela Jerusalema. 19Ho tloha mohlang oo, ho fihlela kajeno-ea-bokajeno, eaba Baiseraele ba fetohetse lelapa la Davida.
