Mofumahali oa Sheba o etela Solomone
1Ha mofumahali oa Sheba a utloa botumo ba Solomone, a tla Jerusalema ho nonya Solomone ka lipotso tse thata. O ne a e-na le phiphitha ea balateli; ho e-na le likamele tse belesitsoeng linōko, le khauta e ngata, le mahakoe a bohlokoa. Ha a fihla ho Solomone a 'motsa lipotso tsohle tseo a neng a e-na le tsona. 2Solomone a araba lipotso tsohle tsa hae, ha se ke ha e-ba letho le mo thatafallang. 3Ha mofumahali oa Sheba a se a bone bohlale ba Solomone, a bone le ntlo eo a e hahileng, 4le lijo tseo a li jang, le moo matona a hae a lulang teng, le moo basebeletsi ba hae ba emang teng, le liaparo tsa bona, le baqhatsetsi ba hae, le liaparo tsa bona, le linyehelo tsa secheso ka Tempeleng ea Morena, a khathala matla.
5Eaba mofumahali oa Sheba o re: “Ruri seo ke ileng ka se utloa ha ke le naheng ea ka, malebana le liketso tsa hao, le bohlale ba hao, ke 'nete! 6Ke ne ke sa kholoe, ho fihlela ke e-tla mona, ke ipontša ka mahlo a ka. Ruri ba mpoleletse linyane feela tsa boholo ba bohlale ba hao, hobane uena u feta botumo boo ke bo boleletsoeng. 7Batho ba hao baa ithaba; bahlanka bana ba hao, ba u sebeletsang kamehla, ba utloang bohlale ba hao, le bona baa ithaba. 8Ho bokoe Morena Molimo oa hao, ea khahliloeng ke uena, 'me a u bea teroneng, hore u buse ka lebitso la Morena Molimo oa hao. Kahobane Molimo oa hao o ratile Baiseraele, 'me o ratile hore ba tsitse kamehla eohle, o u entse khosi ea bona, hore u ba ahlōlele hantle, ka toka.”
9Eaba o nea khosi khauta eo boima ba eona bo fetang likilo tse likete tse 'ne, le linōko tse ngata, le mahakoe a bohlokoa. Ha hoa ka ha hlola ho e-ba le linōko tse kang tseo mofumahali oa Sheba a neng a li fe Solomone.
10Bahlanka ba Hurame le bahlanka ba Solomone ba neng ba ile ba tlisa khauta e tsoang Ofire, ba tlisa le thepa e ngata ea lifate tsa alemaka le mahakoe a bohlokoa. 11Ka lifate tsena tsa alemaka khosi ea etsa mehato e nyolohelang ka Tempeleng ea Morena, le ka tlung ea khosi; ea etsa le liharepa le likatara tsa libini. Naheng eohle ea Juda ho ne ho e-s'o ka ho bonoa tse joalo.
12Khosi Solomone a fa mofumahali oa Sheba tsohle tseo a neng a li lakatsa, le tsohle tseo a ileng a li kōpa. A mo fa limpho tse fetang tseo mofumahali a ileng a mo tlisetsa tsona. Eaba mofumahali oa Sheba o khutlela naheng ea hae, a e-na le bahlanka ba hae.
Matlotlo a khosi Solomone
13Ka selemo se seng le se seng khosi Solomone a fumana khauta e ka etsang likilo tse likete tse mashome a mabeli a metso e meraro, 14ntle ho eo a na e fumana ka lekhetho le lefisoang bahoebi le barekisi. Likhosi tsohle tsa Arabia, le babusi ba litereke, le bona ba tlisetsa Solomone khauta le silefera.
15Khosi Solomone a etsa lithèbè tse makholo a mabeli ka khauta e thutsoeng, 'me thèbè e 'ngoe le e 'ngoe ea etsoa ka khauta e etsang boima ba likilo tse supileng. 16A boela a etsa lithejana tse makholo a mararo ka khauta e thutsoeng, 'me thejana e 'ngoe le e 'ngoe ea etsoa ka khauta e etsang boima ba likilo tse tharo. Eaba khosi e li bea ka tlung e bitsoang Moru oa Lebanone.
17Hape khosi ea etsa terone e kholo, e entsoeng ka manaka a tlou, 'me ea e maneha khauta e hloekisitsoeng. 18Terone ena e ne e e-na le mehato e tšeletseng, e bile e e-na le seluloana sa maoto se entsoeng ka khauta; tsena li ne li bōpeletsoe teroneng. Ka lehlakoreng le leng le le leng la seluloana ho ne ho e-na le letsoho la ho itšetleha, 'me pel'a matsoho ao ho e-na le litšoantšo tsa litau tse peli. 19Ka lehlakoreng le leng le le leng la mehato ena e tšeletseng, ho ne ho e-na le setšoantšo sa tau, kaofela e le litšoantšo tsa litau tse leshome le metso e 'meli. Ho ne ho e-s'o be 'muso le o mong o kileng oa e-ba le terone e tjena.
20Linoelo tsohle tsa khosi li ne li entsoe ka khauta, le thepa eohle ea ntlo ea Moru oa Lebanone e ne e entsoe ka khauta e hloekisitsoeng. Ho ne ho se tse entsoeng ka silefera, hobane mehleng ea Solomone silefera e ne e sa talingoe e le letho. 21Likepe tsa khosi li ne li e-ea Tarashishe, li khannoa ke bahlanka ba Hurame. Hanngoe kamora' lilemo tse tharo, sehlopha sa likepe tsena tsa Tarashishe, se ne se ee se tle, se tlise khauta, le silefera, le manaka a litlou, le likhabō, le lipikoko. 22Ka mokhoa ona, khosi Solomone a feta likhosi tsohle tsa lefatše ka matlotlo le ka bohlale.
23Likhosi tsohle tsa lefatše tsa tla ho Solomone, ho tla utloa bohlale ba hae, boo Molimo a mo fileng bona. 24Motho ka mong a mo tlisetsa limpho tsa hae, lintho tse entsoeng ka silefera, le ka khauta, le liaparo, le lihlomo, le linōko, le lipere, le limmeile. Hona ho ne ho etsahala ka selemo le selemo.
Solomone o hoèba ka lipere le ka likariki
25Solomone o ne a e-na le litala tse likete tse 'ne tsa lipere le tsa likariki tsa ntoa, le bahlabani ba palamang ba likete tse leshome le metso e 'meli, bao a ileng a ba bea metseng ea likariki tsa ntoa, le Jerusalema, ho khosi. 26A busa likhosi tsohle, ho tloha nōkeng ea Euferatese ho ea fihla naheng ea Bafilesita le meeling ea Egepeta. 27Khosi ea etsa hore motseng oa Jerusalema silefera e be ngata joaloka majoe, le lifate tsa likedare li be ngata joaloka lifate tsa monōkōtšoai tse liphuleng. 28Ba tlisetsa Solomone lipere tse tsoang Egepeta le linaheng tsohle.
Lefu la Solomone
29Liketso tsohle tsa Solomone, ho tloha qalong ho isa qetellong, li ngotsoe Bukeng ea Moporofeta Nathane, le Bukeng ea Moporofeta Ahiea ea tsoang Shilo, le Bukeng ea Lipono tsa Moporofeta Ido e buang ka Jeroboame, mora oa Nebate. 30Solomone a busa naha eohle ea Iseraele ka lilemo tse mashome a mane, a le Jerusalema. 31Solomone a shoa, a epeloa Motseng oa Davida, ntat'ae, 'me Rehoboame, mora oa hae, a mo hlahlama.
