2 LIKETSAHALO 11

₁Ha Rehoboame a fihla Jerusalema, a khōbōkanya banna bohle ba morabe oa Juda le ba morabe oa Benjamine; e le mokhetho oa bahlabani ba likete tse lekholo le mashome a robeli. Ba ne ba il'o loantša Baiseraele hore ba hape 'muso, ba o khutlisetse ho eena. ₂Empa lentsoe la Morena la fihla ho Shemaea, moporofeta oa Molimo, la re: ₃“Bolella Rehoboame, mora oa Solomone, khosi ea Juda, le Baiseraele bohle ba naheng ea Juda le ea Benjamine, u re: ₄‘Morena o bua tjena: Le se ke la nyoloha ho ea loantša bana babo lōna; motho ka mong a khutlele ha hae hobane hona ho entsoe ke 'na.’ ” Eaba ba mamela lentsoe la Morena, 'me ba khutla, ba se ke ba futuhela Jeroboame.

₅Rehoboame a aha Jerusalema, 'me a haheletsa metse naheng ea Juda, ₆e leng Betlelehema, le Etame, le Tekōoa, ₇le Bete-Sure, le Sōkō, le Adulame, ₈le Gate, le Maresha, le Sife, ₉le Adoraime, le Lakishe, le Aseka, ₁₀le Sora, le Aiealone, le Heborone. Metse ena ke eona e neng e hahelelitsoe naheng ea Juda le naheng ea Benjamine. ₁₁A haheletsa metse ena, a bea balaoli ho eona, a ba fa lijo, le ole ea mohloaare, le veine. ₁₂Motse o mong le o mong a o hlomella ka lithèbè le ka marumo, a o matlafatsa haholo. Ba morabe oa Juda le oa Benjamine ba ba tlas'a puso ea hae.

₁₃Baprista le Balevi ba neng ba le naheng eohle ea Iseraele, ba tloha libakeng tsohle tsa bona, ba fallela ho Rehoboame. ₁₄Balevi ba siea libaka tsa bona le maruo a bona, ba fallela naheng ea Juda le Jerusalema, hobane bo-Jeroboame le bara ba hae ba ne ba ba hanela ho etsetsa Morena litšebeletso tsa bona tsa boprista. ₁₅Jeroboame a itlhomamisetsa baprista ba libaka tseo ho rapelloang melimo ea bohata ho tsona, le ba sebeletsang melingoana ea liphooko, le ba sebeletsang manamane ao a a bōpileng. ₁₆Bohle ba merabe ea Iseraele, ba neng ba rata Morena Molimo oa Iseraele, ba sala Balevi bao morao, ba tla Jerusalema, ho tla etsetsa Morena Molimo oa bo-ntat'a bona mahlabelo. ₁₇Ka lilemo tse tharo ba matlafatsa 'muso oa Juda, ba tšehetsa le Rehoboame, mora oa Solomone. Ka lilemo tseo tse tharo ba tsamaea mehlaleng ea Davida le Solomone.

₁₈Rehoboame a nyala Mahalate, morali oa Jerimote, mora oa Davida eo 'm'ae e neng e le Abihaele, morali oa Eleabe, mora oa Jese, ₁₉'me eo a mo tsoalla bana, e leng Jeushe, le Shamariea, le Sahame. ₂₀A boela a nyala Maaka, morali oa Abosalome, ea ileng a mo tsoalla Abiea, le Atai, le Sisa, le Shelomite. ₂₁Rehoboame o ne a rata Maaka, morali oa Abosalome, ho feta basali bohle ba hae, le basali ba hae ba mafielo. O ne a nyetse basali ba leshome le metso e robeli, le basali ba mafielo ba mashome a tšeletseng. A tsoala bara ba mashome a mabeli a metso e robeli, le barali ba mashome a tšeletseng.

₂₂Rehoboame a khetha Abiea, mora oa Maaka, hore e be eena hlooho ea lelapa, le 'musi oa bana babo, hobane o ne a rata ho mo etsa khosi. ₂₃A sebetsa ka bohlale, bara ba hae bohle a ba ntša motse, a ba bea literekeng tsohle tsa naha ea Juda le ea Benjamine, motseng o mong le o mong o hahelelitsoeng. A ba nea lijo tse ngata, a ba a ba nyalisa le basali ba bangata.