Petrose le Johanne kapele ho lekhotla
1Ha Petrose le Johanne ba sa ntse ba buisana le batho, baprista, le molaoli oa Tempele, le Basaduke, ba fihla ho bona. 2Ba ne ba tšoenyehile hobane baapostola bao ba ne ba ruta batho le ho phatlalatsa hore tsōho ea bafu e teng ka Jesu. 3Ba ba tšoara, 'me kaha e ne e se e le mantsiboea, ba ba hlahlela chankaneng ho fihlela ka la hosasane. 4Empa ba bangata ba utloileng lentsoe la Molimo ba lumela, 'me palo ea batho bao e ne e ka ba likete tse hlano.
5Ka la hosasane babusi, le baholo ba Bajuda, le Litsebi tsa bona tsa Molao, ba phuthehela Jerusalema, 6ba e-na le Moprista e Moholo, Hannase, le Kaiafa, le Johanne, le Alekesandere, le bohle ba lelōko la boprista bo boholo. 7Eare hoba ba emise baapostola kapele ho lekhotla, ba ba botsa, ba re: “Hoo le ho entse ka matla afe, kapa ka lebitso lefe?”
8Joale Petrose, a tletse Moea o Halalelang, a ba araba, a re: “Babusi ba sechaba le baholo, 9erekaha kajeno re botsisisoa holim'a ketso e molemo e etselitsoeng monna ea holofetseng, hore na o folisitsoe ka'ng, 10ho ke ho tsejoe ke lōna bohle, le ke sechaba sohle sa Iseraele, hore ke ka lebitso la Jesu Kreste oa Nasaretha, eo lōna le mo thakhisitseng, eo Molimo a mo tsositseng bafung. Ke ka lebitso lena monna enoa a emeng kapele ho lōna, a folile. 11Jesu ke eena eo e leng
“ ‘lejoe le lahliloeng ke lōna, lihahi,
le fetohileng lejoe la mantlha’.
12“Ha ho e mong ea pholosang ntle ho eena, hobane ha ho na lebitso le leng lesele tlas'a letsatsi, le neiloeng batho, leo re tšoanelang ho pholosoa ka lona.”
13Eare ha ba bona sebete sa Petrose le Johanne, ba lemoha le hore ha baa ruteha, ke batho feela, ba makala. Ba ba ba tseba hore ke ba bileng le Jesu. 14Ha ba bona monna ea folisitsoeng a eme le bona, ba hloka seo ba ka se hanyetsang. 15Ha ba se ba ba laetse ho tsoela kantle ho lekhotla, ba buisana, 16ba re: “Banna baa re tla ba etsa joang? Baahi bohle ba Jerusalema ba tseba hore mohlolo o tumileng o entsoe ke bona, 'me re ke ke ra o latola. 17Empa hore taba ena e tl'e se k'a hasana haholo har'a sechaba, a re ba hlokomeliseng ka litšokelo, hore ba se hlole ba bua le motho le ea mong ka lebitso lena.”
18Eaba baa ba bitsa, 'me ba ba laela hore ho hang ba se hlole ba bua kapa ba ruta ka lebitso la Jesu. 19Empa Petrose le Johanne ba ba araba, ba re: “Ahlōlang e le lōna hore na ho nepahetse mahlong a Molimo ho mamela lōna, ho e-na le ho mamela Molimo. 20Rōna ha re ka ke ra phetsa ho bua ka tseo re li boneng le tseo re li utloileng.”
21Eare hoba ba eketse ho ba hlokomelisa ka litšokelo, ba ba lokolla. Ka baka la sechaba ba hloka seo ba ka ba ahlōlelang sona, hobane sechaba sohle se ne se tlotlisa Molimo ka se etsahetseng. 22Lilemo tsa monna eo mohlolo ona oa pholiso o neng o entsoe ho eena, li ne li feta mashome a mane.
Balumeli ba rapella ho ba sebete
23Ha Petrose le Johanne ba se ba lokolotsoe, ba ea ho ba sehlopha sa bona, ba se tsebisa tsohle tseo baprista ba baholo, le baholo ba sechaba ba li buileng ho bona. 24Eare hoba ba utloe, ba phahamisetsa mantsoe ho Molimo ka maikutlo a le mang, ba re: “Monghali, uena ea entseng leholimo, le lefatše, le leoatle, le lintho tsohle tse ho tsona; 25u ne u bue ka Moea o Halalelang, ka molomo oa mohlanka oa hao Davida, ntat'a rōna, ua re:
“ ‘Moferefere ke oa eng
har'a lichaba?
Machaba a rerela'ng
ntho tsa mafeela?
26Likhosi tsa lefatše li eme ka maoto,
le babusi ba kopane hammoho
ho loantša Morena
le Motlotsuoa oa hae.’
27“Ruri, motseng ona, Heroda le Pontiuse Pilato, le balichaba, le merabe ea Iseraele, ba kopane ho loantša Jesu, mohlanka oa hao ea halalelang, eo u mo tlotsitseng, 28ho etsa hore tsohle tseo u li laotseng e sa le pele, ka matla a hao le thato ea hao, li phethahale. 29Joale, Morena, ak'u talime litšokelo tsa bona, 'me u etse hore bahlanka ba hao ba bolele lentsoe la hao ka sebete. 30Otlolla letsoho la hao ho folisa, 'me mehlolo le limakatso li etsoe ka lebitso la Jesu, mohlanka oa hao ea halalelang.”
31Ha ba qetile ho rapela, sebaka seo ba neng ba kopanetse ho sona sa reketla, 'me bohle ba tlala Moea o Halalelang, ba bolela lentsoe la Molimo ka sebete.
Kopanelo ea maruo
32Joale bongata ba ba lumetseng ba e-ba pelonngoe le moeamong, 'me ha se ke ha e-ba le ea mong ea reng tseo a nang le tsona ke tsa hae a le inotši, empa tsohle ba li kopanela. 33Baapostola ba paka tsa tsōho ea Morena Jesu ka matla a maholo, 'me bohle ba thahaselloa haholo. 34Ha se ke ha e-ba le ea hlokang, hobane bohle ba neng ba e-na le masimo kapa matlo ba ne ba a rekisa, ba tlise chelete ea tse rekisitsoeng, 35ba e bee maotong a baapostola, ebe e abeloa e mong le e mong ho ea kamoo a hlokang kateng.
36Josefa, eo baapostola ba neng ba 'mitsa Baranabase, e leng ho re Tšeliso, Molevi ea tsoaletsoeng Sipera, 37o ne a e-na le tšimo; a e rekisa, a tlisa chelete, a e bea maotong a baapostola.
