Pholiso ea monna oa seritsa khorong ea Tempele
1Petrose le Johanne ba nyolohela Tempeleng ho ea thapelong ea hora ea boraro, motšeare oa mantsiboea. 2Monna e mong ea tsoetsoeng e le seritsa, o ne a ee a nkoe ka matsatsi 'ohle, a beoe khorong ea Tempele e bitsoang Khoro e Ntle, hore a kōpe lithuso ho ba kenang ka Tempeleng. 3Ha a bona Petrose le Johanne, ba le lekhatheng la ho kena ka Tempeleng, a kōpa lithuso. 4Empa Petrose, a e-na le Johanne, a mo talimisisa, a re: “Re shebe!” 5Eaba oa ba sheba, a lebeletse ho fumana ho hong ho bona.
6Joale Petrose a re: “Ha ke na silefera kapa khauta, empa seo ke nang le sona ke u fa sona. Ka lebitso la Jesu Kreste oa Nasaretha ema, u tsamaee!” 7A mo tšoara ka letsoho le letona, a mo emisa; maoto a hae le maqaqailana a tiea hang-hang. 8A raoha, a ema, a tsamaea, 'me a kena le bona ka Tempeleng a ntse a tsamaea, a tlōlaka, a rorisa Molimo. 9Batho bohle ba 'mona a tsamaea, a nts'a rorisa Molimo. 10Ba tseba hore ke eena ea neng a lula khorong ea Tempele, e bitsoang Khoro e Ntle, a kōpa lithuso; ba makala haholo, 'me ba hlolloa ke se etsahetseng ho eena.
Puo ea Petrose mathuleng a Solomone
11Ha monna eo a ntse a itšoareletse ka Petrose le Johanne, batho bohle ba mathela ho bona mathuleng a bitsoang a Solomone, ba maketse haholo. 12Petrose ha a bona hoo, a re ho bona: “Banna ba Iseraele, ke'ng ha le makalla taba ee? Le re talimela'ng joalokaha eka ke ka matla a rōna, kapa ka borapeli ba rōna, re entseng hore monna eo a tsamaee? 13Molimo oa Aborahama, le oa Isaka, le oa Jakobo, Molimo oa bo-ntat'a rōna, o tlotlisitse mohlanka oa hae, Jesu, eo lōna le neelaneng ka eena, la mo hana kapele ho Pilato, ha eena a ne a rerile ho mo lōkōlla. 14Empa lōna le hanne Ea Halalelang, Ea Lokileng, la kōpa hore le lokolleloe monna oa 'molai. 15Le bolaile Mohloli oa bophelo, eo Molimo a mo tsositseng bafung, 'me rōna re lipaki. 16Ka ho lumela lebitsong la Jesu, lebitso leo le matlafalitse monna enoa, eo le 'monang, le mo tsebang, 'me tumelo e tsoang ho Jesu ea mo folisa pontšeng ea lōna bohle.
17“Joale, bana beso, kea tseba hore lōna, joaloka babusi ba lōna, le entse hona ka baka la ho hloka tsebo. 18Empa tseo Molimo a li boletseng e sa le pele, ka melomo ea baporofeta bohle, hore Mesia oa hae o tla hlōkōfatsoa, o li phethahalitse ka oona mokhoa ona. 19Ka baka leo, bakang, le sokolohe, libe tsa lōna li tle li hlakoloe, 20hore ho tle ho tle linako tsa khatholoho, tse tsoang ho Morena, 'me a tle a rōme Jesu, eo a le khethetseng eena e sa le pele ho ba Mesia. 21Ke eena eo leholimo le tšoanetseng ho mo amohela ho fihlela mehla ea ha ho busetsoa lintho tsohle malulong, mehla eo Molimo a buileng ka eona ka melomo ea baporofeta ba hae ba halalelang, ho tloha mehleng ea boholo-holo. 22Moshe a na a re: ‘Har'a bana babo lōna, Morena, Molimo oa lōna, o tla le hlahisetsa Moporofeta ea kang 'na. Le tle le mo mamele linthong tsohle tseo a tla li bua ho lōna. 23Mang le mang ea sa tl'o mamela Moporofeta eo, o tla timetsoa ho hang sechabeng.’
24“Le baporofeta bohle, ho qala ka Samuele le ba mo hlahlamileng, bohle ba buileng, le bona ba boletse matsatsi ana. 25Lōna le bana ba baporofeta le majalefa a selekane seo Molimo a neng a se etse le bo-ntat'a rōna, ha a re ho Aborahama: ‘Lichaba tsohle tsa lefatše li tla hlohonolofala ka litlōhōlō tsa hao.’ 26Molimo o hlahisitse mohlanka oa hae, a mo rōma ho lōna pele, ho hlohonolofatsa e mong le e mong oa lōna, ha a sokoloha bobeng ba hae.”
