Ananiase le Safira
1Monna e mong ea bitsoang Ananiase, le mosali oa hae Safira, ba rekisa tšimo. 2Ka tumellano le mosali oa hae a itšiela karolo ea chelete ea thekiso, 'me a isa e 'ngoe, a e bea maotong a baapostola.
3Eaba Petrose o re: “Ananiase, ke ka baka la'ng Satane a keneng pelong ea hao hore u thetse Moea o Halalelang, 'me u itšiele karolo ea chelete ea thekiso ea tšimo? 4Ha e e-s'o rekisoe, na e ne e se ea hao na? Ha e se e rekisitsoe, na chelete e ne e se matleng a hao na? Ke ka baka la'ng u ileng ua rera ka pelong ea hao ho etsa ketso ee? Ha ua thetsa batho, empa u thetsitse Molimo.”
5Eare ha Ananiase a utloa mantsoe ana, a re fatše sihla! eaba oa shoa. Bohle ba utloileng ba tleloa ke tšabo. 6Bahlankana ba ema, ba mo phutha, ba mo nkela kantle, ba mo epela.
7Ha feta lihora tse ka bang tharo, mosali oa hae a kena, a sa tsebe se etsahetseng. 8Petrose a re ho eena: “Ak'u mpolelle, na le fela le rekisitse tšimo hakaalo?”
Eena a re: “E, hakaalo.”
9Petrose a re ho eena: “Ke ka baka la'ng le lumellaneng ho leka Moea oa Morena? Utloa liqi tsa ba tsoa epela monna oa hao li monyako; le uena ba tla u nkela kantle.”
10Hang-hang mosali a oela maotong a hae, a shoa. Bahlankana ha ba kena ba fumana a shoele; ba mo nkela kantle, ba ea mo epela pel'a monna oa hae. 11Kereke eohle le bohle ba utloileng tsena ba tšoha haholo.
Baapostola ba etsa mehlolo le limakatso tse ngata
12Ka matsoho a baapostola ha etsoa mehlolo le limakatso tse ngata har'a sechaba. Balumeli bohle ba phuthehela lethuleng la Solomone ba le maikutlo a le mang. 13Empa ha e le ho ba bang, ho ne ho se le ea mong ea betang pelo ho ikopanya le bona, leha sechaba se ne se ba rorisa. 14Leha ho le joalo, ba lumelang ho Morena ba 'na ba eketseha, e le palo e kholo ea banna le basali. 15Batho ba ne ba tlisa bakuli litseleng, ba ba beile libetheng, le liphateng, e le hore ha Petrose a feta, seriti sa hae bonyane se mpe se sire ba bang ba bona. 16Le bongata bo tsoang metseng e kathōkō ho Jerusalema ba khōbōkana, ba tlisa bakuli le ba tšoenngoang ke meea e litšila, 'me bohle ba folisoa.
Baapostola baa hlorisoa
17Moprista e Moholo le ba nang le eena, ba mokha oa Basaduke, ba ema lepaketla, ba tlala mohōnō, 18ba tšoara baapostola, ba ba hlahlela chankaneng ea sechaba. 19Empa bosiu lengeloi la Morena la bula menyako ea chankana, la ba ntša, la re: 20“E-eang, le eme ka Tempeleng, 'me le bolelle sechaba litaba tsohle tsa bophelo bona.”
21Ha ba utloile, ba kena ka Tempeleng e sa le hoseng, 'me ba ruta.
Ha Moprista e Moholo le ba nang le eena ba fihla, ba bitsa lekhotla le baholo bohle ba bana ba Iseraele, 'me ha rōmeloa chankaneng hore ho e'o latoa baapostola. 22Empa bahlanka ha ba fihla, ba fumana ba le sieo ka chankaneng. Ha ba khutlile ba bolela, 23ba re: “Re fumane chankana e ntse e koetsoe ka thata, le balebeli ba eme menyako, empa ha re bula ra fumana ho se motho kahare.” 24Ha molaoli oa Tempele, le baprista ba baholo, ba utloa mantsoe ana, ba ipotsa hore na ntho ena ea baapostola e tla fella kae.
25Eaba e mong o fihla a re ho bona: “Helang! Banna bao le neng le ba kentse chankaneng ba eme ka Tempeleng, ba ruta sechaba.” 26Eaba molaoli o ea le bahlanka, 'me ba ba tlisa, feela e se ka likhōka, hobane ba ne ba tšaba sechaba, esere sa ba tlepetsa ka majoe.
27Ha ba ba tlisitse, ba ba emisa ka khotla, 'me Moprista e Moholo a ba botsa, 28a re: “Re le laetse ka thata hore le se ke la ruta ka lebitso lena, empa bonang, le tlatsitse thuto ea lōna Jerusalema, 'me le batla ho re jarisa molato oa ho bolaea motho eo!”
29Eaba Petrose le baapostola baa araba, ba re: “Eka khona ho mameloe Molimo ho e-na le batho. 30Molimo oa bo-ntat'a rōna o tsositse Jesu bafung, eo le 'molaileng ka ho mo thakhisa sefapanong. 31Monna enoa Molimo o mo phahamisitse ka letsoho la hae le letona hore e be 'Musi le Mopholosi, ea tla nea Iseraele pako le tšoarelo ea libe. 32Rōna le Moea o Halalelang, oo Molimo a o neileng ba mo mamelang, re lipaki tsa litaba tsena.”
33Ha lekhotla le utloa, la hlabeha haholo, 'me la rera ho ba bolaea. 34Empa Mofarisi e mong ea bitsoang Gamaleele, eo e neng e le moruti oa Molao, ea hlonepshoang ke sechaba sohle, a ema har'a lekhotla, a laela hore banna bao ba ntšetsoe kantle ho se hokae. 35A nt'o re ho lekhotla: “Banna ba Iseraele, hlokomelang seo le hopotseng ho se etsa ho banna bana. 36Pele ho matsatsi ana ho ile ha hlaha Theudase ea neng a re eena ka mang-mang. Palo ea banna ba mo latelang e ne e ka ba makholo a mane. A bolaoa, 'me bohle ba neng ba lumetse ho eena ba qhalana, ba fetoha lefeela. 37Kamorao ho mona ha hlaha Judase, Mogalelea, mehleng ea ha ho ne ho baloa batho, 'me a khelosa batho, ba mo latela. Le eena monna eo a timela, 'me bohle ba neng ba lumetse ho eena ba qhalana. 38Joale ke re ho lōna: Khaohanang le banna bana, le ba lese. Hobane, haeba morero ona kapa mosebetsi ona ke oa batho, o tla senyeha, 39empa haeba ke oa Molimo, ha le ka ke la ba felisa, esere la fumanoa le le ba loantšang Molimo.” Eaba baa mo mamela.
40Hoba ba bitse baapostola, ba ba shapa, ba ba laea hore ba se hlole ba bua ka lebitso la Jesu, ba nt'o ba lokolla.
41Ha e le baapostola, ba tloha khotla ba nyakaletse, hobane ba fumanoe ba lokeloa ke ho tlontlolloa ka baka la lebitso la Jesu. 42Ka tsatsi le leng le le leng ha baa ka ba phetsa ho ruta le ho khothatsa ka Jesu Kreste, ka Tempeleng, le ka malapeng ka bonngoe.
