JOBO 5

₁Howa jwale! Na e mong o teng ya tla o arabela na? Ke ofe wa bahalaledi eo o tla retelehela ho yena? ₂Athe bohale bo bolaya lehlanya, mme lewatla le bolawa ke mona. ₃Nna ke bone lewatla ha le medile metso, empa hang ka tshwanela ho neela ntlo ya lona thohako; ₄bana ba lona ha ba sa na boiketlo, ba hatakelwa dikgorong, ho se ya ba namolelang. ₅Ya lapileng o ya ja kotulo ya lona, o ya nka le hara meutlwa, mme leshodu le hlwibila menono ya lona.

₆Efela kotsi ha e tswe fatshe, mme mahlomola ha a hlomele mobung; ₇motho o tswaletswe maswabi, jwaloka hlase ho qhoma.

₈Hola e le nna, nka be ke ikatametsa ho Modimo, ka beela Modimo taba ya ka; ₉e leng wona o etsang dintho tse kgolo, tse sa fihlelweng, dintho tse makatsang, tse sa balweng. ₁₀O tshollela pula lefatsheng, o mathisa metsi masimong; ₁₁o dudisa batho ba kokobetseng nqalong tse diphahameng, ba llang ba phahamisetswa katlehong. ₁₂O etsa merero ya batho ba mano lefeela, hore matsoho a bona a se ke a e phetha. ₁₃O tshwasa diqweleqwele manong a tsona, mme morero wa ba lonya o a o heletsa. ₁₄Hosasa, ba thulana le lefifi, motshehare ba phopholetsa jwaloka hoja ke bosiu. ₁₅Ya madimabe o mo lokolla jwalo lerumong la melomo ya bona le letsohong la ya matla; ₁₆tshepo e teng ho ya fokotseng, mme ba sa lokang ba thijwa molomo.

₁₇Bona, ho lehlohonolo motho eo Modimo o mo layang! Ha ho le jwalo, o se ke wa nyatsa kotlo ya Ya matla wohle; ₁₈hobane o a hlaba, mme a tlamelle leqeba; o a roba, mme matsoho a hae a fodise. ₁₉O tla o lokolla ditsietsing tse tsheletseng, mme ho tse supileng ha ho bobe bo ka o amang. ₂₀Tlaleng o ya o boloka, o se ke wa shwa, ntweng a o pholose bohaleng ba lerumo. ₂₁O tla sireletswa ha ho shapa leleme, ha o ka ke wa tshaba tshenyo ha e ka fihla. ₂₂O tla tsheha tshenyo le tlala, ha o ka ke wa tshaba dibatana tsa naha; ₂₃hobane o tla ba le selekane le majwe a naha, dibatana tsa naha di be le kgotso le wena. ₂₄Kahona o tla bona hoba tente ya hao e dutse ka kgotso, mme leha o ka lekola moaho wa hao, o ke ke wa hloka letho. ₂₅Hape, o tla bona lesika la hao ha le ngatafala, le ditloholo tsa hao ha di ata jwaloka jwang ba naha. ₂₆O tla orohela lebitleng la hao ka botsofadi bo botala, jwaloka ngata ya koro, ha e thothwa nakong ya teng.

₂₇Bona, ke tseo re di botsisitseng; di dutse jwalo; o di mamele, o di ele sedi.