JOBO 4

₁Yaba Elifase wa Themane o fetola, a re: ₂Ha re leka ho bua le wena na o tla utlwa bohloko? Empa ya ka itshwarang ke mang, hore a se ke a bua? ₃Bona, wa nna wa ruta batho ba bangata, wa tiisa matsoho a tepeletseng; ₄lentswe la hao le emisitse ba kgothometsehang, mme o tiisitse mangole a tetemang. ₅Jwale, wena, ha tsietsi e o hlahetse, o a fokola! Jwale, ha e o amile, o a thethelwa! ₆Borapedi ba hao na hase tshepo ya hao na? Na ha o itshepise ka ho hloka molato bophelong ba hao na? ₇Ako elellwe: motho ke ofe ya timetseng, ha a se na molato? Ho lahlehile kae batho ba lokileng? ₈Hoo ke ho boneng ke hoba ba lemileng bokgopo, ba jetseng bolotsana, bona ba kotula jona; ₉ba fediswa ke pudulo ya Modimo, ba timetswa ke phefumoloho ya kgalefo ya wona. ₁₀Ho fedile ho puruma ha tau le lentswe la lengau; meno a ditawana a kgorotswe; ₁₁tau e tiileng e timela ke ho hloka see a se rusollang, mme madinyane a tau e tshehadi a qhalantswe.

₁₂Empa lentswe le mphihletse sephiring, tsebe ya ka ya utlwa nyenyetso ya lona. ₁₃Yare nahanong ya ditaba le diponong tsa bosiu, ka nako eo boroko bo kgalang batho, ₁₄tshoho le thothomelo tsa nkwela hodimo, tshisimoho ya thekesedisa masapo a ka kaofela; ₁₅seriti sa feta pela sefahleho sa ka, mmeleng wa ka boya ba sosobana; ₁₆sa ema, empa ka sitwa ho lemoha sebopeho sa sona; se ne se le pela mahlo a ka; ha kgutsa, mme ka utlwa lentswe le reng: ₁₇Na ya shwang a ka loka pela Modimo na, kapa motho na o hlwekile pela Mmopi wa hae na? ₁₈Bona, esita le bahlanka ba wona ha o ba tshepe; o bona kodi le ho mangeloi a wona; ₁₉ho jwalo hakakang ho ba ahileng matlung a letsopa, ba hlahileng leroleng, ba ka rinngwang jwaloka ditshwele! ₂₀Ho nka hosasa ho fihlisa mantsiboya, ba thuhakanngwa, ba timela ka ho sa feleng, ba sa lemohuwe. ₂₁Bokgabane ba bona bo feta le bona; ba shwa, ba eso ho fihlele bohlale.