JOBO 6

₁Jobo a fetola, a re: ₂Hoja ho ka lekanngwa bohloko ba ka; hoja le bomadimabe ba ka le bona bo ne bo ka bewa sekaleng! ₃bo ne bo tla fetisa lehlabathe la lewatle ka boima; ke ka baka leo mantswe a ka a rwalletseng. ₄Metsu ya Ya matla wohle e ntlhabile, mme pelo ya ka e noswa mahloko a yona; matsoso a Modimo a hlopholohile ho ntwantsha. ₅Na pitsi e ka lla pela jwang? Kapa kgomo e ka bokolla pela furu ya yona? ₆Se tapileng a se ka jewa ha ho se na letswai? Na mothwebe o mosweu wa lehe a o na le ho utlwahala na? ₇Moya wa ka o hana ho di ama; ho nna ke dijo tse manyala.

₈Oho! Hola kopo ya ka e be e ka etsahala, mme Modimo wa nnea se lebeletsweng ke nna! ₉Hola Modimo o ka dumela ho nthubakanya, wa otlolla letsoho la wona, wa mpolaya. ₁₀E ne e tla ba tshediso ho nna; e, ke ne ke tla thaba bohlokong bona bo tshabehang; hobane ha ke a ka ka tlola ditaelo tsa Ya halalelang! ₁₁Matla a ka keng hore ke be le tshepo? Tshepo ya ka keng hore ke tle ke mamelle? ₁₂Na matla a ka ke matla a lejwe na? Mmele wa ka a ke koporo na? ₁₃Ha ke re, ha ho kamoo nka thuswang kateng? Ha ke re, topollo yohle e hole le nna?

₁₄Motswalle wa ya swabileng e ka kgona a mmontshe lerato; ha ho se jwalo a ka tshoha a lesa ho tshaba Ya matla wohle. ₁₅Banabeso ba tletse thetso jwaloka phororo, jwaloka metsi a molatswana a nyamellang; ₁₆a ba maduke ke leqhwa, mme lehlwa le itihela teng. ₁₇A timela mohla ho futhumetseng, a monyela ha letsatsi le tjhesa. ₁₈Metjha ya ho matha ha wona e a dikadika; a fetoha mowane, a fela. ₁₉Makaba a Thema a a batla, dihlopha tsa baeti ba Seba di bea tshepo ya tsona teng. ₂₀Ba hlajwa ke dihlong tshepong ya bona; ha ba fihla teng, ba swaba. ₂₁Ho dutse jwalo le lona, ha le letho; le bona bomadimabe ba ka, mme le a tshoha. ₂₂Hleka ke itse: Mpheng? kapa: Mphomosetseng ka ntho ya monono wa lona, ₂₃le be le nnamolele letsohong la sera, le ntopolle letsohong la batubi na?

₂₄Nthuteng, ke tla kgutsa; le ntlhalosetse moo ke fositseng teng. ₂₅Puo tsa nnete di matla hakakang! Empa dikgalemelo tsa lona di kgalemela eng na? ₂₆Na a ke dipolelo tsa ka tseo le ratang ho di kgalemela na? Na ditaba tsa ya tsherehaneng, na ke moya feela o yang le tsona na? ₂₇Le mpa le le ba ka akgelang letlowa hodima kgutsana, le ho rekisa ka motswalle wa lona. ₂₈Jwale, le mpeng le ntadime, mme mahlo a lona a tla bona ha ke le leshano. ₂₉Kgutlang hle! ho sa lokang ho be siyo! Kgutlang, taba ya ka e sa lokile le jwale. ₃₀Hleka le re, ho sa lokang ho teng lelemeng la ka, kapa na mahalapa a ka ha a tsebe ho kgetha bokgopo na?