JOBO 3

₁Kamora tseo, Jobo a ahlamisa molomo wa hae, a rohaka letsatsi leo a tswetsweng ka lona. ₂Jobo a bua, a re: ₃Ho timele letsatsi leo ke tswetsweng ka lona, le bosiu boo ho itsweng: Ngwana e motona o emotswe. ₄Tsatsi leo le fetohe lefifi, mme Modimo o se ke wa le hlokomela o le hodimo! lesedi le se ke la hlola le le kganyetsa. ₅A le patwe ke botsho le ke moriti wa lefu, leru le ke le le kwahele, mme le ke le tshabiswe ke se fifatsang letsatsi. ₆Bosiu boo bo ke bo tshwarwe ke lefifi, bo se ke ba thaba hara matsatsi a ngwaha, bo se ke ba balwa palong ya ditshiu tsa dikgwedi. ₇Bosiu boo a bo nyope, nyakallo e hlokahale ho jona! ₈A bo rohakwe ke ba rohakang ditshiu, ba nang le boqweleqwele ba ho tsosa leviathane! ₉A dinaledi tsa mafube a jona di fifale! A bo hlolohelwe lesedi, mme le se ke la hlaha, bo se ke ba bona dintshi tsa mafube a meso! ₁₀Hobane ha bo a ka ba kwala popelo eo ke tswileng ho yona, ha bo a ka ba pata ho hlomoha mahlong a ka!

₁₁Ke ne ke sa shwe keng mpeng ya mme, kapa ke ne ke sa timele keng ke sa tswa popelong? ₁₂Mangole a mme a ne a mphare keng? mme matswele a hae a nkanyeseditseng na? ₁₃Hobane jwale, nka be ke rapaletse ke ikgutseditse, nka be ke robetse, mme ka phomola le nna, ₁₄le marena le ba baholo ba lefatshe, ba ikgahetseng mabitla; ₁₅kapa le mahosana a neng a ruile dikgauta, a tlatsitse matlo a wona ka disilefera; ₁₆mohlomong ka ba siyo jwaloka sefolotsana se epetsweng, kapa jwaloka bana ba sa kang ba bona lesedi. ₁₇Teng, ba babe ba lesa ho ferekanya, teng ho phomola ba kgathetseng; ₁₈ba holehilweng ba dula ka kgotso, ha ba sa utlwa lentswe la motubi. ₁₉Teng, ba banyenyane le ba baholo ba lekana, mme mofo o lokolohile ho monghadi wa hae.

₂₀Ya madimabe o neelwang lesedi, ya hlomohileng pelo o neelwang bophelo, ₂₁e le ba lebeletseng lefu, mme ha le fihle, ba le tjheba ba le lakatsa ho fetisa letlotlo le patilweng, ₂₂ba thaba ka thabo e fetisisang, ba be ba nyakalle, ha ba fumana lebitla? ₂₃Ho tswetswe keng motho ya timeletsweng ke tsela ya hae, eo Modimo o mo patisang kahohle? ₂₄Dijo tsa ka ke mefehelo, dipokollo tsa ka di iphallela jwaloka dikgohola. ₂₅Hobane botshabeho boo ke bo tshabang bo nkwela hodimo, mme see ke se tshohang ke se ntlhahelang. ₂₆Ha ke fuwe sebaka, leha e le boitketlo, kapa phomolo, thethelo ke yona e ntlelang kamehla.