INGOMA YEENGOMA 5

₁Ngizakufika esivandeni sami, dadwabo, makoti;

ngikhe imire yami namakha wami;

ngigome isihlaka sami kanye neliju;

ngisele iwayini lami nebisi.

Gomani bangani,

selani, nidakwe lithando.

₂Bengilele, kodwana ihliziywami beyihlubayela.

Lalela! Isithandwa sami siyakokoda:

“Yewungivulele dadwabo, sinini sami,

zuba lami, wena opheleleko wami

ngombana ihlokwami yembeswe mbethe

iye, umyeko weenhluthu unamathosi webusuku.”

₃Sengiyihlubulile ingubami.

Ngingayembatha njani godu na?

Sengiqophe iinyawo zami.

Ngingabuya ngizingcolise njani na?

₄Isandla sesithandwa sami singena ngentunja

namazizo wami ayagugeka ngaso.

₅Ngavuka kobana ngivulele isithandwa sami,

izandla zami zancinca imire,

iminwami yanephuka imire

esibambweni somnyango.

₆Ngavulela isithandwa sami,

kodwana besele sikhambile, sinyamalele.

Umphefumulwami bewukhanukela ukukhuluma kwaso.

Ngasifuna, kodwana azange ngisifumane;

ngasibiza, kodwana azange sisabele.

₇Abaqaphi bangifumana

nabalokhu bakhambakhamba ngedorobheni.

Bangidula, bangikghubula,

bangemuka ingubami,

iye, abaqaphi abasemthangaleni.

₈Ntombi zeJerusalema, ngithembisani

bonyana nange ningafunyana isithandwa sami,

ngibawa nisitjele bona ngiyagula ngethando.

₉Wena siphalaphala sakwabo,

isithandwa sakhweso sidlula bani na?

Singcono ngani kunabanye

kobana ungabe uthi sikuthembise na?

₁₀Isithandwa sami siyaphazima begodu siyakhanya,

sibonakala hlangana netjhumi leenkulungwana.

₁₁Ihlokwaso iligolidembala,

iinhluthu zaso zimuyeko,

zinzima njengegubulu.

₁₂Amehlwaso anjengamazuba

emilanjaneni egelezako,

ahlanzwe ebisini,

anamekwe njengobuphaziphazi egolideni.

₁₃Imihlathaso injengesitjalelo seenungo

esikhiqiza amakha.

Iimbhena zaso zimamakhwa,

anephuka imire.

₁₄Imikhonwaso isitina segolide,

efakwe amatje alibherili,

Iphango laso liyiphanela yezinyo lendlovu,

elikghatjiswe ngamatje wesafaya.

₁₅Imilenzaso ziinsika zemabula

enzinziswe esinzinzisweni segolidembala.

Isibumbeko saso sifana neLibhanoni,

sikarisa njengemisedarayo.

₁₆Umlomaso ubumnandi ngokwawo;

sihle koke.

Sinjalo-ke isithandwa sami, unjalo umnganami,

nina ntombi zeJerusalema.