INGOMA YEENGOMA 6

₁Siyephi isithandwa sakho,

wena siphalaphala sakwabo?

Sitjhingephi isithandwa sakho na?

Sizakukhamba nawe sikufunise sona.

₂Isithandwa sami sehlele esivandeni saso,

siye eentjalelweni zeenungo

kobana siyokwelusa eemvandeni,

sikhe amakhwa.

₃Ngingowesithandwa sami, naso singesami;

seluse hlangana namakhwa.

₄Umuhle sinini sami, unjengeTiritsa,

ukhanga njengeJerusalema,

umanyazela njengamabutho aphethe iimpawu.

₅Susa amehlwakho kimapha

ngombana ayangihlangahlanganisa.

Iinhluthu zakho kwangathi mihlambi yeembuzi,

ezehla entabeni yakwaGiliyadi.

₆Amazinywakho anjengomhlambi wezimvukazi,

ezikhuphuka zibuya emanzini.

Enye nenye inephahla layo,

kungekho nayinye ekhamba yodwa.

₇Iinhlafunyo zakho zinjengeengcenye zamarharinada

ngemva kwesiyaya sakho.

₈Kuneendlovukazi ezimatjhumi asithandathu,

amakhohlo amatjhumi abunane

namatlawu amanenginengi,

₉kodwana izuba lami, opheleleko wami wehlukile,

uyindodakazi eyodwa kunina,

uyintandokazi yowambelethako.

Iintombi nazimbonako zithi ngobusisiweko,

iindlovukazi namakhohlo ziyambuka.

₁₀Ngubani lo olunguza entunjeni

omuhle inga yinyezi,

okhanya njengelanga

nomanyazela njengamabutho aphethe iimpawu na?

₁₁Ngehlele hlangana nemithi yama-alimoni

kobana ngibone imitjhana emrhobeni

nokobana iindiribe ziyahloma

namarharinada ayathuthumba na.

₁₂Azange ngiyelele

bonyana umphefumulwami uzangibeka

eenkaraneni zabosaziwako bekhethu.

₁₃Buya, yewubuye wena mfazi weTjhunemi;

buya, yewubuye ukuze sikubukele!

Maye, abafazi bathanda ukubukela umfazi weTjhunemi

njengegido leMarhanayimu!