INGOMA YEENGOMA 4

₁Maye, umuhle kangangani sinini sami!

Maye, umuhle kangangani!

Amandiyakho ngemva kwesiyaya amazuba.

Iinhluthu zakho ungathi mihlambi yeembuzi

ezehla entabeni yakwaGiliyadi.

₂Amazinywakho anjengomhlambi wezimvu ezisandukurhunwa,

ezikhuphuka zibuya emanzini.

Enye nenye inephahla layo,

kungekho nayinye ekhamba yodwa.

₃Iimbhena zakho zinjengomtletle otlerebede,

umlomakho uyakarisa.

Iinhlafunyo zakho zinjengeengcenye zamarharinada

ngemva kwesiyaya sakho.

₄Intamakho ifana nombhotjhongo kaDavida

owakhiwe walala kuhle;

kiwo kulembelele iinhlangu eziyikulungwana,

zoke kuziinhlangu zeengorho.

₅Amabelakho anjengeentsephana ezimbili,

iye, anjengamaphahla wetsephe

akarula hlangana namakhwa.

₆Ngizakuya entabeni yemire

nembundwini wetjhwalo,

kufikela lapha kubetha ummoya wekuseni

bekunyamalale imithunzi yobusuku.

₇Umuhle ngakho koke, sinini sami!

Akunasici nakancani kuwe.

₈Yewize sikhambe makoti,

iye, yewize semuke eLibhanoni.

Yehla esiqongolweni se-Amana,

iye, esiqongolweni seSeniri neseRherimoni,

edzabeni lamabhubezi

neentabeni zezingwe.

₉Uthumbe ihliziywami dadwabo, wena makoti,

iye, uyithumbile ihliziywami,

ngokungithi nje rhedlu ngamehlwakho,

ngomucu munye womncamo entanyenakho.

₁₀Maye, limnandi kangangani ithando lakho,

wena dadwabo, wena makoti!

Ithando lakho lingcono khulu kunewayini;

nomnuko wamakha wakho adlula zoke iinthako.

₁₁Iimbhena zakho zithonta iliju, makoti,

ibisi neliju kungaphasi kwelimu lakho.

Umnuko wengubakho ufana neweLibhanoni.

₁₂Usivande esikhiyelweko dadwabo, makoti;

iye, usivande esikhiyelweko,

umthombo ovaliweko.

₁₃Wena umthombo wemithi yamarharinada

endaweni yokuphumula

kanye neenthelo ezimnandi,

ihena nenaridi,

₁₄iye, inaridi nesafarani,

umgaba onuka kamnandi nesinamoni

nayo yoke imihlobo yemithi yetjhwalo,

imire nesikghopha

nazo zoke iinungo eziphambili.

₁₅Umthombo wesivande,

isiyalu samanzi atlelezako,

iye, amanzi ageleza, asuka eLibhanoni.

₁₆Vuka, mmoya wetlhagwini,

yewize, nawe mmoya wesewula!

Phembetha phezu kwesivande sami,

amakha waso asabalale.

Isithandwa sami asize esivandeni saso,

sinandiphe iinthelo zaso ezimnandi.