INGOMA YEENGOMA 3

₁Ebusuku, embhedenami,

ngafuna othandwa mphefumulwami,

ngamfuna, kodwana azange ngimfumane.

₂Ebhudangweni ngavuka ngazulazula ngedorobheni,

ngehla ngenyuka eendledlaneni nematatawini.

Ngathi ngizakufunana othandwa mphefumulwami.

Yeke ngamfuna, kodwana azange ngimfumane.

₃Abaqaphi bangifumana

nabalokhu bakhambakhamba ngedorobheni.

“Akhange nibone othandwa mphefumulwami na?”

₄Bengiqeda nje ukudlula abaqaphi,

lokha nangifumana othandwa mphefumulwami.

Ngamtjhuba, azange ngisamlisa,

besayokufika ekumbeni kamma,

iye, ngelawini lowangibelethako.

₅Ntombi zeJerusalema, ngithembisani

ngeentsephekazi nangeenhlangukazimataka zommango

bona angeze nazamazisa namkha nivuse ithando

lingakakhanuki ukuvuka.

₆Ngubani lo owenyuka avela erhalawumbeni,

njengesikhatha sentuthu

elifini lemire neletjhwalo,

okukhethwe kizo zoke iimputjhana zabathengisi na?

₇Qala! Naso isihlalogugwa sakaSolomoni,

siphekelelwa ziingorho ezimatjhumi asithandathu,

iye, ziphuma eengorhweni zakwa-Israyeli.

₈Zoke ziphethe iinsabula,

zoke zibandulelwe ipi,

enye nenye inesabula edinini,

ilungele iingozi zobusuku.

₉Ikosi uSolomoni izenzele isihlalogugwa;

isenze ngeengodo zeLibhanoni.

₁₀Yenze iinsika zaso ngesiliva,

ingaphezulu laso ngegolide;

ubuhlalo baso buthungwe ngokububende,

sikghatjiswe ziintombi zeJerusalema

ngeempawu zethando.

₁₁Phumani nina ntombi zeZiyoni,

nibone ikosi uSolomoni ithwele isihlohlo,

iye, isihlohlo eyasethweswa ngunina,

mhlana ithathako,

iye, mhlana ihliziywayo yeneme.