INGOMA YEENGOMA 2

₁Ngililikhwa leTjharoni,

ithuthumbo lemirhuleni.

₂Njengelikhwa hlangana nameva

sinjalo isinini sami hlangana neentombi.

₃Njengomuthi wamahabhula hlangana nehlathi,

sinjalo-ke isithandwa sami hlangana namasokana.

Maye ngikhanuka kangangani ukuhlala emthunzinaso

nesithelo saso sizakuba bulende kurhwalabhami.

₄Sangingenisa ngekumbeni yewayini,

iphawu laso ngehla kwami bekulithando.

₅Yeningiqabule ngamakwapa wediribe,

ningikhuthaze ngamahabhula

ngombana ngiyagula ngethando.

₆Kwanga isandla saso sesincele

besingaba ngaphasi kwehlokwami

nesidla saso singigone.

₇Ntombi zeJerusalema, ngithembisani

ngeentsephekazi nangeenhlangukazimataka zommango

bona angeze nazamazisa namkha nivuse ithando

lingakakhanuki ukuvuka.

₈Lalela! Naso isithandwa sami!

Qala! Nasi siza nganeno,

siza sijekezela eentabeni,

seqayeqa emibundwini.

₉Isithandwa sami sifana netsephe

namkha ihlangumatakana

Qala! Nasiya sijame ngemva komthangala wekhethu,

sihlola eentunjeni,

sitjhaluze emlukweni wamafesidere.

₁₀Isithandwa sami sathoma sathi kimi,

“Sikima sinini sami,

simomothwana sami, yewize sikhambe!

₁₁Qala! Ubusika budlulile

nezulu alisekho, likhambile.

₁₂Amakhwa emmangweni ayabonakala,

isikhathi sokubhina sifikile,

ukukukuruza kwamazuba

sele kuzwakala enarheni yekhethu.

₁₃Amakhiwani athela aboporwana bawo,

iindiribe ezithuthumbako zisabalalisa iphunga lazo.

Sikima sinini sami,

simomothwana sami, yewize sikhambe!

₁₄Zuba lami elisemipharwini yedwala,

endaweni esithekileko yeliwa

akhese ungitjengise ubuso bakho,

ngizwise iphimbo lakho!

Kazi iphimbo lakho libutjhelelezi

nobuswana bakho buyakarisa.

₁₅Sibambelani iimpungutjha,

iye, iimpungutjhana ezonakalisa iindiribe zethu,

iindiribe zethu ezithuthumbileko.”

₁₆Isithandwa sami ngesami,

nami ngingesaso,

selusa hlangana namakhwa.

₁₇Sithandwa sami, jika,

ube yitsephe namkha ihlangumatakana

emibundwini ehlukeneko

kufikela lapha kubetha khona ummoya wekuseni

bekunyamalale imithunzi yobusuku.