UJOBHO 9

₂“Ngambala, ngiyazi bonyana kunjalo:

Obhubhako angeze aba ngolungileko kuZimu.

₃Nakube umuntu ufuna ukujamelana noZimu ebandla,

akunambuzo namunye angawuphendula phakathi kweyikulungwana.

₄UZimu unobuhlakani obukhulu, uqinile emandleni.

Ngubani owakhe wajamelana naye waphumelela?

₅Nguye otjhidisa iintaba, zona zingazi,

azigubude ngetukuthelwakhe.

₆Unyakazisa iphasi alisuse endawenalo,

kuthuthumele iinsika zalo.

₇Uyala ilanga bona lingakhanyi,

agubuzese iinkwekwezi.

₈Yena yedwa weneka amazulu,

agadange amaza welwandle.

₉Wenza iinkwekwezi zeBhere nezesiRuthwana,

zesiLimela neendawo lapho zicimela khona ngesewula.

₁₀Wenza izinto ezikulu ezingahlathululekiko

neemangaliso ezinganakubalwa.

₁₁Qala, udlula ngakimi ngingamboni,

iye, uyadlula ngingayeleli.

₁₂Nahlwithako, ngubani ongamkhandela?

Ngubani ozakuthi kuye, ‘Wenzani?’

₁₃“UZimu angeze abuyisela itukuthelwakhe emuva,

ngaphasi kwakhe abasizi bakaRahabu bathotjisiwe.

₁₄Alo, ngingamphendula njani na?

Ngiwathathephi amezwi wokujamelana naye?

₁₅Nanyana ngimsulwa, angeze ngamphendula,

kwaphela ngingazibawela umusa kumjamelanami.

₁₆Ngitjho nanyana bengingalila, angiphendule;

angikholwa bona ubezakulalela amezwami.

₁₇Kunalokho ubezangiwurubaja ngesiwuruwuru,

andise imivuvu yami ngaphandle kwesizathu.

₁₈Ubengazukuvuma bona ngikhokhe ummoya,

kodwana ubezangizalisa ngomunyu.

₁₉Nakube kuyindaba yamandla,

nguye odlondlobeleko!

Nakuyindaba yomthetho,

ngubani obezambizela ebandla?

₂₀Nanyana ngimsulwa nje,

ngakhuluma ngimlandu;

noma nginganamlandu nje,

umlomami ungibeka icala.

₂₁Emanyeni ngimsulwa!

Yeke ipilwami ililize, ngiyihlobokile.

₂₂Sekuyafana koke, kungakho ngisithi,

‘UZimu ubhubhisa omsulwa

nokhohlakeleko ngokufanako.’

₂₃Lokha isikhukhula nasiletha ukufa msinyana,

sinyefula ukuqobeka kwabanganamlandu.

₂₄Nakuliphasi, uZimu ulinikele ezandleni zabakhohlakeleko;

usitha ubuso babagwebi balo.

Nakube akusuye, alo, kungaba ngubani?

₂₅“Amalangami ayarhaba kunomgijimi,

ayaphephuka, angaboni ubuhle.

₂₆Athaya njengesithayamanzi somgaba,

anjengekhozi nalidzwebula ukudla kwalo.

₂₇Nakube bengingalibala isililo sami,

ngilise ukunyukubala ngename,

₂₈bengizokuba nevalo lakho koke ukuhlupheka kwami,

ngombana ngiyazi

bonyana angeze wahlala ungangibeki icala.

₂₉Mina vele sengahlala nginomlandu!

Alo, ngizakuthi ngisasebenzelani nje?

₃₀Nangihlamba ngeliqhwa,

ngiqophe izandla zami ngesoda,

₃₁uzangidlhunya ngemgodini onedaka,

benginyenywe zizambatho zami.

₃₂UZimu akasimumuntu njengami

kobana ngingabangisana naye,

nokobana ngingajamelana naye ebandla.

₃₃Thana bekunomlamuli phakathi kwethu

obengasilawula sobabili,

₃₄ukuze uZimu asuse intongakhe kimi,

nokumesaba kwami kungasabi khona.

₃₅Khona-ke bengizakukhuluma ngaphandle kokumesaba,

ngombana ngiyazi bona anginamlandu.”