UJOBHO 8

₂“Kuzabe kube nini ulokhu ukhuluma njalo?

Umlomakho ukhuluma ilize lakolize!

₃UZimu uyahlanakezela ubulungiswa na?

OSabekako uyahlanakezela okulungileko na?

₄Nakube abantwabakho bonile kuye,

ubanikele emandleni wesiphambeko sabo.

₅Wena nawungafunisisa uZimu,

wenze isibawo sakho koSabekako,

₆nakube umsulwa begodu ulungile,

ngambala yena uzakuphakamela kuwe,

abuyisele umuzi wakho esigeni.

₇Nanyana isithomo sakho sibe sincani,

isiphetho sakho sizakuba sikhulu kwamambala.

₈“Yeke, buza kabadala,

ubeke ihliziywakho efundisweni yaboyise,

₉ngombana thina singebayizolo,

yeke abe akunanto esiyaziko

namalangethu ephasini asithunzi.

₁₀Bona bazakufundisa, bakuhlahle,

bakuyale ngelwazi labo.

₁₁“Incinini ingamila lapha kunganachibi na?

Umgaba ungahluma lapha kunganamanzi na?

₁₂Kuzakuthi kungakaphalazi

begodu kungakasikwa nokusikwa,

kutjhwabe msinyana kunabo boke utjani.

₁₃Zinjalo iindlela zaloyo okhohlwa uZimu,

irhuluphelo yonganaZimu iyatjhabalala.

₁₄Ithemba lakhe linjengentambo yesiswebu

nesisekelo sakhe siyindlwana yeswebu.

₁₅Naziyama ngekumbakhe, iyawa,

nayikakarelako, ayidzimeleli.

₁₆Ufana nomgade omila endaweni enelanga,

onamahlumela anabela esivandeni.

₁₇Imirajanawo irarela isiqorho,

ihlala hlangana namatje.

₁₈Kodwana nawuruthulwako endawenawo,

indawo leyo ayitjho bona kwakhe kwamilani kiyo.

₁₉Lokho kukukwenama kwepilwawo:

Equlwanenapho kuzakumila omunye.

₂₀“UZimu akasoze alahle umuntu omsulwa

begodu angeze asekele abenza ubumbi.

₂₁UZimu angazalisa umlomakho ngesihleko godu

neembhena zakho ngokuhlokoma.

₂₂Labo abakuzondako bazakwembathwa mahloni

namatende wabakhohlakeleko atjhabalale.”