UJOBHO 10

₁“Ngiyayinyenya ipilwami;

ngifuna ukuzwakalisa isililo sami ngitjhaphulukile,

ngikhulume ebumunywini bomphefumulwami.

₂Yeke ngizakuthi kuZimu,

‘Ungangibeki icala,

ngazisa bonyana kubayini ujamelene nami.

₃Kghani uyakareka nawumgandeleli,

ulahle umsebenzi wezandla zakho na?

Ingabe uthanda amaqhinga weenkhohlakali?

₄Uthi unamehlo wenyama nje?

Ubona ngendlela obhubhako abona ngayo?

₅Imihla yakho ifana neyobhubhako na?

Iminyakakho ifana neyomuntu na?

₆Kubayini ubhenyegulula imitjhaphami,

urhubhulule izono zami,

₇nanyana wazi bonyana anginamlandu,

begodu akakho ongasindisa esandleni sakho?

₈Izandla zakho zangibumba, zangitshidza,

ngemva kwalokho wangijikela, wangirhayila.

₉Khumbula bonyana ungenze ngomdaka,

nje-ke uzangibuyisela ethulini.

₁₀Azange ungithulule njengebisi,

wangitjhujisa njengetjhizi na?

₁₁Wangembathisa inyama nesikhumba,

wangiluka ngokuhlanganisa amathambo nemisipha.

₁₂Wangipha ipilo ngokwethembeka kwakho,

netjhejo lakho labulunga umphefumulwami.

₁₃Izinto engihlupheka ngazo wazifihla ehliziywenakho;

kodwana manje ngiyazi bonyana lokhu kuyihloswakho ngami:

₁₄Nakube bengingona, wena bewuzangelusa,

bewungeze wathethelela ukona kwami.

₁₅Nakube benginomlandu, maye mina!

Nabe gade ngilungile, bengingeze ngavusa ihloko

ngombana ngizele ihlazo ngobuhlungu engibuzwako.

₁₆Nakube bengingaphakamisa ihlokwami,

bewuzangizuma njengebhubezi,

godu ungigandelele ngamandlakho amakhulu!

₁₇Uvusa abofakazi abatjha abajamelene nami,

wandisa itukuthelwakho kimi,

ukuhlupheka kwami kuza ngokudlhegana.

₁₈Alo, wangikhuphelani esibelethweni?

Ngathana ngafa ngingakabonwa nangelihlo,

₁₉ngaba njengongazange abe khona,

ngithathwe esibelethweni ngisiwe ezindleni.

₂₀Amalanga wokuphila kwami ambalwa.

Yeke akhese ungigadunge!

Lisa ukunginaka

ukuze ngithabe kwesikhatjhana;

₂₁ngaphambi kobana ngiye kwamgodi uyagcina,

enarheni enobumnyama obunzima tshu;

₂₂iye, inarha enethunzi elinzima nesiyaluyalu,

lapha umkhanyo wakhona inga bumnyama.’ ”