UJOBHO 29

₂“Maye, ngubani nje ongangibuyisela eenyangeni ezadlulako,

emihleni lokha uZimu nagade angelusa!

₃Isibani sakhe besikhanyisa ehlokwami,

ngokukhanya kwakhe ngikhambe ebumnyameni!

₄Maye, ngikhumbula nakusese ngimokha,

lokha umuzami usavikelwa nguZimu,

₅oSabekako nasese nami

nabantwabami bangibhodile,

₆iinyawo zami ngizihlamba ngomlaza

negagadu lingigelezela imisele yamafutha we-oliva.

₇“Lokha nangikhuphukela etatawini ledorobho.

ngibeke isihlalo sami ebandla,

₈amasokana nangibonako bekadeda,

amaqhegu asikime, ajame.

₉Iinkhulu bezithula zithi du,

zibambe umlomo;

₁₀nakumele kukhulunywe,

abosaziwako bebajamela ncanye,

amalimabo anamathele erhwalabheni.

₁₁Woke ogade angizwa bekangibuka,

nalabo abangibonako bebangikhakhazisa,

₁₂ngombana bengenyela okhwahlileko

nonganayise, onganabani ongamsiza

ezandleni zeenjinga ezimarhamaru.

₁₃Uzulani nangibusisako bengibusiseka

bese ngijabulise ihliziyo yomhlolokazi.

₁₄Bengembatha ukulunga, nakho kungembathe;

ubulungiswa kimi bebunjengenaka nomtjhotjho.

₁₅Bengililihlo kongaboniko,

ngiziinyawo zorholopheleko.

₁₆Iye, bengingubaba kabakhwahlileko,

ngijamela ngitjho nendaba yesikhambi.

₁₇Nje-ke, ngikhamisise abakhohlakeleko,

ngahlwitha abongazimbi emazinywenabo.

₁₈“Ngadlumbana ngathi, ‘Ngizakufela hlangana namadzinyanami,

amalangami azakuba manengi,

abe njengetjhwabatjhwaba yelwandle.

₁₉Ngemirabhami emanzini

nombethe eempandeni zami ebusuku,

₂₀ngizakuhlala ngidunyiswa njalo,

negunya lami livuselelwe.’

₂₁Ebandla abantu bebathula bangilalele,

iye, bebathula balalele izeluleko zami.

₂₂Ngemva kwekulumami, bebangasabi nelizwi;

amezwami befumbentela phezu kwabo.

₂₃Bebangilinda kwanga balinde izulu,

bavule imilomabo

inga bakhamisele izulu lesilimela.

₂₄Bengimomotheka lokha nabanganathemba,

ukuhleka kwami bekubakhuthaza.

₂₅Bengibakhethela indlela,

ngibe ngusihlalo ebandla

ngihlale inga ngiyikosi hlangana namabuthwayo,

nginjengomduduzi wabalilako kibo.