UJOBHO 30

₁Kodwana gadesi bahlekisa ngami,

ngitjho nabantu abancani kimi ngeminyaka!

Iye, abantwana balabo egade ngingabatjheji

kobana ngingabahlalisa nezinja zomhlambami.

₂Amandla wezandla zabo bekazakuba yini kimi?

Umdlandlabo uyile,

₃ngebanga lokuswela nangendlala ebhokileko!

Ebusuku bakhuma ihlabathi eyomileko:

Ebhudwini nendaweni emumango

₄bakha imirorho emunyu emahlatjhaneni,

banqothula nemirabhu yemithi yomthanyelo ukuze baziphilise.

₅Bayaqotjhwa emphakathini,

kurhuwelelwe emva kwabo inga masela.

₆Bakatelelekile ukuhlala emadongeni wemilanjana,

iye, emipharwini yomhlaba neyamadwala.

₇Babongolela hlangana namahlatjhana,

babuthane hlangana neentjhutha.

₈Basizukulwana esinganamikghwa nesinganabizo,

ngilabo abaqotjhiweko enarheni!

₉“Nje-ke, gadesi ngisiphoqo sengomabo!

Sese ngiphenduke isiga kibo!

₁₀Bayanginyenya, bakhambela kude nami,

abananhloni zokungikhafula phambi kwami.

₁₁Njengombana uZimu angitjhiye ngingakavikeleki

bewangithobisa,

bona-ke sese bazenzela phezu kwami.

₁₂Ngesigomeni sami ngivukelwa yicubevange,

bangenza bona ngibaleke,

bangisahlela kobana bangibhubhise.

₁₃Bavimba indlelami yokuphuma

ukuze bangiqedelele,

onganamsizi kumele abhace.

₁₄Bangithelekela njengamanzi agobhozako,

beza njengeenkhukhula zezulu elinamandla.

₁₅Ngehlelwa kukwesabeka,

isithunzi sami siyaphephuka inga mumoya,

njengelifu ukwaziwa kwami kuyatjhabalala.

₁₆Nakungimi yena, ipilwami iyathuluka,

ngikakarelwa malanga wokuhlunguphazwa kwami.

₁₇Ubusuku buqhoboza amathambami,

ubuhlungu obungiququdako abupheli.

₁₈Ngamandla amakhulu uZimu ubamba isambatho sami,

iye, ungitjhubelela ngentamo yenaka lami,

₁₉ungijikijela edakeni,

sengaba njengethuli nomlotha.

₂₀“Ngiyakubiza Zimu, kodwana awungiphenduli,

ngiyasikima ngithandaze, awungitjheji!

₂₁Ungiphendukele ngokunganasirhawu,

ngesandla sakho esinamandla, wangiphatha njengesitha.

₂₂Ungidzwebule, wangikhweza ummoya,

wangivunguzela hlangana nesiwuruwuru.

₂₃Ngiyazi uzongehlisela phasi kabafileko,

endaweni ebekelwe boke abaphilako.

₂₄Akunamuntu ongatjhejana newiliwili,

ingode engasenakuhlengwa!

₂₅Mina ngabalilela abasesizini,

ummoyami wazwelana nabakhwahlileko,

₂₆kodwana nangilindele okuhle, kuvela ubumbi,

nangiqalelela umkhanyo, kuvela ubumnyama.

₂₇Ukuwurubajeka okungaphakathi kwami akuthuli,

ngehlelwa malanga wamahlungu.

₂₈Ngikhamba ngitjhile,

kodwana ingasi ngokutjhiswa lilanga.

Ebandla ngiyasikima ngizibike.

₂₉Sese ngimfowabo leempungutjha,

umngani weenciliba.

₃₀Isikhumba sami sese sinzima begodu siyakaruka,

ngiyatjha emzimbeni ngomgomani.

₃₁Iharibha lami liphenduke isililo

nenghwani lami isirhahlawulo.