UJOBHO 28

₁Ngambala kunomgodi wesiliva

nendawo lapha kuhlungwa khona igolide.

₂Isimbi ikhutjhwa equlwanini ephadlhiweko,

ikoporo incibilikiswa elitjeni lakhona.

₃Umuntu uyabuphelisa ubumnyama,

abhenyegule abe ayokufika emaphethelweni,

afunisise elitjeni lapha kufifiyela khona,

ngitjho nalapha kunzima tshu.

₄Ulembeleliselwa ngemgodini ngomutja,

aqeqebule umkghotha edwaleni,

iinyawo zisemmoyeni;

ulengela emgodini, kude nabantu.

₅Umhlaba okuvela kiwo ukudla,

ngaphasi uphendulelwa ngomlilo

₆edwaleni lawo kuvela amatje wesafaya

nethuli lakhona linegolide.

₇Indlela eya emikghotheni leyo

ayaziwa madlanga,

namakhozi akayiboni.

₈Iinkhakhabi azingeni emikghothwenapho

nebhubezi alitjhideli lapho.

₉Umuntu ubeka isandla sakhe elitjeni eliqinileko;

apewule iintaba emirabhinazo.

₁₀Wemba imikghotha edwaleni,

amehlwakhe abone woke amagugu.

₁₁Uvala imithambo yamanzi,

okufihliweko akuveze emkhanyweni.

₁₂Kodwana kufunyanwaphi ukuhlakanipha?

Ilwazi lona lihlala kuphi na?

₁₃Umuntu akazwisisi ukuqakatheka kwalo,

ngombana alifunyanwa emphakathini.

₁₄Ukuzika kuthi: “Akukho kimi.”

Ilwandle nalo lithi: “Akukho kimapha.”

₁₅Akuthengwa ngegolidembala,

namkha kulinganiswe isiliva njengenani lakhona.

₁₆Akukhokhelwa ngegolide le-Ofira,

namkha ngamatje aligugu we-oniksi newesafaya.

₁₇Igolide nerhalasi azilinganiseki nokuhlakanipha,

namkha kwenaniswe ngezitja zegolide.

₁₈Ungalingi ukukhokhele ngekorali nekhristali,

ngombana inani lokuhlakanipha lingaphezu kwamaparele.

₁₉Akulinganiswa nethophazi kaKutjhe,

godu angeze kwathengwa ngitjho nangegolidembala.

₂₀Alo, kubuyaphi-ke ukuhlakanipha?

Ukuzwisisa khona kuhlala kuphi?

₂₁Kufihlakele emehlweni wakho koke okuphilako,

kufihlakele ngitjho neenyonini zomkayi.

₂₂Ukubhujiswa nokufa kuthi:

“Nathi siyakuzwela ukuhlakaniphokho.”

₂₃UZimu nguye owazi indlela eya kikho,

nguye kwaphela owaziko bona kuhlalaphi.

₂₄Iye, yena ubona amaphethelo womhlaba,

abone koke okungaphasi komthunzi welanga.

₂₅Lokha nanikela ummoya amandla,

walinganisa ubukhulu bamanzi,

₂₆lokha nenzela izulu isimiso

namafu anzima indlelawo,

₂₇waqala ukuhlakanipha wakubuka,

wakuhlela bewakuhlolisisa.

₂₈Wathi emuntwini:

“Ukwesaba uSomandla kukuhlakanipha!

Ukutjhida ebumbini kukuzwisisa!”