Imizamo yokujamelana nokuvuselelwa kwethempeli
1Kwathi lokha izitha zabakwaJuda nebakwaBhenjamini nazizwa bonyana abathunjwa ababuyileko bakha ithempeli lakaSomnini uZimu wakwa-Israyeli, 2zeza kuZerubhabheli neenhlokweni zemindeni, zathi kibo: “Sivumelani ukwakha nani ngombana njengani nathi siyamsaba uZimenu begodu sinikela imihlabelo kuye ukusukela emihleni ka-Esari-Rhadoni ikosi ye-Asiriya eyasiletha lapha.”
3Kodwana uZerubhabheli, uJetjhuwa kanye nezinye iinhloko zemindeni yakwa-Israyeli bathi kizo: “Asinahlanganyelo nani ekwakhiweni kwethempeli lakaZimethu. Thina sisodwa sizakwakhela uSomnini uZimu wakwa-Israyeli ithempeli njengombana uKoretjhi ikosi yePheresiya yasiyala.”
4Ukusukela ngesikhatheso abantu benarha leyo bethusela amaJuda bebawanyefula aphelelwa mdlandla wokwakha. 5Esikhathini soke sokubusa kwakaKoretjhi ikosi yePheresiya bekube sembusweni kaDariyasi ikosi yePheresiya, abantwabo bafumbathisa abeluleki bonyana bajamelane nabantu bakwaJuda ngokuraranisa ihlelo labo lokwakha. 6Ngesikhathi sokuthoma kokubusa kwaka-Arhatjhiverotjhi, izitha zatlola zamangalela izakhamuzi zakwaJuda neJerusalema. 7Begodu emihleni ka-Aritarhitjhasta, uBhitjhilamu, uMiteredathi, uThabeyeli nenengi labasebenzisani babo batlolela u-Aritarhitjhasta ikosi yePheresiya incwadi. Incwadi leyo yatjhugululwa beyatlolwa ngomtlolo wesi-Aramu.
Okulandelako kungesi-Aramu: 8URerhumu ongundunakulu kanye noTjhimtjhayi usosiba bebatlolele ikosi u-Aritarhitjhasta incwadi emangalela iJerusalema. Yeke incwadi leyo yatlolwa 9nguRerhumu ongundunakulu noTjhimtjhayi usosiba kanye nabasebenzisani babo boke: abagwebi, abazenda, iinkhulu, amaPheresiya, abahlali be-Uruki, beBhabheli nebeSusa (okuma-Elamu), 10kanye nezizwe zoke u-Osinaphari ohlonipheke khulu agade azithumbe wazibeka emadorobheni weSamariya nesifundeni esingetjingalanga yomlambo iYufrathe. Nje-ke, 11naku umkhuphelo wencwadi abayithumelako:
Ikosi u-Aritarhitjhasta.
Iinceku zekosi, okutjho abantu abangetjingalanga yomlambo iYufrathe bayalotjhisa.
Ngalokho 12sazisa ikosi bonyana amaJuda agade asuka kiyo ukuza kithi sele aseJerusalema. Khona njesi amatasatasa akhana nedorobho elihlubukileko nelikhohlakeleko. Kazi alungisa iinsekelo begodu avuselela namaboda. 13Akwazeke ekosini bonyana lokha idorobheli nasele lakhiwe nemithangala seyivuselelwe, abantu bedorobhelo angeze basakhupha umthelo, isibiko nemali yendlela. Yeke indlu yamagugu wesigodlo izokulahlekelwa khulu. 14Manje, njengombana siphila ngesigodlo, akusihlaleli kuhle thina ukubona ikosi idelelwa. Ngalokho sithumela incwadi le ekosini ukuyazisa 15bonyana akuhlolisiswe kuhle encwadini yemilando yaboyise lekosi ngendaba le. Nje-ke encwadini yemilando leyo ikosi izakufunyana bonyana kazi idorobheli lingelokuhlubuka, linehlupho emakhosini neemfundeni begodu kwakade lidale bona kube nobuhlongandlebe. Kungebangelo labhujiswa. 16Nje-ke, sazisa ikosi bonyana nange idorobheli lingavuselelwa begodu kuvuswe nemithangalalo iphele ukwakhiwa, ikosi angeze isaba nelawulo lesifunda esingetjingalanga yomlambo iYufrathe.
17Ikosi u-Aritarhitjhasta yathumela ipendulo yathi:
KuRerhumu ongundunakulu nakuTjhimtjhayi usosiba kanye nabasebenzisani babo boke abahlala eSamariya nesifundeni esingetjingalanga yomlambo iYufrathe.
Ngiyabingelela.
18Incwadi enayithumela kithi yafundwa ngokurhunyutjhwa phambi kwami. 19Yeke ngikhuphe umyalo kwaphenywa. Kufunyenwe bona kwakade idorobheli livukele amakhosi nokobana ubuhlubuka nobuhlongandlebe kwenziwe kilo. 20Iye, iJerusalema beyinamakhosi aqinileko nanamandla, abuse isifunda soke esingetjingalanga yomlambo iYufrathe. Begade kukhutjhwa kiwo umthelo, isibiko kanye nemali yendlela. 21Yeke khuphani umyalo bonyana amadoda lawo angasarageli phambili nomsebenzi wokuvuselela idorobhelo, ukufikela lapha mina ngizakukhupha khona omunye umyalo. 22Tjhejani bona ningabi sidondi ngendaba le ukuze ubukhosi bungehlelwa mumonakalo omkhulu.
23Ngemva kokobana incwadi yekosi u-Aritarhitjhasta ifundwe phambi kwakaRerhumu noTjhimthayi usosiba kanye nabasebenzisani babo, bakhamba ngokurhaba okukhulu baya emaJudeni eJerusalema. Bawajamisa ngekani bona angasarageli phambili nomsebenzi wokwakha. 24Ngendlela leyo umsebenzi wethempeli lakaZimu ngeJerusalema wajanyiswa bekwaba mnyaka wesibili wokubusa kwakaDariyasi ikosi yePheresiya.
