UDUTERONOMI 19

₁Lokha uSomnini uZimakho narhayila izizwe aninikele inarhazo, niziqotjhe bese nihlala emadorobhenazo neenkumbeni zazo, ₂nizakwahlukanisela amadorobhenu amathathu enarheni uSomnini uZimenu aninikela yona bona niyithumbe. ₃Nizakulinganisa iindlela bese nihlukanisa kathathu umkhawulo wenarha uSomnini uZimenu aninikela yona bona ibe lilifa lenu ukuze nanyana ngubani obulala angakahlosi abalekele lapho.

₄Umbulali angabalekela emadorobheni lawo asindise ipilwakhe kwaphela nakube ubulele omunye umuntu ngaphandle kwehloso begodu angakhange amzonde ngaphambilini. ₅Isibonelo salokho kukulokha mhlambe umuntu naya ngehlathini nomunye umuntu ukuyokutheza iinkuni bese athi nagawula isigodo, ihloko yezembe itsomuke emphinini imadlhe umuntu loyo abe ahlongakale. Nakunjalo, obuleleko loyo angabalekela emadorobheni lawo kobana asindise ipilwakhe. ₆Nakube idorobho lobuphephelo likude umbuyiseleli weengazi othukutheleko, lokha nagijimisa umbulali, uzambamba bese uyambulala, khibe akanamlandu wokubulawa ngombana umbulali bekangakamzondi ambuleleko loyo ngaphambilini. ₇Ngalokho ngiyaniyala bona nihlukanisele amadorobho amathathu. _8-9Yengezani amadorobho amathathu lawo ngamanye amathathu lokha uSomnini uZimenu nakhulisa umkhawulwenu njengombana afunga kiboyihlomkhulu. Iye, uzaninikela inarha yoke ayithembisa ukuyinikela aboyihlomkhulu, kwaphela nakube niyatjheja ukugcina yoke imiyalo enginiyala ngayo le namhlanje, kobana nikhathalele uSomnini uZimenu nokobana nikhambe eendleleni zakhe. ₁₀Ngaleyondlela iingazi ezinganamlandu angeze zathululwa enarheni uSomnini uZimenu aninikela yona kobana ibe lilifa lenu. Nakungasinjalo umlandu wokuthuluka kweengazi uzakuba phezu kwenu.

₁₁Nakube kunomuntu ozonda omunye, amlalele endleleni bese uyameqela, amumadlhe phasi abe ahlongakale, nje-ke umbulali loyo abalekele kelinye lamadorobho lawo, ₁₂abaphathi bedorobho lapho abuya khona bazakuthumela bona azokuthathwa asiwe esandleni sombuyiseleli weengazi, abulawe. ₁₃Ningamtlhuweli kodwana phelisani umlandu wokuthululwa kweengazi ezimsulwa kwa-Israyeli ukuze izinto zinikhambele kuhle.

₁₄Ningatjhidisi isikhonkhwani sakamakhelwana esabekwa ngabadala elifeni eliyinarha enayabelwa nguSomnini uZimenu kobana ibe ngeyenu.

₁₅Ningathathi ubufakazi bomuntu oyedwa emlandwini wokusolwa komuntu owenze ubulelesi namkha owone nganamkha ngimuphi umlandu. Akube nabofakazi ababili namkha abathathu ngaphambi kobana ningalalela umlandu lowo. ₁₆Nakube kuvela ufakazi onobuqili avukele omunye umuntu amfungele ngamanga, ₁₇bobabili njalo bazakuvela phambi kwakaSomnini, phambi kwabaphristi naphambi kwabagwebi abasesikhundleni ngesikhatheso. ₁₈Abagwebi bazabaphenyisisa bese nakube ufakazi loyo ngowamanga begodu ufungele umfowabo ngamanga, ₁₉yenzani kuye lokho ebegade akuhlose ngomfowabo. Ngaleyondlela nizabe nithanyela ubumbi phakathi kwenu. ₂₀Inengi lizakuzwa, lesabe bese lingasalingi ukwenza ubumbi obunjalo phakathi kwenu. ₂₁Ilihlo lenu lingatlhuweli, akube yipilo ngepilo, ilihlo ngelihlo, izinyo ngezinyo, isandla ngesandla, inyawo ngenyawo.