UDUTERONOMI 18

₁Abaphristi bamaLevi, okutjho yoke ikoro yamaLevi, ayizukuba nesabelo namkha ilifa kwa-Israyeli. Ilifa labo liminikelo ekhethekileko kuSomnini, ngilokho abamele bakugome. ₂Abazukuba nelifa kubafowabo, kodwana ilifa labo nguSomnini njengombana athembisa. ₃Iminikelo ekhethekileko izakuba lilungelo labaphristi elibuya ebantwini abaletha imihlabelo, okungaba ziinkomo, izimvu namkha iimbuzi. Umphristi osebenza e-aldarini uzakunikelwa umkhono, imihlathi emibili nomrhoru. ₄Iinthelo zokuthoma zekoroyi yenu, zewayini lenu nezamafuthenu we-oliva kanye noboya bokuthoma bezimvu zenu nikunikele umphristi. ₅USomnini uZimakho ukhethe uLevi hlangana neenkoro zenu kobana abe yincekwakhe elotjha ebizweni lakhe, yena namadodanakhe nini nanini.

₆UmLevi obuya lapha aqube khona kinamkha ngiliphi lamadorobhenu kilo loke lakwa-Israyeli, angeza endaweni ekhethwe nguSomnini nanyana kunini nafunako. ₇Lapho-ke angalotjha ebizweni lakaSomnini uZimakhe njengawo woke amaLevi wekhabo alotjha phambi kwakaSomnini. ₈Uzakufumana isabelo sokugoma esilingana nesabafowabo, ngaphandle kwaleso asifumene ekuthengiseni kwakhe ipahlakhe.

₉Lokha nanifika enarheni eniyiphiwa nguSomnini uZimenu, ningafundi ukwenza imikhuba enyenyisako yezizwezo. ₁₀Phakathi kwenu kungafunyanwa umuntu otjhisa indodanakhe namkha indodakazakhe emlilweni njengomnikelo namkha umuntu osisangoma, osisanusi, omloyi, oyinyanga, ₁₁ongusomlingo, othukulako, obhulako nophahla abezimu. ₁₂Nanyana ngubani owenza lokhu, usinyenyiso kuSomnini begodu ngebanga lemikhuba enyenyisako leyo uSomnini uZimenu uqotjha izizwezo phambi kwenu. ₁₃Yibani msulwa phambi kwakaSomnini uZimenu. ₁₄Izizwe enizoziphangezi, zilalela izanusi nezangoma, kodwana nina uSomnini uZimenu azange anivumele kobana nenze njalo.

₁₅USomnini uZimenu uzanivusela umphorofidi onjengami phakathi kwenu, kubafowenu. Nguye okufanele nimlalele. ₁₆Kuzakuba njengombana nanifuna uSomnini uZimenu eRhorebe ngelanga lomhlangano lokha nanithi: “Asisakwazi ukulalela umdumo welizwi lakaSomnini uZimethu nokubona umlilokazi lo ngombana sizokufa!” ₁₇USomnini wathi kimi: “Koke abakutjhwileko kuwe kulungile. ₁₈Ngizabavusela umphorofidi onjengawe phakathi kwabafowabo, ngibeke amezwami emlonyenakhe, abatjele koke engimyale ngakho. ₁₉Nanyana ngubani ongeze alalela amezwami umphorofidi azabe awakhuluma ebizweni lami, mina ngokwami ngizakubona ukuqeda ngaye. ₂₀Kodwana umphorofidi okhuluma ebizweni lami ngokuzitjhaya khibe angikamthumi, namkha okhuluma ebizweni labozinyana, akabulawe.” ₂₁Ningazibuza nithi: “Sizahlukanisa njani bona leli akusilo ilizwi elikhulunywe nguSomnini?” ₂₂Ipendulo kukobana nakube umphorofidi ukhuluma ebizweni lakaSomnini bese lokho akutjhoko akwenzeki namkha akubi liqiniso, kuzabe kungasilo ilizwi elikhulunywe nguSomnini. Umphorofidi loyo uzabe akhuluma ngokuzitjhaya, yeke ningamesabi onjalo.