UDUTERONOMI 20

₁Lokha naniya epini niyokulwa nezitha zenu bese nibona iinjomani neenkarana nebutho elikhulu kunelenu, ningesabi ngombana uSomnini uZimenu owanikhupha enarheni yeGibhide unani. ₂Nasele nitjhidele epini, umphristi uzakuza ngaphambili akhulume nebutho ₃athi kilo: “Lalela Israyeli, namhlanje uze epini ukuzokulwa nezitha zakho. Ihliziywakho ayingadani, ungesabi ubaleke ngebanga levalo ngazo ₄ngombana uSomnini uZimakho nguye okhamba nawe bona akulwele ezitheni zakho, akunikele ukuhlula.”

₅Iinkhulu zizakukhuluma nebutho zithi: “Nakube omunye wenu wakhe ikumba etja kodwana wangayivula, akabuyele ekumbenakhe. Nakungasinjalo uzakufela epini bese ivulwa ngomunye umuntu. ₆Nakube omunye wenu utjele isidiribe kodwana wangagoma iinthelo zakhona, akabuyele ekhaya. Nakungasinjalo uzakufela epini bese omunye umuntu ugoma iinthelo zakhona. ₇Nakube omunye wenu sele aveze indaba kodwana wangasathatha intombakhe leyo, akabuyele ekhaya. Nakungasinjalo uzakufela epini bese enye indoda izithathela intombakhe leyo.”

₈Iinkhulu zizakuragela phambili nokukhuluma nebutho zithi: “Nakube omunye wenu unevalo entanyeni njengesirhwarhwa akabuyele ekhaya. Nakungasinjalo iinhliziyo zabafowabo zizakuphelelwa mamandla njengeyakhe.” ₉Nasele iinkhulu ziqedile ukukhuluma nebutho, kuzakubekwa iinduna ezizakurhola ibuthwelo.

₁₀Nanitjhidela eduze kwedorobho kobana nilwe nalo, thomani ngokubekelana nalo imibandela. ₁₁Nakube ipendulwalo ingeyokuthula bese linivulela amasango, boke abangaphakathi kwalo bazanenzela umsebenzi okatelelako bese bayanisebenzela. ₁₂Kodwana nakube idorobhelo alibi nokuthula nani bese lilwa nani, khona-ke nizalivimbezela, ₁₃kuzakuthi lokha uSomnini uZimenu nakalinikela ezandleni zenu, nibulale boke abaduna balo ngesabula. ₁₄Nizithathele abafazi nabantwana, ifuyo nakho koke okunye okungedorobheni, okutjho yoke ipango yalo. Nizibusise ngepango yezitha zenu leyo eniyiphiwe nguSomnini uZimenu.

₁₅Nenze soneso kiwo woke amadorobho akude nani okungasi madorobho wezizwe eziseduze. ₁₆Kodwana emadorobheni wabantu uSomnini aninikela wona njengelifa lenu, ningatjhiyi litho eliphefumulako. ₁₇Bhubhisani nya izizwe zamaRhithi nama-Amori, amaKanana namaPerizi, amaRhivi namaJebusi njengombana uSomnini uZimenu ayalile ₁₈ukuze zinganifundisi imikhuba yazo enyenyisako eziyenza nazilotjha abosingazimu bazo bese niyona phambi kwakaSomnini uZimenu.

₁₉Nanivimbezela idorobho isikhathi eside benilwe nalo ukuze nilithumbe, ningarhayili imithi yalo ngokuyikghedlha ngezembe, kodwana gomani iinthelo zayo, yeke ningayigawuli. Kanti imithi le sese ifana nabantu bonyana ningabeze niyivimbezele nayo na? ₂₀Mimithi enaziko bona akusi ngegonywako kwaphela ekumele niyirhayile beniyigawule ukuze nivimbezele ngayo idorobho elilwa nani kufikela beliwe.