PSALME ya 81

₁Hlalalelang Modimo, yena maatla a rena; le gobe megobo ya Modimo wa Jakobo.

₂Hlabang sefela, le ope meropa; letšang lekope ka bothakga, le seletšo.

₃Letšang diphalafala go balameng ga kgwedi; le mohla e tlalago e be letšatši la monyanya wa rena.

₄Gobane ke wona mokgwa wa Isiraele, ke molao wa Modimo wa Jakobo.

₅Ke bjona bohlatse bjo bo beetšwego ba Josefa mola a tšwetše Egipita dira. Ka kwa lefoko le ke bego ke sa le tsebe, le re:

₆Ke rola magetla a gagwe morwalo; diatla tša gagwe di tlogelane le seroto.

₇O be o goelela o tlaletšwe, ke go hlakodiša, ka go araba ke ikuta ka medumo; ka ba ka go leka kua meetseng a Meriba.

₈Wena setšhaba sa ka, nthaetše ke go eletše! Wena Isiraele, kwaa se ke se buago.

₉Go wena go se ke gwa ba modimo o šele; o se ke wa khunamela medimo ya ntle.

₁₀Wa gago Modimo ke nna Jehofa, ke go khudušitšego Egipita. Ahlamiša molomo, ke tle ke o tlatše.

₁₁Fela, setšhaba sa ka ga sa ka sa kwa Lentšu la ka, mme Isiraele o nkganne.

₁₂Nna ka ba lesa ba ya le bonganga bja dipelo tša bona, ba swara tsela ba itaya.

₁₃A mola setšhaba sa ka se kabe se kwe nna! A mola Isiraele a kabe a sware ditsela tša ka!

₁₄Nkabe ke kokobetša manaba a bona ka pela; nkabe ke emišetša babeki ba bona letsogo;

₁₅banyatša Morena ba kabe ba ba loba; mme mehla ya bona e kabe e eba e sa felego;

₁₆a kabe a ba fepa ka mabele a nonnego; a kabe a ba khoša dinose tša mariba.