PSALME ya 80

₁Wena Modiši wa Isiraele, wena Mohlahla Josefa boka mohlape, sekega tsebe. Wena Moukama-bakerubi, bonala.

₂Tsoša maatla a gago, o bonwe ke Efuraimi le Benyamini le Manase; o re phološe.

₃Modimo, boela o re agiše; phadimiša sefahlego sa gago, re tle re phologe.

₄Morena Modimo wa mašaba, o tlo kgaotša neng go tuka bogale ge setšhaba sago se rapela?

₅O ba lešitše bogobe bja megokgo, wa ba noša sego se segolo sa megokgo.

₆O re beetše go bakwa ke baagišani ba rena; mme manaba a rena a a re kwera.

₇Modimo wa mašaba, boela o re agiše; phadimiša sefahlego sago, re tle re phologe.

₈O epolotše morara kua Egipita, wa raka ditšhaba, wa tla wa o šema.

₉Wa o hlagolela, mme wa tsema medu, wa ba wa tlala naga.

₁₀Le dithaba tša aparelwa ke moriti wa wona; makala a wona a etša merokwana ya Modimo.

₁₁Melebo ya wona wa e pharalatša ya goma ka lewatle, le mahlogedi a wona a fihla kua nokeng.

₁₂Bjale legora la wona o reng o le phušotše, wa kgotlolwa ke bafeti bohle?

₁₃Dikolobe tša lešoka di o phenyotše; le diphofotšwana tša nageng di a o fula.

₁₄Modimo wa mašaba, boa hle o ukamele mme o bone o le kua legodimong; o hlole morara wo.

₁₅O tsoše se se šemilwego ke seatla sago, ngwana e o iphepetšego yena.

₁₆Morara wo o swile ka mollo mme wa hlahlamollwa; batho ba senyega ka kgalemo ya sefahlego sago.

₁₇Seatla sa gago a se šireletše monna wa letsogo la gago le letona, ngwana wa motho e o iphepetšego yena.

₁₈Re se kgaogane nago; re phediše, re tsebe go rerelela leina la gago.

₁₉Morena Modimo wa mašaba, boela o re agiše; phadimiša sefahlego sago, re tle re phologe.