PSALME ya 79

₁Modimo, ba ditšhaba ba hlagetše naga ya gago; ba gobošitše Ntlokgethwa ya gago; Jerusalema ba go dirile marope.

₂Ditoto tša bahlanka ba gago ba di lahletše go lewa ke manong; mebele ya bagaugelwa ba gago ba e gafetše dibata tša naga.

₃Jerusalema thoko tšohle ba tšholotše madi a bona eke ke meetse; gomme go hlokwa wa go ba boloka.

₄Re digoboga go baagišani; re a kwerwa, re nyefolwa ke ba mathoko.

₅Morena, di tlo feletša kae? A o tlo dula o befetšwe go ya go ile? A bogale bja gago bo tlo fela bo tuka boka mollo?

₆Kgalefo ya gago e thenolele ba ditšhaba ba sa go tsebego, le mebušo ya ba sa rerelelego leina la gago.

₇Gobane ba lle bagaJakobo, ba phušotše madulo a bona.

₈Se re gopolele makgopo a rena a kgale; lešoko la gago le se re diegele; gobane re notlegile ruri.

₉Re hlakodiše, wena Modimo wa go re phološa, gore go retwe leina la gago. Re namolele, o re lebalele dibe tša rena ka baka la leina la gago.

₁₀E ka bang ge baditšhaba ba ka re: Modimo wa bona o kae? A mahlo a rena a bone ge baditšhaba ba lemošwa gobane madi a bahlanka ba gago a ba a tšholotšego a na le tefetšo.

₁₁A dillo tša mathopša di fihle pele ga gago; bana ba lehu a ke a ba phološe ka bogolo bja letsogo lago.

₁₂Mme baagišani bao ba rena ba bušetše kgobošo gašupa, gobane ba gobotšitše wena Mong wa rena.

₁₃Mme rena setšhaba sa gago, rena dinku tša mafulo ago, re tlo go leboga neng le neng, ra ruta ditlogolo le ditlogolwana direto tša gago.