PSALME ya 32

₁Wa lehlogonolo ke molebalelwadikarogo, yo dibe tša gagwe di khupeditšwego.

₂Wa lehlogonolo ke motho eo Morena a sa mmalelego molato, a se nago bofora mo pelong.

₃Gobane mola ke homotše, mašapo a ka a bodile ka go hlwa ke tsetsela,

₄Ka go imelwa ke seatla sa gago mosegare le bošego; mme maatla a ka a phšile boka komelelo ya selemo.

₅Ka ba ka go bobolela sebe sa ka, ka se ke ka hlwa ke uta molato; ka re a nke ke ipobolele ka bokgopo bja ka go Morena. Mme wena wa napa wa nthola molato wa sebe.

₆Bjalo bagaugelwa ba gago bohle a ba go rapele e sa le lebaka la go ka go hwetša. Gona le mafula a meetsemagolo ge a mo tlalela, a ka se ke a mo fihlela.

₇Ke khuta ka wena, o ntwela kotsing, mme ke dikologwa ke mekgolokwane ya phologo.

₈Ke tlo go lemoša ka go ruta tsela ye o tlogo e swara, ka go eletša mahlo a ka a go ukametše.

₉Le se ke la etša pitsi le lekaba, tše di sa tsebego selo; mahlahlo a tšona a kgonwa ke megala le dithala, ge di sa tle go wena.

₁₀Yo mobe o tlo atelwa ke mahloko. E a botago Morena o tlo dikwa ke dikgaugelo.

₁₁Thabelang Morena! Baloki, hlalalang! Kwatšang mekgolokwane, lena ba dipelo tša go loka.