Moholofedi o ipata ka Morena tlalelong
Ya mohlabeledi. Sefela sa Dafida.
1Ke khuta ka wena Morena; a nke ke se lewe ke dihlong neng le neng. Ntlhakodiše, ka gobane o lokile.
2Ntshekegele tsebe, o ntlhakodiše ka pela hle. A ke o be lentswe la ka, setšhabelo; o be moago wa sebo sa go mpoloka.
3Ka gobane thaba ya ka, sebo sa ka ke wena. Ntshepediše o nketetše ka lebaka la leina la gago.
4Mphonyokgiše mo lokweng le ba ntheago ka lona, gobane bokhuto bja ka ke wene.
5Moya wa ka ke o gafetše seatleng sa gago. O ntokolotše, wena Morena Modimommotegi.
6Ke nyatša ba go ipeela medimo ya lefela. Yo nna ke mmotilego ke wena Morena.
7Ke tlo hlalala ka thabela botho bja gago, ka gobane bobotlana bja ka o bo bone, wa tseba moya wa ka o le tlalelong.
8Ga wa ka wa ntahla ka swarwa ke lenaba; o emišitše dinao tša ka molaleng o mogolo.
9Morena, nkgaugela gobane ke tlaletšwe. Mahlo a ka a lapile ka go ja pelo, le moya wa ka, le mmele wa ka.
10Gobane bophelo bo ile ka mahlomola, le nywaga ya ka e fedile ka diphegelo. Maatla a ka a onetše ka molato wa ka; ditho tša ka di rephile.
11Ke segoboga sa baagišani ba ka ka go ata ga ba ba mpekago; se segolo thata ke ge ba gešo ba ntšhoga, ba ba gahlanago le nna tseleng ba ntšhaba.
12Dipelong tša batho ke lebetšwe bo ka mohu; ke etša pitša ge e hwile.
13Ke kwa ba bantši ge ba sebelana; thoko tšohle go na le tše šiišago, ka ge ba ntakana ba re ba nkamoge bophelo.
14Gomme nna ke botile wene Morena; ke re Modimo wa ka ke wena.
15Mabaka a bophelo bja ka a mo diatleng tša gago. Nnamolele mo atleng tša manaba a ka le tša bao ba ba ntlhomerego.
16Ntebelele nna mohlanka wago fahlogo sa gago se sele; mphološe ka botho bja gago.
17Morena, a nke ke se lewe ke dihlong ge ke go biditše. Ba go lewa ke dihlong a e be ba babe bao; a ba yo homola kua bodulabahu.
18A go homole melomo ya bafori bao ba go bolela moloki ka borumolang le ka boipoti le lenyatšo.
19Botho bja gago ke bjo bogologolo bjo o bo beetšego ba go boifago, mme ba go botilego wa ba setša ka bjona, tša bonwa ke bana ba batho.
20O ba khutiša ba utame pele ga gago, ba se fihlelwe ke maano a motho; o ba uta mo ngwakong, wa ba efela kgang tša maleme.
21Morena a a lebogwe; o ntira ka botho bja matete mo motseng o tiilego.
22Gomme nna, mola ke tšhogile, ka re: O a nkgerula! Anthe o be o nkwile ge ke go llela, ke go hlabošetša lentšu.
23Ratang Morena, lena bagaugelwa ba gagwe bohle. Morena o leta ba ba botegago. Baikgogomoši o ba dira tše di ba swanetšego.
24Dirang senna, le tie maatla dipelong, lena bohle ba le letetšego yena Morena.
