PSALME ya 33

₁Hee lena Baloki, hlalalelang Morena! Direto di ratega go bailadibe.

₂Lebogang Morena ka diletšo, le mo opelele ka metato e lesome.

₃Mo hlabeleng sefela se sefsa, letšang makope le gobe megobo.

₄Gobane lentšu la Morena ke therešo; mediro ya gagwe ka moka ke ya go botega.

₅O rata toko; o rata molao; lefase le tletše botho bja Morena.

₆Magodimo a dirilwe ka lentšu la Morena; makoko ka moka a ona a dirilwe ka moya wa molomo wagwe.

₇O kgobetše meetse a lewatle boka mmoto; madiba o ipoloketše ona.

₈Lefase ka moka a le boife Morena. Baagi bohle ba legohle a ba šie yena.

₉Gobane o boletše, tša ba gona: o laile, tša rotoga.

₁₀Morena o raranya maano a bantle, o phekgola megopolo ya ditšhaba.

₁₁Mme morero wa Morena o tiile neng le neng; kgopolo tša pelo ya gagwe di eme go ya go ile.

₁₂Setšhaba sa lehlogonolo ke se Morena e lego Modimo wa sona, se a ikgethetšego sona ya ba leruo la gagwe.

₁₃Morena o okama a le kua legodimong, o bona bana ba batho ka moka.

₁₄A le gona kua mošate, o šetša bohle ba go dula mo lefaseng.

₁₅Yena mmopi wa dipelo ka moka tša bona, ke yena tlhokomedi ya mediro ya bona ka moka!

₁₆Ga go kgoši e fenyago ka bontši bja madira, le monna ga a kgone ka go ba le maatla a magolo.

₁₇Le pitsi ga e thuše selo go fenyeng; maatla a magolo a yona ga a phološe.

₁₈Tsebang gore leihlo la Morena le bona ba ba mmoifago, ba ba letetšego kgaugelo ya gagwe,

₁₉Gore a phološe meoya ya bona lehung, a ba phediše tlaleng.

₂₀Dipelo tša rena di leta morena; Mohlakodiši le kotse ya rena ke yena.

₂₁Dipelo tša rena di thabetše yena; gomme leina le lekgethwa lagwe re botile lona.

₂₂Morena, a re okamelwe ke botho bja gago, bjalo ka ge rena re go holofetše.