MATEO 22

₁Jesu a buša a bolela a ba ruta ka diswantšho, a re: ₂Mmušo wa magodimo o swana le motho wa kgoši e a diretšego morwa wa gagwe monyanya wa lenyalo. ₃A roma bahlanka ba gagwe ba yo bitša balalediwa ba monyanya; mme ba gana go tla. ₄A buša a roma bahlanka ba bangwe, a re: Botšang balalediwa le re: Tsebang, dijo tša ka ke di lokišitše; dipholo tša ka le tše di nontšhitšwego tša ka di hlabilwe, go lokile tšohle; tlang monyanyeng wa lenyalo. ₅Balalediwa ba nyatša, ba tloga e mongwe a ya tšhemong ya gagwe, e mongwe a ya papatšong ya gagwe. ₆Ba bangwe ba swara bahlanka ba gagwe, ba ba kwera, ba ba bolaya. ₇Kgoši ge e di kwa ya befelwa; ya fiša motse wa bona. ₈Bjale ya bolela le bahlanka ba yona ya re: Monyanya wona o lokišitšwe; fela, balalediwa e be e se ba o swanelago. ₉Ke gona yang kua magahlanong a ditsela, le ba biletše monyanyeng. ₁₀Mme bahlanka ba ya ditseleng, ba phutha ba ba ba hwetšago, ba babe le ba botse, ntlo ya monyanya ya tlala batho ba dutšego.

₁₁Kgoši ge e tsena go bona ba ba dutšego, ya hwetša motho e a sa aparago seaparo sa monyanya. ₁₂Ya mmotšiša ya re: Mogweraka, o tsene bjang mono o sa apara seaparo sa monyanya? Motho yoo a homola. ₁₃Kgoši ya botša bahlanka ya re: Mo tlemeng maoto le matsogo le mo ntšhetše leswiswing la kua ntlentle, mo go tlogo ba le dillo le ditsikitlano tša meno.

₁₄Gobane ba ba biditšwego ke ba bantši bahlaolwa ga ba nene.

₁₅Ke gona bafarisei ba tlogilego ba yo lakana go mo rea ka lentšu. ₁₆Ba roma barutiwa ba bona, ba ya ba na le bahlanka ba Herode, ba tla ba re: Moruti, re tseba ge o le wa go rereša; mme o ruta tsela ya Modimo ka therešo; ga o hlaole, gobane ga o bebe motho selo. ₁₇Bjale nke o re botše: Wena o reng? A go re loketše go ntšhetša Kesara motšhelo, goba ga go a re lokela?

₁₈Jesu ka go tseba bobe bja bona, a re: Le ntekelang, lena baikaketši? ₁₉Mpontšheng tšhelete ya lekgetho.

Ba mo tlišetša šeleng. ₂₀A ba botšiša a re: Ke sa mang seswantšho se, le leina le?

₂₁Bona ba re: Ke tša Kesara.

Yena a re: Gona ntšhetšang Kesara tše e lego tša Kesara; Modimo le mo ntšhetše tše e lego tša Modimo.

₂₂Ge ba ekwa a realo ba tlabega; ba mo tlogela ba sepela.

₂₃Ka lona tšatši leo gwa tla basadutsei. Ke ba ba rego: Bahu ga ba tsoge. Bona ba mmotšiša ba re: ₂₄Moruti! Moše o itše, ge motho a ehwa a se na bana, monnagwe a tšee mosadi wa gagwe, a tsošetše mogolwane peu. ₂₅Bjale mo go rena go be go na le banna ba šupago e le bana ba motho o tee. Wa pele a tšea mosadi, a hwa a se na ngwana; mosadi a šala a ba wa monnagwe. ₂₆Le go wa bobedi gwa ba bjalo, le go wa boraro, go iša go wa go šupa. ₂₇Mosadi a šala, a ba a hwa le yena. ₂₈Bjale mohla bahu ba tsogago, mosadi e tlo ba wa mang ge ba mo tšere ba šupile?

₂₉Jesu a fetola a re: Le a timela, ka gobane ga le tsebe mangwalo; le maatla a Modimo ga le a tsebe. ₃₀Mohla bahu ba tsogago, ba ka se ke ba nyala, ba ka se ke ba nyadiša. Ba tlo ba bjalo ka barongwa ba Modimo ba legodimong. ₃₁Gomme ge le mpotšiša tša tsogo ya bahu a ga le ešo la bala tše Modimo a le boditšego a re: ₃₂Ke nna Modimo wa Aborahama le Isaka le Jakobo. Modimo gomme ga se Modimo wa bahu, ke Modimo wa ba ba phelago.

₃₃Ge mašaba a ekwa ge a realo a kgotsa thuto ya gagwe.

₃₄Bafarisei ge ba ekwa gobane basadutsei o ba thibile melomo, ba tla ba mo kgobokanela. ₃₅E mongwe wa bona wa moruti wa molao a mo leka, a mmotšiša a re: ₃₆Moruti, taelo e kgolo molaong ke e fe?

₃₇Jesu a fetola a re: Še, Morena Modimo wa gago o mo rate ka pelo ya gago ka moka, le ka moya wa gago ka moka, le ka tlhaologanyo ya gago ka moka. ₃₈Ke yona taelo ya pele, yona e kgolo. ₃₉Gomme ya bobedi e lekana le yona; e re: Wa geno o mo rate ka mokgwa wo o ithatago ka wona. ₄₀Ditaelo tše pedi tše di akareditše molao ka moka le baporofeta.

₄₁Mohla bafarisei ba phuthegile, Jesu a ba botšiša a re: ₄₂Le reng ka Kriste? Ke morwa wa mang?

Bona ba re: Ke wa Dafida.

₄₃Jesu a re: Gomme Dafida, a le Moyeng, o reng ge a re: Mong wa ka a era yena ge a re: ₄₄Morena o boditše mong wa ka a re: Dula ka letsogong la ka le letona, ke be ke dire manaba a gago bogato bja nao tša gago.

₄₅Bjale Dafida ge a mo re: Mong wa ka a ka ba morwa wa gagwe bjang?

₄₆Le o tee a se kgone go mo fetola le ka lentšu le tee. Gomme go tloga mohla woo gwa se be le e a kago tlema pelo a fetolana le yena.