Jesu o omanya Bafarisei le Bamangwalo; o llela Jerusalema
1Mohla woo Jesu a bolela le mašaba a batho le barutiwa ba gagwe, a re: 2Mo sedulong sa Moshe go dutše bamangwalo le bafarisei. 3Ke gona kwang tšohle tše ba le botšago tšona, le ye ka tšona; fela, le se ke la ba etša medirong ya bona; gobane ba a bolela, mme ga ba dire. 4Ba tlema merwalo e boima e robago, mme ba e rweša batho magetleng, mola bona ba sa rate go e kgwatha le ka monwana o tee. 5Mediro ya bona ka moka ba e direla go bonwa ke batho; ba kgantšha mangwalwana a dithapelo le matobolo a dikobo tša bona. 6Menyanyeng ba kganyoga dibaka tša pele, le ditulo tša pele diphuthegong, 7Le ditumedišo mapatlelong, le go bitšwa ke batho ka la Rabi! Rabi! 8Lena le se ke la dumela leo la Rabi, gobane wa lena Moruti ke o tee, ke Kriste; mme lena ka moka le bana ba o tee. 9Le se ke la bitša wa mo lefaseng la re: Tatawešo! Gobane Tataweno ke o tee wa magodimong. 10Le se ke la bitšwa ka la Ketapele, gobane wa lena Moetapele ke o tee ke Kriste. 11E mogolo mo go lena a e be molediredi. 12Wa go ikgodiša o tlo kokobetšwa wa go ikokobetša o tlo godišwa.
13Le ba madimabe lena bamangwalo le bafarisei, lena baikaketši, ka gobane mmušo wa magodimo le o kgonyela batho, ka gobane lena ga le tsene, mme le šiteletša ba ba rego re a tsena. 14Le ba madimabe lena bamangwalo le bafarisei, lena baikaketši, ka gobane le ja malapa a bahlologadi, le ba fora ka thapelo tše telele; molato wa lena kahlolong e tlo ba o mogolo ka tšona tšeo.
15Le ba madimabe lena bamangwalo le bafarisei, lena baikaketši, ka gobane le putlaputla le lewatle le dinaga le nyaka mobaweno; mme ge le mo hweditše le mo dira ngwana wa lefsifsi e a le fetago gabedi ka bobe.
16Le ba madimabe lena basepediši le lego difofu ba le rego: Ge motho a ena ka Ntlokgethwa ga se molato; la re molato ke ge a ena ka gauta ya yona. 17Lena ditlaela le difofu! Se segolo ke eng? A ke gauta yeo, goba ke Ntlokgethwa ye gauta yeo e bago e kgethwa ka yona? 18Le re: Ge motho a ena ka aletare ga se molato; la re molato ke ge a ena ka sedimo sa mo go yona.
19Lena ditlaela le difofu! Se segolo ke eng? A ke sedimo seo, goba ke aletare ye sedimo seo e bago se sekgethwa ka yona! 20Ke gona, e a enago ka aletare, o ena ka yona le ka tše di lego mo go yona. 21E a enago ka Ntlokgethwa, o ena ka yona le ka yoo a dulago mo go yona. 22E a enago ka legodimo, o ena ka sedulo sa Modimo, le ka yoo a dutšego mo go sona.
23Le ba madimabe lena bamangwalo le bafarisei, lena baikaketši, gobane le ntšha salesome go leroto le go lenonya le go lehloko, le sa šetše tše di kgolo molaong, e lego toko kahlolong le kgaogelo le potego. Go swanetše ge go dirwa tseno, mme le tsela di se leswe. 24Lena basepediši le lego difofu, le minolotša menang, kgomo la e metša.
25Le ba madimabe lena bamangwalo le bafarisei, lena baikaketši, ka gobane sego le mogopo le di hlatswa ka ntle, mola ka gare di tletše bohodu le bojato. 26Wena mofarisei wa sefofu! Thoma ka go hlatswa sego le mogopo ka gare; ke mo di tlogo hlatswega le ka ntle.
27Le ba madimabe lena bamangwalo le bafarisei, lena baikaketši, ka gobane le swana le mabitla a a takilwego ka phepa, a a bogegago ka ntle, mola ka gare a tletše marapo a bahu le makgapha fela. 28Le lena le bjalo; ge batho ba le bona ba re le baloki, mola ka teng le tletše boikaketši le bokgopo.
29Le ba madimabe lena bamangwalo le bafarisei, lena baikaketši, ka gobane le agelela mabitla a baporofeta, le thakga mabitla a baloki; 30gomme le re: Ge e ka be e le rena mehleng yela ya botatawešo, re ka be re sa ka ra kwana le bona ge ba tšholla madi a baporofeta. 31Hleng ke gona le ipolelago gore le bana ba babolai ba baporofeta! 32Mme lena le tlo tlatšiša moela wa botataweno. 33Hee lena dinoga, matswinyana a marabe, kahlolo ya go tlo le iša moleteng wa mollo le tlo e phonyokga bjang? 34Ke yona taba yeo, ge ke le romela baporofeta le ba bohlale le bamangwalo. Ba bangwe ba bona le tlo ba bolaya la ba bapola sefapanong; ba bangwe le tlo ba otla diphuthegong, la ba hlomara la hlakanya metse. 35Ya tlo ba gona go le rolela madi a baloki bohle a a tšhollotšwego lefaseng, a tla go lena go tloga ka madi a Abele moloki go iša mading a Sakaria morwa wa Barakia yo le mmolailego gare go Ntlokgethwa le aletare. 36Ruri ke a le botša, ka moka tšeo di tlo rolelwa moloko wo.
37Hee Jerusalema! Hee Jerusalema! Wena o bolayago baporofeta, o thumago ka maswika ba ba romilwego go wena! Ke gakae ke ratile go phuthela bana ba gago boka kgogo, ge e phuthela bana ba yona ka tlase ga diphego tša yona; gomme le ganne. 38Le tlo di bona; ngwako wa lena o tlo le tlogelelwa e le lešope. 39Gobane ke a le botša go tloga bjalo le ka se hlwe le mpona go fihla ge le tlo re: Go retwe e a tlago ka leina la Morena.
