MATEO 21

₁Eitše ge ba batametše Jerusalema, ba fihlile Bethefage thabeng ya mehlware, Jesu a roma barutiwa ba babedi a re: ₂Yang motsaneng wo le lebanego nawo; le tlo tloga le hwetša pokolo e kgokilwego, e na le pokolwana. Le di tliše fa go nna. ₃Gomme ge motho a ka bolela le lena, le tlo re: Morena o a di hloka. Gona o tlo akgofa a di lesa tša tla fa.

₄Tše ka moka di diregile gore go phethege se se boletšwego ke moporofeta ge a re: ₅Botšang morwedi wa Tsione, le re: Kgoši ya gago še, e tla go wena e le yo bonolo; mme e nametše pokolo, namane ya pokolopeleša.

₆Barutiwa ba ya, ba dira ka mo Jesu a ba laetšego ka gona. ₇Ba tla le pokolo le pokolwana, ba di bea dikobo tša bona, mme ba mo nametša. ₈Lešaba le lentši la batho ba ala dikobo tša bona tseleng, ba bangwe ba rema mahlare dihlareng, ba a ala tseleng. ₉Mme mašaba a a etilego pele, le a a latelago, a goa a re: Hosiana Morwa wa Dafida! Go retwe e a tlago ka leina la Morena. Hosiana magodimodimong!

₁₀Ge a tsena Jerusalema, motse ka moka wa huduega, wa re: Ke mang yoo?

₁₁Mašaba a re: Ke Jesu moporofeta wa Natsaretha wa Galilea.

₁₂Bjale Jesu a ya Ntlongkgethwa ya Modimo, a leleka bohle ba ba bego ba bapatša le ba ba bego ba reka moo Ntlongkgethwa, a uša dithalana tša bao ba bego ba rekanya ditšhelete, a uša le ditulo tša babapatši ba maeba. ₁₃A bolela le bona a re: Go ngwadilwe gwa thwe: Ngwako wa ka o tlo bitšwa Ngwako wa thapelo; mme lena, le o dirile legolo la bahlakodi.

₁₄A le moo Ntlongkgethwa gwa tla ba difofu le ba digole, a ba fodiša. ₁₅Ge baperisita ba bagolo le bamangwalo ba bona matete ao a a dirago, ba bona le bana ba bego ba goeletša moo Ntlongkgethwa ba re: Hosiana Morwa wa Dafida, ba hlonama ka kudu. ₁₆Ba botšiša Jesu ba re: Tše ba di bolelago a o a di kwa?

Yena a fetola a re: Ee! A ga lešo la bala mo go rego: O itheetše theto ka melomo ya bana ba masea?

₁₇A ba tlogela a tšwa motseng, a ya Bethania a lala gona.

₁₈Ka moswana ge a boela motseng, a swarwa ke tlala. ₁₉A bona sehlare sa mogo se eme se nnoši hleng ga tsela. A ya go sona, a hwetša se se na selo ge e se matlakala. A bolela le sona a re: O ka se hlwe o enywa selo neng le neng. -- Mogo woo wa napa wa oma e sa le semeetseng.

₂₀Barutiwa ge ba di bona, ba tlabega ba re: Mogo o omeletše bjang ka pele?

₂₁Jesu a fetola a re: Ruri, ke a le botša, ge le ka ba le tumelo le sa belaele, le ka se ke la dira tše tša mogo fela; le tlo ba la laela le thaba ye la re: Tloga fa, o ikwetše lewatleng; gwa tlo direga ka mokgwa woo. ₂₂Mme tšohle tše le di lopago ka thapelo le dumela, le tlo di amogela.

₂₃Ya re a fihlile Ntlongkgethwa, mme a ruta, gwa tla baperisita ba bagolo le bagolo ba setšhaba, ba re: Tše o di dirago o di dira ka maatla a fe? Ke mang a go filego maatla a?

₂₄Jesu a fetola a re: Le nna ke tlo le botšiša taba e tee, ye e tlogo re ge le mpotša yona, le nna ka le botša gore ke maatla mang a ke dirago ka ona. ₂₅Kolobetšo ya Johane e be e tšwa kae? A e be e tšwa legodimong, goba e be e tšwa bathong?

₂₆Bona ba eleletša dipelong tša bona ba re: Ge re ka re e be e etšwa legodimong, o tlo re: Ge le sa ka la mo dumela le be le reng? Ge re ka re: E be e etšwa bathong, re boifa setšhaba; gobane ka moka ba re Johane ke moporofeta. ₂₇Ba fetola ba re: Ga re tsebe.

Ke mo le yena a itšego: Gona le nna ga ke le botše gore ke maatla mang a ke dirago ka ona.

₂₈Bjale le reng ka taba ye? Motho e mongwe o be a na le barwa ba babedi. A ya go wa pele a re: Morwa wa ka! Sepela o yo dira tšhemong ya ka lehono. ₂₉Morwa a fetola a re: Ga ke rate. Ka morago a itshola a ya. ₃₀Tatabo a ya go wa bobedi, a bolela nae ka mokgwa woo. Yena a fetola a re: Ee, Morena! Mme a se ye. ₃₁Bjale go ba babedi bao ke o fe e a dirilego thato ya tatagwe?

Ba fetola ba re: Ke wa pele.

Jesu a re: Ruri, ke a le botša, ba lekgetho le diotswa ba le šia ba tsena mmušong wa Modimo. ₃₂Gobane Johane o be a tlile go lena ka tsela ya toko, mme ga la ka la mo dumela; a dumelwa ke ba lekgetho le diotswa. Le ka morago, mola le šetše le di bone, ga la ka la itshola la mo dumela.

₃₃Kwang seswantšho se sengwe. Go be go le motho, mong wa ngwako e a bego a lemile tšhemo ya merara; a e agelela ka legora, a e batela lebato, a e hlomela sethala; a tsebo e gafela balemi, yena a swara leeto. ₃₄Ge go fihlile lebaka la puno, a roma bahlanka ba gagwe, a re ba yo tšea dienywa tša gagwe. ₃₅Balemi ba swara bahlanka bao; e mongwe ba mo itia; e mongwe ba mmolaya; e mongwe ba mo thuma ka maswika. ₃₆A buša a roma bahlanka ba bangwe, ba ba fetišago bala ba pele ka bontši. Le bona ba dirwa ka mokgwa woo. ₃₇A ba a roma morwa wa gagwe a re: Morwa wa ka ba tlo mmoifa. ₃₈Balemi ge ba bona yena morwa, ba lakana bare: Yo ke yena moji wa bohwa; eriyeng re mmolaye, bohwa bja gagwe bo lewe ke rena. ₃₉Ba mo swara ba mo kgoromeletša ntle ga tšhemo, ba mmolaya.

₄₀Bjale mohla mong wa tšhemo a boa, balemi bao o tlo ba dirang?

₄₁Bona ba re: Ba babe bao o tlo ba bolaya mo gobe, tšhemo a e gafela ba šele ba go tlo mo neela dienywa mabakeng a tšona.

₄₂Jesu a re: A ga le ešo la bala mangwalong mo go rego: Leswika le baagi ba le nyaditšego le bile la motheo wa sekhutlo? Tše bjalo ge di direga di tšwa go Morena; re bona e le matete.

₄₃Ke gona ke le botšago ke re: Le tlo amogiwa mmušo wa Modimo; mme o tlo fiwa setšhaba se se tlogo tšweletša dienywa tša sona. ₄₄Gomme e a tlogo wela leswika leo, o tlo dubagana; mme yoo le tlo go mo wela, le tlo mo ritaganya.

₄₅Bjale baperisita ba bagolo le bafarisei ge ba kwele diswantšho tšeo tša gagwe, ba lemoga ge a boletše bona. ₄₆Fela, le ge ba ratile go mo swara, ba upša ba boifa mašaba a batho, ka gobane ona a be a mo dira moporofeta.