LUKA 10

₁Ka lebaka le lengwe Morena a hlaola ba bangwe ba masome a šupilego, a ba roma ba mo etapele ka babedi, ba ya metseng le metsaneng ka moka ye a tlo go tla go yona. ₂A bolela le bona a re: Puno ke e ntši; mme badiri ga ba nene. Ke gona kgopelang Mong wa puno, a rome badiri punong ya gagwe. ₃Sepelang; le tsebe gobane ke le roma bjalo ka dinku gare ga diphiri. ₄Le se ke la ya le rwele sekhwama, le ge e le mokotla, le ge e le dieta; le gona le se ke la akelana le motho tseleng. ₅Mo le tsenago ngwakong, le thome go re: Ngwako wo a o be le molao! ₆Ge gona moo go ka ba le ngwana wa molao, gona molao wa lena o tlo dula go yena; ge a se gona, molao wa lena o tlo boela go lena. ₇Ngwakong woo le dule le je le nwe tše ba nago le tšona; gobane modiri o swanetšwe ke moputso wa gagwe. Le se ke la tobatoba la tšwa ngwakong wo la ya go wola. ₈Motseng wo le tsenago go wona, mme ba le amogela, le je se ba le abelago sona. ₉Le fodiše balwetši ba gona, mme le ba botše le re: Mmušo wa Modimo o batametše. ₁₀Mo le tšenago motseng, mme ba se le amogele, le tšwele mekgotheng ya gona le re: ₁₁Le lerole la motse wa lena le le re gomaretšego dinao, re le hlohlorela go lena. Fela, le tsebe gobane mmušo wa Modimo o batametše. ₁₂Gomme ke a le botša, tše motse woo o tlo go di bona ka mohla woo o tlago, -- tša Sodoma e tlo ba tše kaone.

₁₃Joo Koratšima joo! Joo Betsaida joo! Mediro e matla ye e dirilwego mo go lena ge e ka be e dirilwe motseng wa Tiro le wa Sidone, e ka be e sokologile kgale, e apere mankgeretla e dutše moloreng. ₁₄Ke fetša ka go re: Tše le tlo go di bona mohla wa kahlolo, -- tša Tiro le Sidone e tlo ba tše kaone. ₁₅Le wene Kaperenaume, o phagamišitšwe wa goma ka legodimo; o tlo theošetšwa kwa bodulabahu.

₁₆E a le kwago o kwa nna, e a le nyatšago o nyatša nna. Gomme e a nyatšago nna, o nyatša e a nthomilego.

₁₇Ba masome a šupago ba boa ba thabile, ba re: Le meoya e mebe re be re e buša ka leina la gago.

₁₈Jesu a re: Sathane ke mmone a ewa legodimong bjalo ka legadima. ₁₉Tsebang, ke le nea matla a go gata dinoga le dihpepheng, le a go fenya matla ka moka a lenaba; ga go se se tlo go ba sa le šulafatša. ₂₀Fela, le se ke la thabela tšeo, ge meoya e bušwa ke lena. Thabang gobane maina a lena a ngwadilwe kwa magodimong.

₂₁Ka lona lebaka leo Jesu a hlalala mo moyeng, a re: Ke a go leboga wena Tata Mong a legodimo le lefase, ge tšeo o di fihletše ba bohlale le ba tlhaloganyo, mme wa di utollela ba e lego bana. Go bjalo, Tata, gobane ke tšona tše o di ratilego.

₂₂Tšohle di gafetšwe nna ke Tate; gomme ga go e a hlathago Morwa, ge e se Tate; le a hlathago Tate, ge e se Morwa, le yo Morwa a ratago go mo utollela.

₂₃A retologela go barutiwa ba gagwe, a bolela le bona ba le thoko, a re: Mahlo a lehlogonolo ke ao a bonago tšeo lena le di bonago. ₂₄Gobane, ke a le botša, baporofeta ba bantši, le dikgoši ba ratile go bona tše lena le di bonago, mme ba se ke ba di bona; ba ratile go kwa tše lena le di kwago, mme ba se ke ba di kwa.

₂₅Gwa ema e mongwe wa babatamelao, a mo leka a re: Moruti, bophelo bjo bo sa felego ke tlo bo rua ge ke dirang?

₂₆Jesu a mmotšiša a re: Go ngwadilweng Molaong? O balang?

₂₇A fetola a re: Morena Modimo wa gago o mo rate ka pelo ya gago ka moka, le ka moya wa gago ka moka, le ka matla a gago ka moka, le ka tlhaologanyo ya gago ka moka; le wa geno o mo rate ka mokgwa wo o ithatago ka wona.

₂₈Jesu a re: O fetotše ka gona; dira seo, ke mo o tlo go phela.

₂₉Yena, ka go rata go ikemela, a botšiša Jesu a re: Gomme wa gešo ke mang?

₃₀Moo Jesu a fetola a re: Motho e mongwe o be a fologa a etšwa Jerusalema a ya Jeriko; mme a wela gare ga bahlakodi. Ba mo hlobodiša, ba montšha dintho, ba ikela, ba mo tlogela a le makgatheng. ₃₁Gwa tla moperisita a fologa ka tsela yeo; a re go mmona a aroga a feta. ₃₂Gwa tla le Molefi; ge a fihla felo fao, a mmona a aroga a feta. ₃₃Monna wa Samaria, e a bego a eta a tla moo a mmona, a mo gaugela. ₃₄A batamela, a mo tlemelela dintho a di tšhetše makhura le beine; a mo nametsa lekaba la gagwe, a mo iša ngwakong wa baeti, a mo okela gona. ₃₅Ka bosasa ge a tloga, a ntšha mašeleng a mabedi, a a nea mong wa ngwako, a re: Mo oke; se o tlo go mo ntšhetša sona sa fetiša seo, o tlo bušetšwa ge ke boa.

₃₆Bjale ge o bona, go ba bararo bao ke ofe a tlilego a ba wa gaboeo wa go wela gare ga bahlakodi?

₃₇Yola a re: Ke e a mo dirilego ka kgaugelo.

Jesu a re: Sepela, o yo dira ka mokgwa woo le wene.

₃₈Ya re ge a sepela, a tsena motsaneng o mongwe. Mosadi, yo leina la gagwe e lego Mareta, a mo amogela lapeng la gagwe. ₃₉Gomme o be a na le ngwanabo; leina la gagwe ke Maria. Yena eo a tla a dula fase naong tša Jesu, a theetša tše Jesu a di bolelago. ₄₀Ge e le Mareta, yena o be a swerwe ka gogolo ke go mo apeela; a ba a tla a ema moo a re: Morena, a ga o re selo ge ngwanešo a ntesa ke dira ke nnoši? A nko mmotše hle a tle a ntshwariše.

₄₁Jesu a fetola a re: Mareta! Mareta! O a belaela, o itapiša ka tše ntši. ₄₂Sa hloko ke se tee. Maria o ikgethetše yona kalebo e botse, ye a ka se kego a e amogiwa.