LUKA 9

₁Gomme a bitša ba lesome le metšo e mebedi, ba tla, a ba fa matla a go buša meoya e mebe ka moka le go e leleka, le a go fodiša malwetši. ₂A ba roma a re ba yo goelela tša mmušo wa Modimo, ba yo fodiša balwetši. ₃A ba laela a re: Le se ye le rwele morwalo, le se sware lehlotlo le ge e le mokotla, le ge e le mefago, le ge e le tšhelete; le se ke la ba le dikobo tše pedi. ₄Lapa leo le tsenago go lona le dule go lona, le be le wele tsela. ₅Ba ba sa le amogelego, motseng, wa bona le tloge le hlohlora le lerole la dinaong tša lena, gore e be bohlatse go bona.

₆Barutiwa ba tšwa ba ya le metse, ba iša ditaba tše botse, ba fodiša balwetši mo gohle.

₇Herode Teterareka a kwa tšohle tše di dirwago ke yena, a phorophora ge ba bangwe ba mmolela ba re: Johane o tsogile bahung. ₈Ba bangwe ba re: Go tšweletše Eliya. Ba bangwe ba re: Go tsogile e mongwe wa baporofeta ba kgale. ₉Herode a re: Johane ke mo kgaotše hlogo; bjale ke mang yo ke kwago ba mmolela ka tše kaakaa? Mme a kganyoga go mmona.

₁₀Baapostola bao, ba anegela Jesu tše kgolo tše ba di dirilego. Yena a tloga le bona, a ya nageng ya lešoka la kgaufsi le motse wa Betsaida. ₁₁Mašaba a batho, ge ba lemogile fao, ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa.

₁₂Ke ge letšatši le rapama. Ba lesome le metšo e mebedi ba tla go yena ba re: Gomiša lešaba le, gore ba phatlalale ba ye metsaneng le merakeng, ba inyakele tša go ja; gobane fa re dutše lešokeng.

₁₃Jesu a fetola a re: A ba fiwe dijo ke bolena.

Bona ba re: Ga re na selo ge e se dinkgwa tše tlhano le dihlapi tše pedi, ge o sa re re ye re rekele lešaba le lekaakaa le dijo. ₁₄Gomme banna ba ba bego ba le moo e nyakile go ba ba dikete tše tlhano.

Jesu a laela barutiwa ba gagwe a re: Ba dudišeng ka dihlopha tša ba masome a mahlano.

₁₅Gomme ba dira bjalo; ba ba dudiša ka moka. ₁₆Yena a tšea dinkgwa tše tlhano tšeo, le dihlapi tše pedi, a lelalela legodimong, a di šegofatša, a ngwatha a nea barutiwa, bona ba di bea pele wa lešaba. ₁₇Bohle ba ja ba hora; gwa tšewa tše ba di šadišitšego, gwa tlala diroto tše lesome le metšo e mebedi ka maratha ao.

₁₈Mohla a le thapelong, a na le barutiwa ba gagwe ba nnoši, a ba botšiša a re: Mašaba a re ke nna mang?

₁₉Ba fetola ba re: Ba re o Johane Mokolobetši. Ba bangwe ba re o Eliya. Ba bangwe ba re o Moporofeta; ba re go tsogile e mongwe wa baporofeta ba kgale.

₂₀A ba botšiša a re: Gomme lena le re ke mang?

Gwa fetola Petro a re: O Kriste wa Modimo.

₂₁Jesu a ba phegelela a ba iletša a re taba yeo ba se ke ba e botsa motho. ₂₂A re: Morwa motho o swanetše go tlaišwa ka tše ntši, le go lahlwa ke ba bagolo le baperisita ba bagolo le ba mangwalo, le go bolawa le go tsošwa ka tšatši la boraro.

₂₃A ba botša bohle a re: Ge motho a rata go ntšhala morago, a ikgafe, a rwale sefapano sa gagwe ka mehla, mme a ntatele. ₂₄E a ratago go phološa bophelo bja gagwe o tlo bo lahla; gomme e a lahlago bophelo bja gagwe ka baka laka, yena o tlo bo phološa. ₂₅Gomme motho go ka mo holang ge a ka rua lefase ka moka, mola a itahla a itshenya? ₂₆Wa maseme ka nna le ka dipolelo tšaka, le Morwamotho o tlo mo gerula mohla a tlago ka letago la gagwe le la Tatagwe le la barongwa ba bakgethwa. ₂₇Gomme ke a le botša ka go rereša, mo go ba ba emego fa go na le ba ka se kego ba kwa lehu ba sešo ba bona mmušo wa Modimo.

₂₈Ge go fetile matšatši a e ka bago a seswai a boletše ditaba tše, a tloga a na la Petro le Johane le Jakobo, a rotogela thabeng a yo rapela. ₂₉Ya re ge a sa rapela, sefahlago sa gagwe sa fetoga, le diaparo tša gagwe tša šweufala tša phadima. ₃₀Ba bona banna ba babedi ba bolela le yena; e be e le Moshe le Eliya. ₃₁Ba bonala ba le letagong; ba bolela tša pheletšo ya modiro wa gagwe wo a yago go o phetha Jerusalema. ₃₂Petro le bao ba bego ba na nae ba be ba imetšwe ke boroko; ba re go phafoga, ba bona letago la gagwe, le banna bao ba babedi ba ba emego le yena. ₃₃Ge bao ba tloga, Petro a bolela le Jesu a re: Morena, ke mo go botse re le fa; a re hlomeng mekutu e meraro; o mongwe e be wa gago; o mongwe e be wa Moše; o mongwe e be wa Eliya. A realo a sa tsebe se a se bolelago.

₃₄A sa realo gwa tla leru, la ba apeša ka thiti; ba boifa ge banna ba babedi bao ba širogela lerung. ₃₅Gwa kwala Lentšu le etšwa lerung le re: Yo ke yena Morwamoratwa waka; le mo kwe.

₃₆Ge Lentšu le le kwala, ba hwetša Jesu a le nnoši. Bona ba homola; tše ba di bonego ba se di botše motho mehleng yeo.

₃₇Ka la ka moswana ge ba fologa thabeng, ba gahlanetšwa ke lešaba le lentši. ₃₈Ba bona monna e mongwe a le gare ga lešaba, a goa a re: Moruti, ke a Go rapela, a nke o lebelele morwa waka, gobane ke a lego nnoši go nna. ₃₉Šo o a swarwe ke moya a nape a goeletše, ge o mo utlautla a ntšha mahulo; gomme o mo tlogela ka gothata ge o šetše o mo onne. ₄₀Ke kgopetše, barutiwa ba gago gore ba o leleke; mme o ba paletše.

₄₁Jesu a fetola a re: Aowii! Moloko wa ba ba sa dumelego wa ba kgopo! Ke tlo ba le lena go le gokae ke le kgotlelela? Morwa wa gago mo tliše fa.

₄₂Ya re a sa tlišwa, moyamobe wa mo akgaakga o mo utlautla Jesu a kgalema moya woo wa ditšhila a fodiša mošemanyana eo, a mo gafela tatagwe. ₄₃Ka moka ba tlabega ka bogolo bja Modimo.

Ge batho ba sa kgotsa tšohle tše Jesu a bego a di dira, yena a bolela le barutiwa ba gagwe a re: ₄₄Lentšu le a le tsene ditsebeng tša lena, ge ke re: Morwamotho o tloga a gafelwa matsogong a batho. ₄₅Fela, lentsu leo bona ga ba ka ba le kweša, le be le ba utagetše ba se le lemoge; mme ba šia go mmotšiša taba yeo.

₄₆Le gona ba be ba na le kgang ya bona, ya go re e mogolo mo go bona ke mang. ₄₇Jesu ge a bona kgopolo ya dipelo tša bona, a tšea ngwana e mongwe a mo emiša hleng ga gagwe. ₄₈A bolela le bona a re: Mang le mang e a amogelago ngwana yo leineng laka, o amogela nna; gomme e a amogelago nna, o amogela e a nthimilego. Gomme e a lego e monyenyane mo go lena bohle, ke yena a tlo go ba e mogolo.

₄₉Johane a bolela a re: Morena, re bone motho e mongwe a leleka meoya e mebe ka Leina la gago, ra mo iletša ka gobane a sa go latele le rena.

₅₀Jesu a re: Le se mo iletše; gobane e a sa lwego le rena o a re lwela.

₅₁Ge go šetše go fihla mehla ya ge a tlo tlošwa, a wela tsela a lebile motse wa Jerusalema. ₅₂A roma dimatlane kua pele ga gagwe. Ba ya ba tsena motseng o mongwe wa Basamaria, ba mo kgopelela bolao. ₅₃Batho bao ba gana go mo amogela, ka gobane a lebišitše sefahlogo Jerusalema. ₅₄Barutiwa ba gagwe, Jakobo le Johane, ge ba di bona, ba re: Morena, a o rata ge re ka re mollo o tšwago legodimong o ba fediše, re dire tše di dirilwego ke Eliya?

₅₅Jesu a retologa a ba kgalema a re: Moya wo le lego ba wona, a ga le o tsebe? ₅₆Morwamotho ga atla go senya meoya ya batho; o tlile go e phološa. -- Gomme ba ya motseng o mongwe.

₅₇Ba le tseleng ba sepela, motho e mongwe a tla a re: Ke tlo go latela mo o kago ya!

₅₈Jesu a re: Diphukubje di na le melete; le dinonyana tša sebakeng di na le dihlaga; ge e le Morwamotho ga a na mo a kago samiša hlogo.

₅₉A bitša e mongwe a re: Ntatele!

Eo a re: Morena, ntumelele ke thome go yo boloka tate.

₆₀Jesu a re: Lesa bahu ba boloke bahu ba bona; mme wena o ye o kwalakwatše mmušo wa Modimo.

₆₁E mongwe a tla a re: Ke tlo go latela, Morena; fela, o k'o ntumelelele ke thome go laela bešo.

₆₂Jesu a re: E a išitšego seatla mogomeng, mme a retologela tša kwa nthago, ga a lokela mmušo wa Modimo.