LUKA 11

₁Ya re ge Jesu a le mo gongwe mo a bego a rapela, a re go fetša, e mongwe wa barutiwa ba gagwe a mo kgopela a re: Morena, re rute go rapela, bjalo ka Johane le yena a rutile barutiwa ba gagwe.

₂Jesu a re: Ge le rapela le re: Tatawešo wa magodimong! Leina la gago a le kgethwe; mmušo wa gago a o tle; thato ya gago a e dirwe mono lefaseng bjalo ka ge e dirwa legodimong; ₃O re fe lehono bogobe bja rena bja ka mehla. ₄Re lebalele melato ya rena, gobane le rena re lebalela ba ba nago le melato go rena. O se re iše molekong; gomme o re phološe bobeng.

₅A bolela le bona a re: E ka re ge e mongwe wa lena a na le mogwera, mme a ya go yena e le mašegogare, a mo kgopela a re: Mogweraka! Nkadime dinkwa tše tharo; ₆Ke etetšwe ke mogwera waka wa moeti; mme ke hloka sa go mo apeela ka sona. ₇Wa ka ngwakong, a le re a ka fetola a re: Lesa go ntshwenya; lemati le šetše le tswaletšwe; mme bana baka ba robetše dilaong le nna; ga ke kgone go tsoga ka go fa -- A a ka realo? ₈Nna ke re: Ge a sa tsoge a mo fa ka ge e le mogweragwe, o tlo tsoga, mme tšohle tše a di nyakago o tlo mo fa ka ge a mmoboela.

₉Le nna ke re: Kgopelang, ke mo le tlo go fiwa; nyakang, ke mo le tlo go bona; opaopang, ke mo le tlo go bulelwa. ₁₀Gobane e a kgopelago o tlo tšea; e a nyakago o tlo bona; e a opaopago o tlo bulelwa. ₁₁Ke mang mo go lena, yo e lego tata go ngwana, e rego ge ngwana wa gagwe a mo kgopela bogobe, a mo fe lebje? Ge a kgopela sešeba, a mo fe noga bakeng sa hlapi? ₁₂Goba ge a kgopetše lee, a ka mo fa phepheng? ₁₃Bjale, ge ešita lena le lego ba babe, le tseba go nea bana ba lena dineo tše botse, a Tataweno wa magodimong ga a le fetiše kgole? Ba ba mo kgopelago o ba nea Moya wo Mokgethwa.

₁₄O kile a leleka moya o mobe wa semuma; ya re ge moya o mobe woo o etšwa, semuma sa bolela; gomme batho ba tlabega. ₁₅Ba bangwe ba bona ba re: O leleka meoya e mebe ka Beletsebulu mmuši wa meoya e mebe.

₁₆Ba bangwe ba tla ba mo leka, ba mo kgopela mohlolo o tšwago legodimong. ₁₇Mme yena Morena ge a bona dikgopolo tša bona, a bolela a re: Mmušo ofe le ofe ge o kgaogana, o tlo šwalalana, nywako ya welana. ₁₈Le Sathane ge a ka ikgaoganya, mmušo wa gagwe o tlo tia bjang? ₁₉Gomme ge le re nna ke leleka meoya e mebe ka Beletsebulu, ge e le barwa ba lena ba e leleka ka mang? Ke gona, baahlodi ba lena e tlo ba bona. ₂₀Bjale ge ke leleka meoya e mebe ka mono wa Modimo, ke gona ge mmušo wa Modimo o tlile go lena.

₂₁Ge mogale a letile motse wa gagwe a swere marumo, tša gagwe di tlo dula mme gwa iketlwa. ₂₂Fela, ge e a mo fetago ka bogale a mo šwahlela a mo fenya, o tlo mo amoga marumo ao a bego a botile ona, a abaganya dithebola.

₂₃E a sa emego le nna, o lwa le Nna; le e a sa kgobelego le nna, o a gašanya.

₂₄Mohla moya wa ditšhila o tšwago go motho, o putlaputla dinaga tša lesehla, o nyaka bokhutšo. Ge a bo hlokile, o tlo re: Ke tlo boela ngwakong waka, wo ke tšwilego go wona. ₂₅Ge a fihla gona, o hwetša o fsietšwe o hlophilwe. ₂₆Bjale o ye o tliše meoya e mengwe e šupilego, e o fetišago ka bokgopo, gomme ge e tsene e dula gona, mme tša motho eo bjale e yo ba tše di fetišago tša mola pele ka bobe.

₂₇Ge a sa bolela tšeo, mosadi e mongwe a hlatloša lentšu a le gare ga lešaba, a re: A lehlogonolo la mmele wo o go rwelego, le matswele a o amulego ona!

₂₈Jesu a re: Go bjalo! Wa lehlogonolo ke eo a kwago lentšu la Modimo mme a le lotola.

₂₉Mohla mašaba a bothegile, a thoma go bolela a re: Moloko wo ke o mobe, o nyaka mohlolo; mme o ka se bontšhwe mohlolo, ge e se mohlolo wa Jona moporofeta. ₃₀Gobane bjalo ka ge Jona a bile mohlolo mahlong a ba Ninife, le Morwamotho o tlo ba mohlolo mahlong a moloko wo. ₃₁Mohumagadi wa Borwa mohla wa kahlolo o tlo tsoga, a lebana le banna ba moloko wo, a ba tšwa; gobane yena o tlile a etšwa pheletšong ya lefase, a tla go kwa bohlale bja Salomo. Gomme tsebang, yo e lego e mogolo go Salomo o fa. ₃₂Banna ba Ninife mohla wa kahlolo ba tlo tsoga ba lebana le moloko wo ba o tšwa; gobane bona ba sokologile ba kwile lefoko la Jona. Gomme tsebang, yo e lego e mogolo go Jona o fa.

₃₃Ga go motho e a gotetšago lebone a le uta, goba a le ribegetša ka seroto; o tlo le hloma sehlomong sa lona, gore ba ba tsenago ba bone seetša. ₃₄Leihlo ke lona lebone la mmele. Ge leihlo la gago le lokile, mmele wa gago ka moka o tlo etša; fela, ge e le le lebe, le mmele wa gago e tlo ba wa lefsifsi. ₃₅Lebelela gore seetša sa gago se lego go wene, se se ke sa ba lefsifsi. ₃₆Gomme ge mmele wohle wa gago e le wa seetša, o se ne mo o nago le lefsifsi, gona e tlo ba seetšaetša, bjalo ka ge lebone le le phadimago le go ediša.

₃₇A sa bolela, gwa tla Mofarisei, a mo laletša a re e tle a je ga gagwe. Jesu a tsena a dula dijong. ₃₈Mofarisei ge a bona a saka a thoma go hlapa diatla ge go lewa, a kgotsa. ₃₉Morena a bolela nae' a re: Go bjalo, lena bafarisei senwelo le mogopo le di hlatswa ka ntle, mola ka teng ga lena go tletše megabaru le bokgopo. ₄₀Le mašilo! A Mmopi wa tša ntle ga se yena e a bopilego le tša ka teng? ₄₁Ge le ka be le ntšha go tše le nago natšo la hlallela badiidi, ke gona ge tšohle di ka be di le hlatswegela.

₄₂Fela, le ba madimabe lena bafarisei, gobane le ntšha salesome go leroto le lehloko le merogo, le tle le fete toko le lerato la Modimo. Go swanetše ge go dirwa tšeno mme le tšela di se leswe.

₄₃Le ba madimabe lena bafarisei, gobane le kganyoga ditulo tša kwa pele mo diphuthegong le ditumedišo dikgorong. ₄₄Le ba madimabe lena bamangwalo le bafarisei, le baikaketši, gobane le swana le mabitla a pupeditšwego, ao batho ba a gatago ba sa tsebe.

₄₅Ke mo e mongwe wa babatamelao a fetotšego a re: Moruti, ge o realo o omanya le rena.

₄₆Jesu a re: Le lena ba melao le ba madimabe, gobane batho le ba rweša merwalo e robago; mme lena merwalo yeo ga le e kgwathe le ka monwana o tee wa lena. ₄₇Le ba madimabe ge le agelela mabitla a baporofeta, mola ba bolailwe ke botataweno. ₄₈Le bjale le sa ipolela go kwana le mediro ya botataweno; ge bona ba ba bolaile lena le a ba agelela. ₄₉Ke tšona tše bohlale bja Modimo bo di boletšego bja re: Ke tlo ba romela baporofeta le batseta; gomme ba tlo bolaya ba bangwe ba bona, ba tlo ba tlaiša, ₅₀gore go moloko wo go tle go latišwe madi a baporofeta bohle, a a tšholotšwego go tloga go theweng ga lefase, ₅₁go thoma ka madi a Abele go iša mading a Sakaria e a bolailwego gare ga aletare le Ntlokgethwa. Go bjalo; ke a le botša, a tlo latišwa go moloko wo.

₅₂Le ba madimabe lena babatamolao, gobane le tšere sekgonyu sa tsebo; lena beng ga la ka la bula la tsena; mme ba ba rego re tsene, le a ba thibela.

₅₃Ge a boletše taba yeo, bamangwalo le bafarisei ba thoma go mo potlakela ka kudu, le go mo hlohla ka ditaba tše ntši, ₅₄e le go mo thea go tsoma lentšu la molato, le le kago tšwa molomong wa gagwe.