LEFITIKO 19

₁Morena o boletše le Moshe a re: ₂Bolela le phuthego ka moka ya Baisiraele, o ba botše o re: Bang ba bakgethwa, gobane nna Morena Modimo wa lena ke e Mokgethwa. ₃Mang le mang a boife mmagwe le tatagwe; le hlokomele disabatha tša ka. Ke nna Morena Modimo wa lena.

₄Le se ke la leba medimong e šele; Le se ke la itirela medimo ya diswantšho. Ke nna Morena Modimo wa lena.

₅Ge le tlišetša Morena sedimo sa lena sa seleboga, le tliše se le kago thabelwa ka sona. ₆Le se je ka lona tšatši leo se hlabjago ka lona le ka le le hlatlamago; se se kago šalela tšatši la boraro, se fišwe ka mollo. ₇Gobane ge se ka lewa ka tšatši la boraro, se tlo ba se nkga, se sa thabiše. ₈E a se jago o oba molato; ka gobane o goboša sekgethwa sa Morena; motho e mobjalo a ripiwe setšhabeng sa gabo.

₉Ge le buna mašemo a lena, le šie mathokong; o se ke wa budutša. ₁₀Le mo serapeng sa gago sa merara o se ke wa budutša, o se ke wa kgobela dipudutša; o di tlogelele badiidi le baeti. Ke nna Morena Modimo wa gago.

₁₁Le se ke la utswa. Le se ke la aketša. Le se ke la forana. ₁₂Le se ke la ena maaka ka leina la ka; e tlo ba go goboša leina la Modimo wa gago. Ke nna Morena Modimo wa gago.

₁₃O se ke wa pateletša wa geno; o se ke wa mo hlakola; yo o mo thwetšego ka letšatsi, o se ke wa lala o mo timile moputso. ₁₄O se ke wa roga sefoa; o se ke wa beela sefofu taledi. O boife Modimo wa gago, nna Morena.

₁₅O se ke wa hlaola kahlolong; o se ke wa beba sefahlogo sa mmotlana, goba wa boifa sefahlogo sa e mogolo; ge o ahlolela wa geno o se ke wa hlaola. ₁₆O se ke wa ba moneanyi mo setšhabeng sa geno; o se ke wa bolaiša wa geno tshekong. Ke nna Morena.

₁₇O se ke wa hloya ngwaneno pelong ya gago; go kgalema o mo kgaleme, gore o se tlo ikobela molato ka yena. ₁₈O se ke wa itefetša; O se ke wa dula o befeletšwe wa geno go ya go ile. Wa geno o mo rate ka mokgwa wo o ithatago ka wona. Ke nna Morena.

₁₉Hlokomelang melao ya ka. O se ke wa gwediša dikgomo tša gago ka seruiwa sa mohuta o šele. Mo tšhemong ya gago o se ke wa bjala dipeu tša mehuta e mebedi. O se ke wa apara kobo ye e logilwego ka dihlale tša mehuta e mebedi.

₂₀Ge monna a ka robala le mosadi wa molata e a beeleditšwego ke e mongwe, a sešo a lopollwa, a sešo a hunologa, a otlwe; a se ke a bolawa, ka gobane o be a sešo a lokollwa. ₂₁A tlišetše Morena selefa mojako wa Ngwako wa Kgwerano, e be kgapana ya selefa. ₂₂Moperisita a mo direle poelanyo pele ga Morena ka kgapana yeo ya selefa, ka baka la sebe se a se dirilego; ke mo a tlogo lebalelwa sebe se a se dirilego.

₂₃Ge le fihlile kua nageng yela, mme le tlo ba le bjetše dihlare tše di lewago, le thome go ila dienywa tša tšona nywaga e meraro, eke ke tša bošoboro bja tšona; go fele nywaga e meraro di sa lewe. ₂₄Ka ngwaga wa bone dienywa tša tšona e be tše kgethwa, tša go leboga Morena. ₂₅Ka ngwaga wa go fetša seatla ke gona le kago ja dienywa tša tšona, la ikgobelela e le tše ntši. Ke nna Morena Modimo wa lena.

₂₆Le se ke la ja se se nago le madi a sona. Le se ke la dira bophala le ge e le bonoge. ₂₇Le se ke la boolwa tlopo hlogong; o se ke wa boola mathoko a maledu a gago. ₂₈Le se ke la hlabelwa mebele ya lena, ka baka la mohu, mme le se ke la itlhaba dipadi ka legare. Ke nna Morena.

₂₉O se ke wa goboša morwedi wa gago ka go mo diriša bootswa; gore naga e se be le bootswa, ya tlala bohlola. ₃₀Hlokomelang disabatha tša ka; mme le boife sekgethwa sa ka. Ke nna Morena.

₃₁Le se ke la ya go ba malopo le go ba didupe; le se ke la botšiša bona, gore ba se tlo le tšhilafatša. Ke nna Morena Modimo wa lena.

₃₂Ge o lebana le hlogo e pududu o eme; sefahlogo sa mokgalabje o se hlomphe; gomme o boife Modimo wa gago, nna Morena.

₃₃Ge moeng a diiletše go lena mo nageng ya geno, le se ke la mo pateletša. ₃₄Moeng e a diiletšego go lena a dule go lena bjalo ka motho wa geno e a tswaletšwego gae. O mo rate ka mokgwa woo o ithatago ka wona; ka gobane le lena le kile la ba badiiledi nageng ya Egipita. Ke nna Morena Modimo wa lena.

₃₅Le se ke la dirana ka maanomabe kahlolong, le mohla le elelanago ka moelo wa botelele, le wa boima, le wa go tlala. ₃₆Go lena go be le kelo ye e lokilego ya go ela boima, le ya go ela mabele, le ya go ela meetse. Ke nna Morena Modimo wa lena e a le ntšhitšego nageng ya Egipita. ₃₇Hlokomelang melao ya ka ka moka le ditaelo tša ka ka moka. Ke nna Morena.