LEFITIKO 20

₁Morena o boletše a re: ₂Botša Baisiraele o re: Moisiraele ofe le ofe, goba o šele e a diiletšego go Baisiraele, e a ntšhetšago Mologo ngwana wa gagwe, o tlo hwa lehu; setšhaba sa naga ye se mo thume ka maswika. ₃Gomme nna, motho e mobjalo ke tlo mo hlaba ka mahlo, ka ba ka mo fediša mo setšhabeng sa gabo, ka gobane o neetše Mologo ngwana wa gagwe; o tšhilafatša sekgethwa sa ka, o goboša leina la ka le lekgethwa. ₄Ge setšhaba sa naga yeo se sa re selo ge motho a ntšhetša Mologo ngwana wa gagwe, ge se sa mmolaye, ₅gona e tlo ba nna ke tlo go hlaba motho eo ka mahlo, le ba moloko wa gagwe, ka ba ka mo fediša setšhabeng sa gabo, le bohle ba ba otswitšego ba latela Mologo.

₆Ge motho a eya go ba maphalo, le go dinoge, a ba latela bootsweng bja bona, ke tlo mo hlaba ka mahlo, ka ba ka mo fediša setšhabeng sa gabo. ₇Ikgetheng le be ba bakgethwa, ka gobane ke nna Morena Modimo wa lena. ₈Hlokomelang melao ya ka, le dire se se bolelwago ke yona; ka gobane ke nna Morena; ke le dira ba bakgethwa.

₉E a rogago tatagwe goba mmagwe a hwe lehu. O rogile tatagwe le mmagwe; o na le molato wa madi.

₁₀Ge motho a dira bootswa le mosadi wa e mongwe, a senya mosadi wa wa gabo, monna eo le mosadi eo wa seotswa ba hwe lehu. ₁₁Ge monna a ka robala le mosadi wa tatagwe, o hlobodiša tatagwe, bona ba hwe lehu ka babedi; ba ne molato wa madi. ₁₂Motho e a robalago le ngwetši ya gagwe, ba hwe lehu ka babedi; ba dirile bohlola; ba ne molato wa madi. ₁₃Monna e a robalago le monna e mongwe ka mokgwa wa go robala le mosadi, ba dirile botšopša; ba hwe lehu; ba ne molato wa madi. ₁₄Ge monna a ka tšea mosadi, mme a tšea le mmago mosadi yo, gona yena le basadi bao ka babedi ba fišwe ka mollo, gore mo go lena go se ke gwa ba le bohlola. ₁₅Ge monna a ka robala le seruiwa, a hwe lehu; le sona seruiwa se bolawe. ₁₆Le mosadi ge a ka batamela seruiwa, a goelwa ke sona, gona o bolaye mosadi eo le seruiwa seo; o na le molato wa madi, le seruiwa se nawo.

₁₇E a tšeago kgaetšedi ya gagwe, morwedi wa tatagwe goba wa mmagwe, a robala nae ba kwane, ke leepo; o tlo fedišwa, ba gabo ba tlo di bona. O hlobodišitše kgaetšedi; o obile molato. ₁₈Ge monna a robala le mosadi a sa hlapa, a mo hlobodiša a na le madi a teng, le mosadi a hlobodiša madi a teng bobedi bja bona ba fedišwe setšhabeng sa gabo.

₁₉O se ke wa hlobodiša mmangwanago goba rakgadiago, ka gobane ke go hlobodiša madi eno, ke go oba molato. ₂₀Ge monna a ka robala le mosadi wa ngwanabotatagwe, ba tlo rwala sebe sa bona; ba tlo hwa ba se na bana. ₂₁Ge monna a ka tšea mosadi wa ngwanabo, ke bohlola; o hlobodiša ngwanabo; ba tlo hloka bana.

₂₂Hlokomelang melao ya ka ka moka, le ditaelo tša ka ka moka; le dire ka mo di bolelago ka gona; gore naga ye ke le išago go yona gore le dule go yona, e se ke ya le hlatša. ₂₃Le se ke la swara ka tsela ya ditšhaba tše ke tlogo di raka ge le fihla; ka gobane bona ba dirile dilo tšeo, gomme ke belekegile ka tšona. ₂₄Bjale lena ke le boditše ka re: Le tlo tšea naga yeo ya bona; mme nna ke tlo le nea naga yeo ya ba ya lena, naga e elago maswi le nose. Ke nna Morena Modimo wa lena; ke nna ke le hlaotšego mo gare ga ditšhaba. ₂₅Le lena hlaolang diphoofolo tše di sekilego go tše di sa sekegago, le dinonyana tše di sa sekegago go tše di sekilego; gore le se itšhilafatše ka diphoofolo le ka dinonyana le ka digagabi tša lefase, tše ke di hlaotšego ka re le di ile. ₂₆Le be bakgethwa ba ka, ka gobane nna Morena ke e Mokgethwa; gomme ke hlaotše lena mo ditšhabeng gore le be ba ka.

₂₇Ge monna goba mosadi ba na le moya wa malopo le ge e le wa bonoge, ba hwe lehu; ba thungwe ka matlapa: ba obile molato wa madi.