LEFITIKO 18

₁Morena o boletše le Moshe a re: ₂Bolela le Baisiraele o re: Nna Morena ke Modimo wa lena. ₃Le se ke la dira tša ba naga ya Egipita ye le kilego la dula go yona, le ge e le tša ba naga ya Kanana ye ke le išago go yona; le se ke la di dira, le se ke la tšea mekgwa ya bona. ₄Le dire se se laetšwego ke nna, le hlokomele melao ya ka, le sware ka tsela ya yona. Ke nna Morena Modimo wa lena. ₅Hlokomelang melao ya ka le ditaelo tša ka, tše e rego ge motho a dira ka mo di bolelago, a phela ka tšona. Ke nna Morena.

₆Motho a se ke a batamela mosadi e lego motswalo wa gagwe a mo hlobodiša. Ke nna Morena. ₇O se ke wa hlobodiša tatago le ge e le mmago; ke mmago, o se ke wa mo hlobodiša. ₈O se ke wa hlobodiša mosadi wa tatago; ke go hlobodiša tatago. ₉O se ke wa hlobodiša kgaetšedi ya gago e lego morwedi wa tatago, le ge e le morwedi wa mmago; e ka ba e a tswaletšwego gae goba e a tswaletšwego go šele. O se ke wa mo hlobodiša. ₁₀O se ke wa hlobodiša morwedi wa morwa wa gago, le ge e le morwedi wa morwedi wa gago; ke go itlhobodiša. ₁₁O se ke wa hlobodiša morwedi wa mosadi wa tatago, e a tswetšwego ke tatago; o se ke wa mo hlobodiša. ₁₂O se ke wa hlobodiša kgaetšedi ya tatago; o tswetšwe le tatago. ₁₃O se ke wa hlobodiša monyanana wa mmago, gobane o tswetšwe le mmago. ₁₄O se ke wa hlobodiša ngwanabotatago; o se ke wa batamela mosadi wa gagwe; ke mmago. ₁₅O se ke wa hlobodiša ngwetši wa gago; ke mosadi wa morwa wa gago; o se ke wa mo hlobodiša. ₁₆O se ke wa hlobodiša mosadi wa monnago; ke go hlobodiša monnago. ₁₇O se ke wa hlobodiša mosadi le morwedi wa gagwe, goba wa morwedi wa gagwe; o se ke wa mo tšea wa mo hlobodiša; ke metswalo, e ka ba bohlola. ₁₈O se ke wa tšea monnago mosadi wa gago wa tsoša lehufa ge o mo hlobodiša hleng ga gagwe a sa phela.

₁₉Le gona o se ke wa batamela mosadi ge a sa hlapile wa mo hlobodiša. ₂₀O se ke wa robala le mosadi wa wa geno; e tlo ba go itšhilafatša ka go dira tše bjalo. ₂₁Ngwana wa gago o se ke wa mo gafela Mologo, gore o se goboše leina la Modimo wa gago. Ke nna Morena. ₂₂O se ke wa robala le monna wa mo dira mosadi. Ke botšopša. ₂₃O se ke wa robala le seruiwa wa itšhilafatša ka go dira tše bjalo; le mosadi a se ke a ema a goelwa ke seruiwa; ke bohlola bjo bo tšhošago.

₂₄Le se ke la itšhilafatša ka tše bjalo; ka gobane ba ba itšhilafaditšego ka tšona tšeo ka moka ke ba ditšhaba, ba ke tlogo ba raka ge le fihla. ₂₅Naga e bile e tšhilafetše; ke tlo latiša bokgopo bja yona mo go yona. Naga e tlo hlatša beng ba yona. ₂₆Ge e le lena, hlokomelang melao ya ka le ditaelo tša ka; le se sengwe sa botšopša bjoo se se ke sa dirwa ke wa geno, e ka ba e a tswaletšwego gae goba modiiledi e a diiletšego go lena. ₂₇Ka gobane botšopša bjoo bo dirilwe ka moka ke batho ba naga yeo, mola le sešo la fihla; mme naga e tšhilafetše. ₂₈Bo ileng, gore naga e se tlo hlatša le lena ge le ka e tšhilafatša, bjalo ka ge e hlatša ditšhaba tšeo le di hwetšago ge le fihla. ₂₉Ka gobane e a dirago se sengwe sa botšopša bjoo ka moka, ke tlo mo ripa ka mo ntšha setšhabeng sa gabo.

₃₀Lena hlokomelang tše di beilwego ke nna, le hlaswe mekgwa ya botšopša ye e dirilwego le sešo la fihla, gore le se ke la itšhilafatša ka yona. Ke nna Morena Modimo wa lena.