JOHANE 6

₁Ka le lengwe lebaka Jesu a tloga a selela mošola wa lewatle la Galilea, la Tiberia. ₂A latelwa ke lešaba le lentši la batho, ka gobane ba be ba bona mehlolo ye a bego a e dira go balwetši. ₃Jesu a namela thaba a dula gona a na le barutiwa ba gagwe. ₄Ke ge monyanya wa Bajuda wa Paseka o le kgauswi. ₅Jesu ge a emiša mahlo a bona lešaba le lentši le etla go yena, a botšiša Filipi a re: Re tlo reka kae dinkgwa gore batho bao ba je? ₆Ge a realo e be e le go mo leka, gobane yena o be a tseba se a tlogo se dira.

₇Filipi a fetola a re: Dinkgwa tša mašeleng a makgolo a mabedi di ka ba hlaela le ge e mongwe le e mongwe a ka tšea mo gonyane.

₈Gwa bolela e mongwe wa barutiwa ba gagwe, ke Andrea ngwanabo-Simone Petro; ₉A re: Go na le mohlankana e a nago le dinkgwa tše tlhano le dihlapi tše pedi; fela, tšeo ke eng ge batho e le ba bakaakaa?

₁₀Jesu a re: Bokanyang batho fase. Gomme felo fao bjang e be e le bjo bontši; gwa bokana banna ba e ka bago ba dikete tše tlhano. ₁₁Jesu a tšea dinkgwa tšeo, a leboga, a nea barutiwa, barutiwa ba abela ba ba dutšego; le dihlapi a ba abela ka mo ba bego ba rata. ₁₂Ge ba hoše, a laela barutiwa ba gagwe a re: Kgobelang maratha a šetšego, gore go se lahlege selo. ₁₃Ba a kgobela ba tlatša diroto tše lesome la metšo e mebedi ka maratha a dinkgwa tšeo tše thlano, a a šadišitšwego ke ba ba llego.

₁₄Bjale batho ge ba bona mohlolo woo Jesu a o dirilego, ba re: Ka kgonthe ke yena Moporofeta wa go tla lefaseng. ₁₅Gomme Jesu, ka ge a tseba gore ba tlo tla ba mo goga gore ba mmee kgoši, a ba ngwegela a boela thabeng a nnoši.

₁₆Ge e šetše e le mantšiboa, barutiwa ba gagwe ba fologela lewatleng. ₁₇Ba namela leselawatle, ba boela mošono wa lewatle, motseng wa Kaperenaume. Ke ge leswiswi le šetše le swere; mme Jesu o be a sešo a tla go bona. ₁₈Lewatle lona la tsošwa ke phefo e kgolo e tšutlago. ₁₉Ya re ge ba sa sela, ba feditše sebaka se e ka bago dikgato tše dikete tše tharo le go fetiša fao, ba bona Jesu a sepela godimo ga lewatle, a batamela leselawatle; gomme ba boifa. ₂₀Yena a bolela le bona a re: Ke nna! Se boifeng! ₂₁Ya ba gona ba ratilego ge a tla go bona leselawatleng. Gomme leselawatle le se hlwe le diega go fihla nageng ye ba bego ba eya go yona.

₂₂Ka la ka moswana batho ba ba bego ba eme mošono wa lewatle, ba bona ge go se na leselawatle le lengwe moo, ge e se leo barutiwa ba le nametšego. Gomme ba be ba bone ge Jesu a sa ka a namela le bona barutiwa, ba tlogile ba nnoši. ₂₃Le a mangwe maselawatle a tšwago Tiberia, a be a ile felo fala ba llego dinkgwa ka tšhegofatšo ya Morena. ₂₄Batho bao ge ba bona Jesu a se gona fao, le barutiwa ba se gona, ba namela maselawatle ba tla Kaperenaume ba nyaka Jesu.

₂₅Ba tla ba mo hwetša mošono wa lewatle, ba mmotšiša ba re: Moruti, o tlile neng mono?

₂₆Jesu a fetola a re: Ruri, ruri ke a le botša, ga le nnyake ka gobane le bone mohlolo; Le nnyaka ka gobane le lle dinkgwa tšela la hora. ₂₇Le se ke la phegelela dijo tše di felago. Phegelelang dijo tše di tlogo dula di le gona go iša bophelong bjo bo sa felego, tše Morwamotho a tlogo le fa tšona, gobane ke yena yo Modimo a mmeilego seka sa gagwe sa bohlatse.

₂₈Bjale ba mmotšiša ba re: Re ka reng gore re dire mediro ya Modimo?

₂₉Jesu a fetola a re: Modiro ke gore le dumele Moromiwa wa gagwe.

₃₀Bona ba re: O tlo dira mohlolo ofe wa gore re bone re go dumele? O tlo dirang? ₃₁Botatawešo ba lle Mana lešokeng, bjalo ka ge go ngwadilwe gwa thwe: O ba file bogobe bjo bo tšwago legodimong, ba ja.

₃₂Jesu a re: Ruri, ruri, ke a le botša, ga se Moshe e a le neilego bogobe bjoo bo tšwilego legodimong. Ke Tate wa go le nea bogobe bja makgonthe bjo bo tšwago legodimong. ₃₃Gobane bogobe bja Modimo ke yena Mofologalegodimong, wa go fa lefase bophelo.

₃₄Bona ba re: Morena! Re fe bogobe bjoo ka mehla.

₃₅Jesu a re: Bogobe bja bophelo ke nna. E a tlago go nna a ka se ke a kwa tlala; e a ntumelago a ka se ke a ba a nyorwa. ₃₆Fela, lena ke le boditše ka re: Le ge le mpone, ga le ntumele. ₃₇Bohle ba Tate a nneago bona, ba tla go nna; gomme e a tlago go nna, nka se ke ka mo lelekela ntle. ₃₈Gobane ge ke fologile kua legodimong, ga ka tlela go dira thato ya ka; ke tlile go dira thato ya e a nthomilego. ₃₉Gomme thato ya Tate e a nthomilego ke gore ke se lahle le o tee wa ba a nneilego bona, bohle ke ba tsoše ka tšatši la mafelelo. ₄₀Gomme thato ya e a nthomilego ke gore mang le mang a bonago Morwa mme a mo dumela, a be le bophelo bjo bo sa felego, ke mo tsoše ka tšatši la mafelelo.

₄₁Bajuda ba mo tsota ka ge a itše: Ke nna bogobe bjo bo fologilego legodimong. ₄₂Ba re: A ga se yena Jesu morwa wa Josefa yo re tsebago tatagwe le mmagwe? Bjale o bolela bjang ge a re: Ke fologile legodimong?

₄₃Jesu a re: Lesang go tsota seng sa lena. ₄₄Ga go motho e a kgonago go tla go nna, ge a sa gogwe ke Tate e a nthomilego; gomme ke nna ke tlogo mo tsoša ka tšatši la mafelelo. ₄₅Baporofeta ba ngwadile ba re: Bohle e tlo ba ba rutilwego ke Modimo. Bohle ba ba kwago tše Tate a di boletšego mme ba ithuta, ba tla go nna. ₄₆Ga se gore motho o kile a bona Tate; e a mmonego ke eo a tšwago go Modimo. Ke yena a bonego Tate. ₄₇Ruri, ruri, ke a le botša, e a ntumelago o na le bophelo bjo bo sa felego. ₄₈Bogobe bja bophelo ke nna. ₄₉Botataweno ba lle mana lešokeng, moka ba hwa. ₅₀Bogobe šebo bjo bo fologago legodimong, bjo motho a bo jago a se hlwe a ehwa. ₅₁Bogobe bjoo bja go phela, bjo bo fologilego legodimong, ke nna. Ge motho a eja bogobe bjo bja ka, o tlo phela go ya go ile. Gomme bogobe bjo nna ke tlogo bo ntšha gore lefase le phele, ke nama ya ka.

₅₂Ke mo Bajuda ba tšerego kgang seng sa bona, ba re: Motho e a ka re nea bjang nama ya gagwe ra e ja?

₅₃Jesu a re: Ruri, ruri, ke a le botša, ge le sa je nama ya Morwamotho la nwa madi a gagwe, le ka se be le bophelo mo teng ga lena. ₅₄E a nago le bophelo bjo bo sa felego ke eo a jago nama ya ka a nwa madi a ka, mme nna ke tlo mo tsoša ka tšatši la mafelelo. ₅₅Gobane nama ya ka ke sona selewalewa, mme madi a ka ke sona senwewanwewa. ₅₆E a jago nama ya ka, mme a nwa madi a ka o tlo dula e le wa ka, le nna ke le wa gagwe. ₅₇E a ntšago o tlo phela ka nna, bjalo ka ge nna ke phela ka Tate, yena Tatemophedi e a nthomilego. ₅₈Šeboo bogobe bjo bo fologilego legodimong. Ga bo etše bjola bjo botataweno ba bo llego lešokeng, ba fela ba ehwa. E a jago bogobe bjo, o tlo phela ka go sa felego.

₅₉Ke tšona Jesu a di boletšego ge a ruta phuthegong ya Kaperenaume.

₆₀Bjale barutiwa ba bantši ba gagwe ge ba ekwa a realo, ba re: Polelo ye ke e thata; a ka kwewa ke mang?

₆₁Jesu ka go tseba se barutiwa ba gagwe ba dumadumago ka baka la sona, a ba botšiša a re: A seo ke se boletšego se a le kgopiša? ₆₂Le tlo reng ge le bona Morwamotho a rotogela mo a bego a le gona pele? ₆₃Se se phedišago ke Moya, nama ga e thuše selo. Mantšu a ke le botšago ona ke Moya le bophelo. ₆₄Fela, mo go lena go na le ba bangwe ba ba sa dumelego. Gobane go tloga mathomong Jesu o be a tseba gore ba ba dumelago ke bafe, le gore e a tlogo mo eka ke mang. ₆₅A bolela a re: Ke ka baka leo ke le boditšego ka re: Ga go e a kago tla go nna, ge a sa fiwe ke Tate.

₆₆Go tloga moo ba bantši ba barutiwa ba gagwe ba gomela morago, ba se hlwe ba sepela le yena. ₆₇Jesu a botšiša ba lesome la metšo e mebedi a re: Afa le lena ga le rate go tloga?

₆₈Simone Petro a fetola a re: Morena! Re tlo tloga re leba go mang? O na le mantšu a bophelo bjo bo sa felego. ₆₉Gomme rena re dumetše ra tseba ge o le Kriste Morwa wa Modimo e a phelago.

₇₀Jesu a fetola a re: A ga nka ka le hlaola la ba ba lesome la metšo e mebedi? Gomme e mongwe wa lena ke Diabolo. ₇₁O be a era Judase morwa wa Simone Isikariothe, gobane ke yena a bego a tlo mo eka, e le e mongwe wa ba lesome la metšo e mebedi.