JOHANE 7

₁Go tloga moo Jesu a sepela le naga ya Galilea; o be a sa rate go sepela le naga ya Juda, ka gobane Bajuda ba be ba rata go mmolaya. ₂Ke ge monyanya wa Bajuda wa go hloma mešaša o batametše. ₃Bana babo ba bolela le yena ba re: Sepela o ye nageng ya Juda, gore le barutiwa ba gago ba bone mediro ye o e dirago. ₄Gobane ge motho a rata go tšwelela pepeneneng, ga a fele a dira kutamong. Ge o dira tšeo, iponatše go lefase. ₅Gobane le bana babo ba be ba sa mo dumele.

₆Jesu a fetola a re: Lebaka la ka ga le ešo la ba gona; la lena lebaka le dula le le gona. ₇Lefase le ka se le hloye, mola nna le ntlhoile ka ge le hlatsela ke re mediro ya lona ke e mebe. ₈Lena rotogelang monyanyeneng wo. Nna ga e ešo ya ba go rotogela ga ka monyanyeng wo, gobane lebaka la ka ga le ešo la phethega. ₉A realo, a šala Galilea.

₁₀Ya re ge bana babo ba rotogile, le Yena a rotogela monyanyeng, e sego pepeneneng; a ya bjalo ka eke o a ikuta. ₁₁Kua monyanyeng Bajuda ba mo nyaka ba re: Motho eo o kae?

₁₂Go mmelaela ya ba mo gogolo mašabeng a batho. Ba bangwe ba re: O lokile. Ba bangwe ba re: Aowa, o aroša setšhaba. ₁₃Gwa se be e mmolelago pepeneneng, ka gore ba be ba boifa Bajuda.

₁₄Ya re mola monyanya o šetše o hlakane, Jesu a rotogela Ntlongkgethwa a ruta. ₁₅Bajuda ba tlabega ba re: Naa motho e mangwalo o a tseba bjang a sa rutwa?

₁₆Jesu a fetola a re: Thuto ya ka ga se ya ka; ke ya e a nthomilego. ₁₇Ge motho a rata go dira se se ratwago ke yena eo, o tlo lemoga ge thuto ye e le e tšwago go Modimo, ke sa bolele tša ka. ₁₈E a bolelago tša gagwe, o rata gore go tumišwe yena. E a ratago gore go tumišwe e a mo romilego, ke yena wa go rereša, mme ga a na bokgopo. ₁₉A ga ke re Moshe o le neile Molao, mme mo go lena gwa se be le e a dirago se Molao o se bolelago. Le reng ge le rata go mpolaya?

₂₀Lešaba la fetola la re: O ne moyamobe! Ke mang e a ratago go go bolaya?

₂₁Jesu a re: Ke modiro o tee wo ke o dirilego, la kgotsa ka moka. ₂₂Moshe o le neile molao wa lebollo, e se go re le thomile ka Moshe; le tšwa go botataweno; gomme le bolotša motho ka Sabatha. ₂₃Bjalo ge motho a bolotšwa ka Sabatha gore go se selwe molao wa Moshe, le reng le mpefelelwa ge ke fodišitše motho mmele ka moka ka Sabatha? ₂₄Lesang go hlaola ge le ahlola. Ahlolang ka maohlolelo wa go loka.

₂₅Ke mo ba bangwe ba Jerusalema ba itšego: A ga se yo ba ratago go mmolaya? ₂₆Bjale šo o bolela pepeneneng, mme ga ba mmotše selo. A fae ba bagolo ba lemogile ge e le yena Kriste? ₂₇Fela, yo re tseba mo a tšwago. Gomme Kriste mohla a tlago go ka se tsebe motho mo a tšwago.

₂₈Bjale Jesu ge a ruta Ntlongkgethwa, a hlaboša lentšu a re: Nna le a ntseba; le mo ke tšwago le a go tseba. Fela, ge ke tla, ga ka itliša; o gona ruri e a nthomilego, yo le sa mo tsebego. ₂₉O tsebja ke nna, gobane ke tšwa go yena; gomme o nthomile.

₃₀Bjale ba rata go mo swara; fela, gwa se be le e a mo išago seatla, ka gobane lebaka la gagwe le be le sešo la tla. ₃₁Mo setšhabeng go be go na le ba bantši ba mo dumelago, ba re: Kriste, mohla a tlago, a o tlo dira mehlolo e kago feta ye e dirilwego ke yena yo?

₃₂Bafarisei ba kwa setšhaba ge se dumaduma, se mmolela ka ditaba tšeo. Ke mo bona bafarisei le baperisita ba bagolo ba romilego bahlanka, gore ba mo sware. ₃₃Jesu a bolela le bona a re: Ke sa na le lebakanyana fela ke na le lena, ka tlo tsebo boela go e a nthomilego. ₃₄Le tlo nnyaka la se nkhwetše; Le ka se ke la fihla mo ke lego gona.

₃₅Bjale Bajuda ba botšišana ba re: O tlo ya kae, ge a re re ka se ke ra mo hwetša? A o tlo ya mo go faletšego Bagerika, a ruta bona Bagerika? ₃₆Ba re: Lentšu leo a le boletšego le reng ge a re: Le tlo nnyaka le se nkhwetše, ge a re: Le ka se ke la fihla mo ke lego gona?

₃₇Ka tšatši la go kgaotša monyanya, e lego lona le legolo, Jesu a ema a hlaboša lentšu a re: Ge motho a nyorwa, a tle go nna a nwe. ₃₈E a ntumelago ka mo mangwalo a boletšego, mmeleng wa gagwe go tlo tšwa dinoka tša meetse a phelago, tša ela. ₃₉A realo a era Moya, wo ba dumelago ba tlogo o fiwa; gobane Moyamokgethwa o be o sešo wa ba gona ka ge Jesu a sešo a ba letagong la gagwe.

₄₀Ba bantši ba setšhaba ge ba ekwa se a se bolelago, ba re: Ka kgonthe, motho yo ke yena Moporofeta.

₄₁Ba bangwe ba re: Ke yena Kriste.

Ba bangwe ba re: A Kriste a ka tšwa Galilea? ₄₂Ba re: A mangwalo ga a re Kriste o tlo tšwa lelokong la Dafida, o tlo tšwa Betlehema motseng wo Dafida a tšwilego go wona? ₄₃Gwa ba le phapang mo lešabeng ka baka la gagwe. ₄₄Ba bangwe ba rata go mo swara; fela, gwa se be le e a mo išago seatla.

₄₅Bahlanka bala ba boela go baperisita ba bagolo le go bafarisei; ba fihla gwa thwe: Le reng le sa mo tliše;

₄₆Bahlanka ba re: Ga go ešo gwa ba le motho e a bolelago bjalo ka motho eo.

₄₇Bafarisei ba ba kgala ba re: E se be le lena le arošitšwe? ₄₈A go na le e mongwe wa bagolo goba mofarisei e a mo dumetšego? ₄₉Ke setšhaba se sa go se tsebe Molao; sona ke dihlobogwa.

₅₀Ke mo Nikodemo, yola wa go tla go Jesu bošego, e le e mongwe wa bona, a ba botšišitšego a re: ₅₁A gomme ka Molao wa rena re ka bea motho molato a sešo a sekišwa, gwa tsebja se a se dirago?

₅₂Ba fetola ba re: Anthe le wena o Mogalilea? Tsomeša o bone ge go se moporofeta wa go thwe o tlo tsoga Galilea. ₅₃Gomme ba phatlalala ba ikela magaeng.